কৌশলেৰে ATM কাৰ্ড সালসলনি কৰি দুৰ্বৃত্তই নিলে ১৯ হাজাৰ টকা

Rashmi April 11, 2025

ডিজিটেল ডেস্কঃ চিৰাঙৰ বিজনীত শুকুৰবাৰে বিয়লি অজ্ঞাত প্ৰৱঞ্চকে এগৰাকী শিক্ষয়িত্ৰীৰ ATM কাৰ্ডখন কৌশলেৰে সালসলনি কৰি ATMৰ পৰা ১৯ হাজাৰ টকা উলিয়াই লৈ যায় ।

উল্লেখ্য যে বিজনীৰ শিয়ালমাৰীৰ বাসিন্দা তথা এখন ব্যক্তিগত খণ্ডৰ বিদ্যালয়ৰ শিক্ষয়িত্ৰী নৱনীতা বৰ্মনে বিদ্যালয় ছুটী হোৱাৰ পাছত বিজনী-পাণবাৰী পথৰ হনুমান মন্দিৰৰ ওচৰতে লাগি থকা SBIৰ ATM টোৰ পৰা ধন উলিয়াবলৈ যায় ।

UCO বেংকৰ বিজনী শাখাত একাউণ্ট থকা শিক্ষয়িত্ৰীগৰাকীয়ে নিজৰ UCO বেংকৰ ATM কাৰ্ডখন ব্যৱহাৰ কৰি ATM ৰ পৰা ধন উলিওৱা প্ৰক্ৰিয়া কৰি থাকোঁতেই সেই সময়ত ATM টোৰ ভিতৰত থকা অজ্ঞাত প্ৰৱঞ্চক দুটাই কৌশলেৰে নৱনীতা বৰ্মনৰ ATM কাৰ্ডখন সালসলনি কৰি ATM টোৰ পৰা ১৯ হাজাৰ টকা উলিয়াই লৈ যায় ।

পাছত এই কথা জানিব পাৰি শিক্ষয়িত্ৰীগৰাকী বিজনী থানালৈ আহি আৰক্ষীক ঘটনাটো অৱগত কৰাত বিজনীৰ আৰক্ষী ঘটনাস্থলীত উপস্থিত হৈ তদন্ত আৰম্ভ কৰে ।

ঘটনা সন্দৰ্ভত ইতিমধ্যে শিক্ষয়িত্ৰীগৰাকীয়ে বিজনী থানাত এখন এজাহাৰ দাখিল কৰে।

উৎস: প্ৰাগ নিউজ ডিজিটেল

Share This