ৰাজ্যৰ ১১ স্থানত ম'হ যুঁজৰ বিৰুদ্ধে 'পেটা'ৰ ১৭খন এজাহাৰ

dainik janambhumi January 29, 2025

ডিজিটেল ডেস্ক : দেশৰ উচ্চতম ন্যায়ালয়ৰ পাছত গুৱাহাটী উচ্চ ন্যায়ালয়েও মাঘ বিহুত ম'হ যুঁজ নিষিদ্ধ কৰিছিল যদিও এইবাৰ এনে ম'হ যুঁজ অনুষ্ঠানত মুখ্য অতিথি হিচাপে অংশগ্ৰহণ কৰাৰ লগতে ম'হ যুঁজৰ সপক্ষে বক্তব্য দিয়াৰ বাবে ৰাজ্যৰ এজন কেবিনেট মন্ত্ৰীৰ বিৰুদ্ধে আদালত অৱমাননাৰ অভিযোগ উত্থাপন কৰা হৈছে। 

আনহাতে নিষেধাজ্ঞা সত্ত্বেও গুৱাহাটী উচ্চ ন্যায়ালয়ৰ নির্দেশ অৱমাননা কৰি মাঘ বিহুত ৰাজ্যৰ বিভিন্ন প্রান্তত অনুষ্ঠিত কৰা ম'হ যুঁজৰ বাবে আয়োজকৰ বিৰুদ্ধে বিভিন্ন থানাত ১৭খনকৈ এজাহাৰ দাখিল কৰিছে 'পেটা ইণ্ডিয়া' নামৰ সংগঠনটোৱে। উল্লেখযোগ্য যে পেটা ইণ্ডিয়াৰ আৱেদনৰ ভিত্তিত অসমত ম'হ যুঁজ আৰু বুলবুলি চৰাইৰ যুঁজ নিষিদ্ধ কৰিছিল গুৱাহাটী উচ্চ ন্যায়ালয়ে। উচ্চতম ন্যায়ালয়ৰ পাছত গুৱাহাটী উচ্চ ন্যায়ালয়ে যোৱা ১৭ ডিচেম্বৰত ম'হ যুঁজ আৰু বুলবুলি চৰাইৰ যুঁজ নিষিদ্ধ ঘোষণা কৰিছিল। 

কিন্তু কেইবাখনো ম'হ যুঁজ আৰু বুলবুলি চৰাই যুঁজৰ আয়োজক সমিতিয়ে ন্যায়ালয়ত পৰম্পৰাৰ দোহাই দি এই যুঁজৰ অনুমতি দিয়াৰ আৱেদন কৰিছিল। মাঘ বিহুৰ মাত্ৰ কেইটামান দিনৰ পূৰ্বে ন্যায়ালয়ে এক নির্দেশনাযোগে অসমত এই দুয়োবিধ যুঁজৰ নিষেধাজ্ঞা অব্যাহত ৰাখিছিল। কিন্তু তাৰ পাছতো নগাঁও, মৰিগাঁও আৰু শিৱসাগৰ জিলাৰ বিভিন্ন প্রান্তত এইবাৰ ম'হ যুঁজ আৰু বুলবুলি চৰাইৰ যুঁজ অনুষ্ঠিত হৈছিল। শিৱসাগৰৰ ৰংঘৰ বাকৰিতো ৰংপুৰ সমিতিয়ে এইবাৰ ম'হ যুঁজৰ আয়োজন কৰিছিল। এই অনুষ্ঠানত মুখ্য অতিথি হিচাপে অংশগ্রহণ কৰিছিল কেবিনেট মন্ত্ৰী জয়ন্ত মল্ল বৰুৱাই। 

কেৱল অংশগ্ৰহণ কৰাই নহয়, তেওঁ ম'হ যুঁজৰ সপক্ষে ৰংঘৰ বাকৰিত ভাষণো দিছিল। তাৰ পাছতে আৰ টি আই কর্মী দিলীপ নাথে মন্ত্রী জয়ন্ত মল্ল বৰুৱাৰ বিৰুদ্ধেও দেশৰ মুখ্য ন্যায়াধীশ আৰু গুৱাহাটী উচ্চ ন্যায়ালয়ৰ মুখ্য ন্যায়াধীশলৈ আদালত অৱমাননাৰ অভিযোগ উত্থাপন কৰি পত্ৰ প্ৰেৰণ কৰিছে। পত্ৰখনত মন্ত্ৰীজনে নিজৰ ভাষণত ম'হ যুঁজৰ সপক্ষে ভাষণ দিছিল বুলি উল্লেখ কৰি আৰ টি আই কর্মীজনে মন্ত্ৰীজনৰ এই কাম ন্যায়ালয়ৰ নিৰ্দেশ পোনপটীয়াকৈ অৱমাননা কৰা বুলি অভিযোগ কৰে। তেওঁ অভিযোগৰ প্রমাণ হিচাপে মন্ত্রীজনে ভাষণ দি থকা অৱস্থাৰ ভিডিঅ' ফুটেজো প্ৰদান কৰে।

 ইফালে ন্যায়ালয়ৰ নিষেধাজ্ঞা সত্ত্বেও এইবাৰ মাঘ বিহুত ৰাজ্যৰ মুঠ ১১টা স্থানত ম'হ যুঁজৰ আয়োজন কৰা বুলি অভিযোগ কৰিছে পেটা ইণ্ডিয়া নামৰ সংগঠনটোৱে। নগাঁও, মৰিগাঁও আৰু শিৱসাগৰ জিলাত অনুষ্ঠিত হোৱা এই ম'হ যুঁজৰ বিৰুদ্ধে থানাই থানাই আয়োজকৰ বিৰুদ্ধে এজাহাৰ দাখিল কৰিছে পেটাই। সংগঠনটোৱে মুঠ ১৭খন এজাহাৰ দাখিল কৰিছে। লগতে জিলা প্রশাসনকো এই সন্দৰ্ভত ব্যৱস্থা গ্ৰহণ কৰাৰ আহ্বান জনায়।

Share This