অসমত দ্রুত গতিত বনাঞ্চল হ্রাস

dainik janambhumi January 27, 2025

ডিজিটেল ডেস্ক : অসমত দ্রুত গতিত বনাঞ্চল হ্রাস পোৱাক লৈ উদ্বিগ্ন হৈ পৰিছে ৰাষ্ট্ৰীয় সেউজ ন্যায়াধিকৰণ। যোৱা ২০২১ চনৰ পৰা ২০২৩ চনলৈকে মাত্র দুটা বছৰৰ ভিতৰতে ৰাজ্যখনত ৮৬.৬৬ বৰ্গ কিল'মিটাৰ বনভূমি হ্রাস পোৱাৰ সন্দৰ্ভত ন্যায়াধিকৰণে ৰাজ্য আৰু কেন্দ্ৰীয় চৰকাৰলৈ জাননীও প্ৰেৰণ কৰিছে। 

উল্লেখযোগ্য যে শেহতীয়াকৈ ষ্টেট অব্ ফৰেষ্ট ৰিপ'ৰ্টত অসমত ব্যাপক গতিত বনাঞ্চল হ্রাস হোৱাৰ তথ্যক লৈ সংবাদ মাধ্যমত বাতৰি প্ৰকাশ পোৱাৰ পাছতেই সেউজ ন্যায়াধিকৰণে নিজাববীয়াকৈ এটা গোচৰ ৰুজু কৰে। ইয়াৰ পাছত সমগ্ৰ বিষয়টোক লৈ শেহতীয়াকৈ সেউজ ন্যায়াধিকৰণৰ ন্যায়াধীশ প্রকাশ শ্রীবাস্তৱ আৰু বিশেষজ্ঞ সদস্য আফ্ৰজ আহমেদ বিচাৰপীঠে এক শুনানি গ্রহণ কৰি কয় যে অসমে বন সংৰক্ষণ আৰু পৰিৱেশ সুৰক্ষা আইন উলংঘা কৰিছে। তদুপৰি পৰিৱেশ নীতি সম্পর্কীয় যথেষ্ট নীতি উলংঘন কৰাৰো অভিযোগ উত্থাপন হৈছে। 

আনহাতে বনভূমি হ্ৰাসৰ ফলত অসমৰ লগতে সমগ্ৰ উত্তৰ-পূৰ্বাঞ্চলত জলবায়ু পৰিৱৰ্তনৰ কুপ্ৰভাৱ পৰাৰ কথা উল্লেখ কৰি ন্যায়াধিকৰণে কেন্দ্ৰীয় পৰিৱেশ আৰু বন মন্ত্ৰ্যালয়ৰ লগতে অসম চৰকাৰক এই সন্দৰ্ভত অহা ২৯ জানুৱাৰীৰ ভিতৰত শপতনামা দখিল কৰাৰ বাবে নিৰ্দেশ দিয়ে। 

আনহাতে অসমৰ উপৰি বনভূমি হ্রাস পোৱা অৰুণাচল প্রদেশ,ত্ৰিপুৰা আৰু মিজোৰামকো এই সন্দৰ্ভত শপতনামা দাখিলৰ বাবে কৈছে ন্যায়াধিকৰণে। প্রণিধানযোগ্য যে ২০২৩ চনত ইণ্ডিয়া ষ্টেট অব্‌ ফৰেষ্ট ৰিপ'ৰ্ট অনুসৰি অসমত থকা বনভূমিৰ পৰিমাণ হৈছে ১৯,৬৯৯.৭৩ বর্গ কিল 'মিটাৰ। কিন্তু যি গতিত ৰাজ্যখনত বনভূমি ধ্বংস হ'বলৈ ধৰিছে। তাৰ ফলত প্ৰতিদিনেই ৰাজ্যখনত বনভূমিৰ পৰিমাণ হ্রাস পাইছে।

Share This