নীপকো কৰ্তৃপক্ষক কঠোৰ সকীয়নি মুখ্যমন্ত্ৰীৰ 

dainik janambhumi June 03, 2025

ডিজিটেল ডেস্ক : ৰঙানদী জলবিদ্যুৎ প্ৰকল্পৰ পানীয়ে লখিমপুৰত সৃষ্টি কৰা বানৰ বাবে সোমবাৰে নীপকো কর্তৃপক্ষক সকীয়নি দিয়ে মুখ্যমন্ত্রী ড° হিমন্ত বিশ্ব শর্মাই। বান পৰিস্থিতি পর্যবেক্ষণ কৰাৰ বাবে লখিমপুৰত গৈ উপস্থিত হোৱা মুখ্যমন্ত্ৰীয়ে লীলাবাৰী বিমান বন্দৰত ৰঙানদী জলবিদ্যুৎ প্ৰকল্পৰ দায়িত্বত থকা নীপকোৰ বিষয়ববীয়াসকলৰ সৈতে এক গুৰুত্বপূর্ণ  বৈঠকত মিলিত হৈ কি কাৰণে তেওঁলোকে হঠাতে পানী এৰি দিলে, সেই সন্দৰ্ভত জবাবদিহি কৰে। বৈঠকত সমগ্ৰ বিষয়টো তদন্ত কৰা হ'ব বুলি জনাই তেওঁ স্পষ্টভাবে কয় যে যদিহে তদন্তত নীপকো জগৰীয়া বুলি প্রমাণিত হয় তেনেহ'লে তেওঁলোকৰ বিৰুদ্ধেও ব্যৱস্থা গ্রহণ কৰা হ'ব। 

আনহাতে, মুখ্যমন্ত্ৰীয়ে ৰঙানদী প্ৰকল্পৰ পানী এৰি দিয়া ব্যৱস্থা, কাৰিকৰী ব্যৱস্থাৰাজি, জিলা প্রশাসনৰ সৈতে যোগাযোগ, ৰাইজক আগতীয়াকৈ অৱগত কৰা আদি বিভিন্ন বিষয়সমূহ লৈ প্রশ্ন উত্থাপন কৰে। ড° শৰ্মাই কয় যে ৰঙানদী প্ৰকল্পৰ পৰা পানী এৰি দিয়াৰ চাৰি-পাঁচ ঘণ্টাৰ আগতে নীপকোৱে ৰাইজক অৱগত কৰিব লাগিছিল। নদীৰ নামনিত এলাৰ্ম বজাৰো ব্যৱস্থা কৰিব লাগে। নীপকো কর্তৃপক্ষই কোনো এটা গ্রুপত মেছেজ এটা দিয়েই নিজৰ দায়িত্ব সাৰিব খুজিলে নহ'ব বুলি স্পষ্ট কৰি দি তেওঁ লগতে কয় যে প্ৰকল্পৰ পানী একেলগে এৰি দিয়াটো উচিত নহয়। ৰিজাৰ্ভাৰত অধিক পানী আবদ্ধ কৰি ৰাখি হঠাতে পানী এৰি নিদিবলৈ নীপকো কর্তৃপক্ষক সকীয়াই দি তেওঁ পর্যায়ক্রমে লাহে লাহে পানী এৰি দিয়াৰ ব্যৱস্থা গ্রহণ কৰিবলৈ বিষয়াবর্গক নির্দেশ দিয়ে। ইয়াৰ বাবে প্রয়োজনীয় কাৰিকৰী দিশসমূহ আলোচনা কৰাৰ ক্ষেত্ৰত তেওঁ গুৰুত্ব আৰোপ কৰে। সময় থাকোঁতেই যাতে জনসাধাৰণক সাৱধান কৰিব পৰা যায়, তাৰ বাবে আগতীয়াকৈ জিলা প্ৰশাসনৰ লগত যোগাযোগ কৰিবলৈও তেওঁ নীপকোৰ বিষয়াসকলক নির্দেশ দি বৰষুণৰ আগজাননী পোৱাৰ পাছত অধিক সতর্কতাৰে তাৎক্ষণিকভাৱে পৰৱৰ্তী ব্যৱস্থা গ্রহণ কৰিবলৈও নির্দেশ দিয়ে। সোমবাৰৰ এই বৈঠকত শিক্ষা আদি বিভাগৰ মন্ত্রী ডাঃ ৰণোজ পেণ্ড, জলসম্পদ আদি বিভাগৰ মন্ত্ৰী পীয়ূষ হাজৰিকা, ৰাজহ আৰু দুর্যোগ ব্যৱস্থাপনা আদি বিভাগৰ মন্ত্রী কেশৱ মহন্ত, বিধায়ক মানৱ ডেকা, নৱ কুমাৰ দলে, ড° অমিয় কুমাৰ ভূঞাৰ উপৰি জিলা আযুক্ত প্ৰণৱজিৎ কাকতি প্ৰমুখ্যে ৰঙানদী পাৱাৰ প্লেণ্টৰ মুখ্য প্রকল্প বিষয়া পার্থপ্রতিম দাস আৰু অন্যান্য বিষয়াসকল উপস্থিত থাকে। 

উল্লেখযোগ্য যে এইবাৰৰ বানত লখিমপুৰ জিলাৰ ৫টা ৰাজহ চক্ৰৰ ১২৯খন গাঁও প্লাৱিত হৈছে। ইয়াৰ ফলত ৪৬,৬৮৭গৰাকী লোক ক্ষতিগ্রস্ত হৈছে। আনহাতে বানৰ ফলত ৪৫৪.৮২ হেক্টৰ কৃষিভূমি প্লাৱিত হৈছে। তদুপৰি ২২,৮৭১টা পশুধন বানৰ কবলত পৰিছে। প্রশাসনে তিনিটা শিবিৰ মুকলি কৰিছে আৰু ৪২৫গৰাকী লোকে ইয়াত আশ্রয় লৈছে। প্রশাসনে ৪৯টা সাহায্য বিতৰণ কেন্দ্ৰ মুকলি কৰিছে। আনহাতে, উদ্ধাৰ অভিযানৰ বাবে প্রশাসনে এটা এন ডি আৰ এফ আৰু ৪টা এছ ডি আৰ এফৰ দল নিয়োগ কৰিছে।

Share This