অসমলৈ আনিব বৃন্দাৱনী বস্ত্ৰ

dainik janambhumi August 31, 2025

ডিজিটেল ডেস্কঃ অচিৰেই অপেক্ষাৰ অন্ত পৰিব। অসমীয়াই কেইবাটাও শতক ধৰি অধীৰ আগ্ৰহৰে প্ৰতীক্ষা কৰি থকা গুৰুজনাৰ অমৰ সৃষ্টি বৃন্দাৱনী বস্ত্ৰ অসমলৈ অনাৰ বাট প্রশস্ত হৈছে। সকলো ঠিকে থাকিলে ব্রিটিছ মিউজিয়ামত থকা বৃন্দাৱনী বস্ত্ৰ ২০২৭চনত ১৮ মাহৰ বাবে অসমলৈ অনা হ'ব। 

কালি লোকসেৱা ভৱনত অনুষ্ঠিত এখন সংবাদমেলত এই কথা প্রকাশ কৰিছে মুখ্যমন্ত্রী ড° হিমন্ত বিশ্ব শর্মাই। মুখ্যমন্ত্ৰীগৰাকীয়ে কয়, 'মহাপুৰুষ শ্রীমন্ত শংকৰদেৱে যি বৃন্দাৱনী বস্ত্ৰ মহাৰাজ নৰনাৰায়ণৰ অনুৰোধ ক্রমে প্রস্তুত কৰিছিল আৰু কালক্ৰমত সেই বৃন্দাৱনী বস্ত্ৰখন অসমৰ পৰা তিব্বত হৈ লণ্ডন, ফ্রান্স আদি বিভিন্ন স্থানলৈ যায়গৈ।' 

আনহাতে গুৰুজনাৰ সৃষ্টি বৃন্দাৱনী বস্ত্রখন অসমৰ মানুহে যাতে চাব পাৰে, তাৰ বাবে বহুতো প্রচেষ্টা চলোৱা হৈছে বুলি উল্লেখ কৰি তেওঁ লগতে কয়, 'বিশেষকৈ ইউৰোপৰ তিনিটা মিউজিয়ামত বৃন্দাবনী বস্ত্রখন আছে। কিন্তু কোনখন আচল বস্ত্র তাক লৈয়ো বিভিন্ন সময়ত বিভিন্ন আলোচনা হৈছে। এই বিষয়ে ব্রিটিছ মিউজিয়ামৰ কিউৰেটৰ ৰিচাৰ্ড ব্লাটনে লিখা গ্ৰন্থত বৃন্দাৱনী বস্ত্ৰৰ বিষয়ে বহু কথা উল্লেখ কৰিছে। গ্ৰন্থখনত বস্ত্ৰখনৰ ফ্রেবিক কেনেকুৱা, তাৰ ষ্টাইলটো কেনেকুৱা আছিল আৰু ইয়াৰ সৈতে জড়িত আধ্যাত্মিক ইতিহাসৰ কথাও আছে। তেওঁ অসমলৈয়ো আহিছিল। আনকি কেইবছৰমানৰ পূৰ্বে ব্রিটিছ মিউজিয়ামত থকা বৃন্দাৱনী বস্ত্ৰখন প্রদর্শনৰো ব্যৱস্থা কৰা হৈছিল।' 

আনহাতে আজিৰ তাৰিখত কোনো লোকে বৃন্দাবনী বস্ত্রখন চাব বিচাৰিলে ব্রিটিছ মিউজিয়ামলৈ মেইল দি আগতীয়াকৈ অনুমতি ল'ব লাগে বুলি জানিবলৈ দি মুখ্যমন্ত্ৰীগৰাকীয়ে কয়, 'তেওঁলোকে নির্দিষ্ট কৰি দিয়া দিনতহে গৈ আমি চাব পাৰোঁ। কাৰণ এতিয়া ব্রিটিছ মিউজিয়ামে কাপোৰখনৰ বয়স বাঢ়ি যোৱাৰ বাবে সাধাৰণ প্ৰদৰ্শন বন্ধ কৰি বিশেষভাবে আছুতীয়াকৈ ৰাখি থৈছে। যাতে বস্ত্রখন বাহিৰৰ প্ৰদূষণৰ সংস্পৰ্শলৈ নাহে।' ইফালে ব্রিটিছ মিউজিয়ামত থকা বৃন্দাবনী বস্ত্রখন তেওঁ নিজে চাইছিলেগৈ বুলি উল্লেখ কৰি মুখ্যমন্ত্রী ড° শৰ্মাই লগতে কয়, 'বিধানসভাৰ অধ্যক্ষ হৈ থাকোঁতে ৰঞ্জিত কুমাৰ দাসেও ফ্ৰান্সৰ মিউজিয়ামত থকা বৃন্দাবনী বস্ত্রখন চাইছিলেগৈ। দুয়োখনৰ মাজত কোনখন আচল, কোনখন পৰৱৰ্তী সময়ত নিৰ্মাণ কৰা বা কোনখন শ্রীমন্ত শংকৰদেৱৰ হাতেৰে নিৰ্মাণ কৰিছিল তাৰ পার্থক্যটো ধৰিব নোৱাৰি।' এই বিষয়ে বহুখিনি চৰ্চাৰ প্ৰয়োজন আছে বুলি মত প্রকাশ কৰি মুখ্যমন্ত্ৰীগৰাকীয়ে কয়, 'অসম চৰকাৰে বিভিন্ন সময়ত ব্রিটিছ মিউজিয়াম আৰু ফ্ৰান্সৰ লগতে বৃন্দাৱনী বস্ত্ৰ য'তেই থকাৰ খবৰ পাইছিলোঁ, তেওঁলোকৰ সৈতে যোগাযোগ কৰিছিলোঁ, যাতে এবাৰ বৃন্দাৱনী বস্ত্ৰ অসমৰ মানুহে চাব পাৰে তাৰ বাবে বস্ত্রখন অসমলৈ আনিব পৰা যায়। এনে চেষ্টাৰ পাছতো কোনো মিউজিয়ামে আমাক সঁহাৰি দিয়া নাছিল, কিন্তু শেহতীয়াকৈ ব্রিটিছ মিউজিয়ামে আমালৈ পত্র দিছে। অৱশ্যে পত্ৰখনত কেইটামান চর্ত দিয়া হৈছে। উক্ত চর্তসমূহ পূৰণ কৰিব পাৰিলে ব্রিটিছ মিউজিয়ামে ২০২৭চনত অসমলৈ বৃন্দাৱনী বস্ত্ৰ ১৮ মাহৰ বাবে দিয়াৰ ব্যৱস্থা গ্রহণ কৰিব।'

আনহাতে জে এছ ডব্লিউ কোম্পানীটোৱে ব্রিটিছ মিউজিয়াম আৰু অসম চৰকাৰৰ মাজত সম্পর্ক স্থাপন কৰি দিছে বুলি উল্লেখ কৰি তেওঁ লগতে কয় যে তেওঁলোকে আমাক কেইটামান কথা কৈছে। সেই অনুসৰি ডিজিটেল অভিজ্ঞতাৰ বাবে তেওঁলোকে এই বছৰে আমাক বৃন্দাৱনী বস্ত্ৰখন দেখুৱাব বিচাৰিছে। অর্থাৎ ব্রিটিছ মিউজিয়ামত তেওঁলোকে বস্ত্রখন প্রদর্শন কৰিব আৰু আমি ইয়াত কোনো এটা স্থানত একত্রিত হৈ অনলাইনত লাইভযোগে প্রত্যক্ষ কৰিব পাৰিম। ইয়াৰ উপৰি বস্ত্ৰখন অসমলৈ অনাৰ ক্ষেত্রত তেওঁলোকে এটা নতুন আৰু আধুনিক মিউজিয়াম নিৰ্মাণ কৰাৰ কথা কৈছে। য'ত বস্ত্রখন ক্ষতি নোহোৱাকৈ যাতে আমি ৰাখিব পাৰোঁ। এই মিউজিয়ামটো ব্রিটিছ মিউজিয়ামে বিচৰা ধৰণৰ মানদণ্ডৰ হ'ব লাগিব। গুৱাহাটী মিউজিয়াম আৰু কলাক্ষেত্ৰৰ মিউজিয়াম তেওঁলোকে চাই সেইটো পৰ্যায়ৰ নহয় বুলি কৈছে। যদিহে আমি তেওঁলোকে বিচৰা ধৰণেৰে মিউজিয়াম নির্মাণ কৰিব পাৰোঁ, তেনেহ'লে ২০২৭ চনত ১৮ মাহৰ বাবে বৃন্দাৱনী বস্ত্ৰ অসমলৈ আনিব পৰা যাব। এবাৰ ব্ৰিটিছ মিউজিয়ামৰ বৃন্দাৱনী বস্ত্র সফলভারে প্রদর্শন কৰিব পাৰিলে আন মিউজিয়ামত থকা বৃন্দাৱনী বস্ত্রও অসমলৈ অনাত অসুবিধা নহ'ব। 'ইফালে আধুনিক মিউজিয়াম নিৰ্মাণৰ ক্ষেত্ৰত ৰাজ্য চৰকাৰৰ কোনো অভিজ্ঞতা নাই বুলি জনাই ড° শর্মাই কয়, 'জে এছ ডব্লিউ কোম্পানীয়ে অসমত তেনে এটা মিউজিয়াম নিৰ্মাণ কৰি অসম চৰকাৰক উপহাৰ হিচাপে দিব বুলি প্রতিশ্রুতি দিছে। মিউজিয়াম নিৰ্মাণৰ বাবে যোৱা কেবিনেটত খানাপাৰত থকা ৰেছম বিভাগৰ এবিঘা মাটি দিয়া হৈছে।

খানাপাৰাৰ খেলপথাৰৰ সমীপত মাটিখিনি দিয়া হৈছে, যাতে পাছত গাড়ী পার্কিং আদিৰ ক্ষেত্ৰত ৰাইজৰ সুবিধা হয়। ইফালে বহু দিনৰ পাছত বস্ত্ৰখন অসমলৈ অনাৰ ক্ষেত্ৰত আমি সফলতাৰ দিশে আগবাঢ়িছোঁ বুলি উল্লেখ কৰি মুখ্যমন্ত্রী ড° শর্মাই লগতে কয়, 'ব্রিটিছ মিউজিয়ামে ছেপ্টেম্বৰত মোক লণ্ডনলৈ যোৱাৰ বাবে নিমন্ত্রণ জনাইছে। কিন্তু ছেপ্টেম্বৰত মই যোৱাত অসুবিধা হ'ব। সেয়েহে অক্টোবৰ নাইবা নৱেম্বৰত গৈ সকলো চূড়ান্ত কৰিম।'

ইফালে ব্রিটিছ মিউজিয়ামে প্ৰেৰণ কৰা পত্ৰখনত স্পষ্টভাবে উল্লেখ কৰিছে যে বস্ত্ৰখন কেনেদৰে ৰাখিব লাগিব, সেই সন্দর্ভত তেওঁলোকে নিয়ম বান্ধি দিব আৰু সকলো দিশত সন্তুষ্ট হ'লেহে বৃন্দাৱনী বস্ত্র অসমলৈ পঠাব। একেদৰে বৃন্দাৱনী বস্ত্রখন প্ৰদৰ্শনৰ পাছত ঘূৰাই পঠিওৱাৰ ক্ষেত্ৰত ভাৰত চৰকাৰে ব্ৰিটিছ মিউজিয়ামক নিশ্চয়তা প্রদান কৰিব লাগিব। ইয়াৰ বাবে ভাৰত চৰকাৰলৈ অসম চৰকাৰে আগষ্ট মাহতে পত্ৰ দিয়াৰ কথা জনাই মুখ্যমন্ত্ৰীয়ে কয়, 'ভাৰত চৰকাৰে লণ্ডনত থকা ভাৰতৰ ৰাষ্ট্ৰদূতক সহায় কৰাৰ বাবে কৈছে। বৃন্দাৱনী বস্ত্রখন অসমলৈ অনাটো ৰাইজৰ বহুদিনীয়া সপোন। যদিহে এই কামটো কৰিব পাৰোঁ, তেনেহ'লে এটা ডাঙৰ কাম হ'ব। বর্তমান সময়ত ৯০ শতাংশ সম্ভাৱনা বাঢ়ি গৈছে বুলি উল্লেখ কৰি মুখ্যমন্ত্ৰীগৰাকীয়ে লগতে কয় যে অসমৰ উপৰি ব্ৰিটিছ মিউজিয়ামে মুম্বাইতো বস্ত্ৰখনৰ প্ৰদৰ্শন কৰিব বিচাৰিছে। এই গোটেই কামটোৰ বাবে প্রায় দুবছৰ লাগিব। ইয়াৰ উপৰি ভাৰতৰ ৰাষ্ট্ৰপতিয়ে ব্ৰিটিছ চৰকাৰক বস্ত্ৰখন ক্ষতি নোহোৱাকৈ ঘুৰাই দিম বুলি এখন পত্রও দিব লাগিব।

Share This