এশ কোটি টকাৰ ২৮ ট্ৰাক গুট্‌খা জব্দ

Dainik Janambhumi January 11, 2025

অসম চৰকাৰৰ কৰ আয়ুক্ত হিচাপে যোগদান কৰিয়েই  পল্লৱ গোপাল ঝাই  ৰাজ্য চৰকাৰক কোটি কোটি টকাৰ কৰ ফাকি দি অব্যাহত ৰখা গুটখাৰ চোৰাং ব্যৱসায়ীৰ ঘাটিত বৃহৎ অভিযান আৰম্ভ কৰিছে৷ অভিযানকালত কৰ ফাকিৰে অসমলৈ পৰিবহণ কৰা ট্ৰাকে ট্ৰাকে গুটখা জব্দ হৈছে৷ এই অভিযানে ‘নীৰৱ ঘাতক’ৰূপী গুটখাক লৈ ৰাজ্যত চলি থকা ক’লা বজাৰখনৰ ৰূপটো উদঙাই দিয়ে৷ জব্দ হোৱা গুটখাৰ ভিতৰত সৰ্বাধিক আছে শিখৰ, ছিগনেচাৰ, বিমল জাতীয় বেণ্ডৰ গুটখা৷

যোৱা এটা সপ্তাহত জি এছ টি বিভাগৰ ইণ্টেলিজেন্স এণ্ড এনফ’ৰ্চমেণ্ট শাখাই গোপন তথ্যৰ ভিত্তিত বহিঃৰাজ্যৰ পৰা ৰে’লেৰে সৰবৰাহ কৰা কৰ বিহীন গুটখাসমূহ জব্দ কৰে৷ কৰ বিভাগক এইক্ষেত্ৰত অসম আৰক্ষীয়ে  সহযোগ কৰিছে৷ তথ্য অনুসৰি, কৰ আয়ুক্তৰ নিৰ্দেশত জি এছ টিৰ ইণ্টেলিজেন্স এণ্ড এনফ’ৰ্চমেণ্ট শাখাই কেৱল গুৱাহাটী আৰু ইয়াৰ সমীপৱৰ্তী অঞ্চলত অভিযান চলাই জব্দ কৰিছে প্ৰায় ২৮ ট্ৰাক গুটখা৷ কৰ বিভাগে অভিযানৰ সমান্তৰালভাৱে উক্ত গুটখাৰ হিচাপ-নিকাচো আৰম্ভ কৰিছে৷ সেই অনুসৰি জব্দকৃত গুটখাসমূহৰ বজাৰ মূল্য হ’ব প্ৰায় এশ কোটি টকা৷ উল্লেখযোগ্য যে অসম তথা উত্তৰ-পূবত ছিগনেচাৰ নামৰ গুটখাবিধৰ মুখ্য পৰিৱেশকৰ দায়িত্বত আছে কমলেশ আৰু বিমলেশ নামৰ দুই ভাতৃ৷ দুই ভাতৃৰ হৈ গুৱাহাটীৰ পৰা ছিগনেচাৰ ব্ৰেণ্ডৰ মাৰ্কেটিং কৰে জে পি জি নামৰ ফাঁচি বজাৰৰ এক প্ৰতিষ্ঠান আৰু জনৈক নাৰায়ণ নামৰ ব্যৱসায়ীয়ে৷ এইসকল ব্যৱসায়ীয়ে কৰ ফাকিৰে অনা গুটখা মূলতঃ পৰিবহণ কৰে গুৱাহাটীৰ পল্টন বজাৰস্থিত টি এণ্ড এছ এক্সপ্ৰেছ নামৰ পৰিবহণ সংস্থাটোৱে৷ উক্ত পৰিবহণ সংস্থাটোৰ গৰাকী হ’ল সুবোধ সিং৷ অভিযোগ মতে, সুবোধ সিঙে দীৰ্ঘদিনৰ পৰা ৰে’লত কৰ বিহীন গুটখা সৰবৰাহ কৰি আহিছে৷

যদি কেতিয়াবা সুবোধ সিঙে চোৰাংকৈ সৰবৰাহ কৰা গুটখা জি এছ টি বিভাগে ধৰে তেনেহ’লে সুবোধ সিঙে কৰ বিভাগত থকা তেওঁৰ ঘনিষ্ঠ কৰ বিষয়াৰ জৰিয়তে সামান্য জৰিমনা আদায় দি সামগ্ৰী মোকলাই লৈ যায়৷ তথ্য মতে, বিগত বৰ্ষত সুবোধ সিঙে এইবাৰৰ দৰেই কৰ ফাকিৰে ৰে’লৰ কেইবাটাও দবাত কঢ়িয়াই অনা গুটখা জি এছ টি বিভাগে জব্দ কৰিছিল৷ কিন্তু সুবোধ সিঙে সেই বৃহৎ পৰিমাণৰ গুটখা মাত্ৰ সামান্য জৰিমনা আদায় দিয়েই কোনো শাস্তিৰ সন্মুখীন নোহোৱাকৈয়ে কিদৰে মোকলাই লৈ গ’ল সেয়া এক অবুজ সাঁথৰ হৈ পৰিছে৷ এইদৰে অতদিনে চোৰাংভাৱে গুটখা পৰিবহণ কৰি আহিছে সুবোধ সিঙে৷ এইবাৰো অভিযানত জব্দ হোৱা গুটখাৰো সৰ্বাধিক পৰিবহণ কৰিছে সুবোধ সিঙে৷ সুবোধ সিঙৰ লগতে জব্দ হৈছে গুবাহাটীৰ আন এটা ঠগ পৰিবহণ সংস্থা এ ভি জি লজিষ্টিকে কৰ ফাকিৰে পৰিবহণ কৰা গুটখা সামগ্ৰী৷

এ ভি জি লজিষ্টিকে পৰিবহণ কৰা বুজন পৰিমাণৰ গুটখা শুকুৰবাৰে গুৱাহাটীৰ বি জি য়াৰ্ডত জব্দ কৰা হয়৷  লক্ষণীয়ভাৱে নতুন আয়ুক্তই যোগদান কৰাৰ পাছতেই বিভাগৰ এই তৎপৰতা মন কৰিবলগীয়া৷ কিয়নো ইয়াৰ পূৰ্বেও জি এছ টি বিভাগৰ ভিজিলেন্স এণ্ড এনফ’ৰ্চমেণ্ট শাখা সক্ৰিয় হৈ আছিল আৰু  দায়িত্বত আছিল অতিৰিক্ত কৰ আয়ুক্ত চাকিল চাদুল্লা৷ চাকিল চাদুল্লাৰ সময়তো নিতৌ ৰে’ল অথবা ট্ৰাকেৰে কৰ ফাকিৰে সৰবৰাহ কৰা গুটখা বহিঃৰাজ্যৰ পৰা আহিছিল৷ দায়িত্বত আছিল প্ৰৱাল পীয়ূষ ভৰালী বা নয়নজ্যোতি বৰাৰ দৰে বিষয়া৷ কিন্তু তেতিয়া এইদৰে অভিযান চলাৰ বিপৰীতে সকলো পক্ষ গোপন বুজাবুজিৰে আগবাঢ়িছিল৷  চাকিল চাদুল্লাৰ নেতৃত্বত এইদৰে বিভাগটোৱে কিয় অভিযান চলাব পৰা নাছিল তাক লৈ এতিয়া সকলোৱে সন্দেহ প্ৰকাশ কৰিছে৷ অৱশ্যে এইবাৰৰ অভিযানত সুবোধ সিং নাইবা এ ভি জি লজিষ্টিকে পৰিবহণ কৰা জি এছ টি ফাকি দিয়া বুজন পৰিমাণৰ গুটখা জব্দ হৈছে যদিও ইয়াৰ মাজতে এৰি দিয়া হ’ল ডি এণ্ড বি নামৰ পৰিবহণ সংস্থাটোৱে ৰে’লেৰে সৰবৰাহ কৰা কোটি টকাৰ গুটখা৷ অৰ্থাৎ এতিয়াও কৰ ভৱনত সক্ৰিয় হৈ আছে ক’লা বেপাৰীক সুৰক্ষা দিয়া বিষয়া৷

সি যি কি নহওক, এই অভিযান সন্দৰ্ভত ‘দৈনিক জনমভূমি’ৰ ফালৰ পৰা কৰ আয়ুক্ত পল্লৱ গোপাল ঝাক যোগাযোগ কৰা হৈছিল যদিও অভিযান সন্দৰ্ভত আয়ুক্তগৰাকীয়ে বিশেষ মন্তব্য কৰাৰ পৰা বিৰত থাকে৷ অৱশ্যে তেওঁ এটা কথা স্পষ্ট কৰি দিয়ে যে ‘পূৰ্বৰ কথা এতিয়া বাদ৷ এতিয়াৰে পৰা জি এছ টি ফাকি দি কোনেও এপেকেটো গুটখা বিক্ৰী কৰিব নোৱাৰিব৷ কৰ ফাকি দিয়া ক’লা বেপাৰীক কৰ বিভাগে উৎখাত কৰিবই৷’ আনহাতে, ৰাজ্যৰ জিলাই জিলাই  কৰ বিভাগৰ এই অভিযান চলিব বুলিও তেওঁ জানিবলৈ দিয়ে৷

Share This