ডিব্ৰুগড়ত ব্ৰহ্মপুত্ৰৰ ভয়াৱহ খহনীয়া, মাইজানৰ বৃহৎ অংশ নিলে উটুৱাই

dainik janambhumi August 19, 2025

ডিজিটেল ডেস্ক : ডিব্ৰুগড়ত পুনৰ ব্ৰহ্মপুত্ৰৰ খহনীয়া আৰম্ভ হৈছে। ব্ৰহ্মপুত্ৰৰ প্ৰবল সোঁতে ডিব্ৰুগড়ৰ মাইজান অঞ্চলৰ বৃহৎ অঞ্চল উটুৱাই নিয়ে। ১০ আগষ্টত আৰম্ভ হোৱা এই খহনীয়া সমস্যাই এতিয়া ধ্বংসাত্মক ৰূপ লৈছে। ফলত বহু পৰিয়ালে নিজৰ ঘৰ-বাৰী এৰি সুৰক্ষিত ঠাইলৈ স্থানান্তৰ কৰিবলৈ বাধ্য হৈছে। বর্তমান এই খহনীয়াৰ ফলত জলসম্পদ দপ্তৰৰ মুখ্য কাৰ্যালয়কে ধৰি কেইবাটাও গুৰুত্বপূৰ্ণ কাৰ্যালয়ৰ প্ৰতি ভাবুকি কঢ়িয়াই আনিছে। 

খহনীয়া হৈ থকা অঞ্চলটো নৱনির্মিত মুখ্যমন্ত্রী সচিবালয়ৰ পৰা বেছি দূৰত নহয়, যাৰ বাবে শংকা আৰু বেছি হৈছে। ইয়াৰ প্ৰতিকাৰ হিচাপে জলসম্পদ দপ্তৰে ব্ৰহ্মপুত্ৰৰ খহনীয়া ৰোধ কৰিবলৈ জিঅ' বেগ আৰু পার্কিউপাইনৰ ব্যৱহাৰ কৰিছে। কিন্তু স্থানীয় লোকসকলৰ মতে এই ব্যৱস্থা কেৱল অস্থায়ী, কিয়নো নদীৰ প্ৰবল সোঁতে এইবোৰ প্ৰায়েই উটুৱাই নিয়ে। আনহাতে, স্থানীয় বাসিন্দা আৰু সংগঠনসমূহে তীব্র ক্ষোভ প্রকাশ কৰিছে। কাৰণ চৰকাৰে ডিব্ৰুগড়ৰ দীৰ্ঘদিনীয়া খহনীয়াৰ সমস্যাৰ স্থায়ী আৰু বৈজ্ঞানিক সমাধানৰ বাবে কোনো কাৰ্যকৰী পদক্ষেপ হাতত লোৱা নাই। 

ব্রহ্মপুত্ৰৰ খহনীয়াই ডিব্ৰুগড় নগৰক সদায়ে বিপদৰ মুখত ৰাখিছে, আৰু মাইজান, মোহনাঘাট, কয়লাঘাট, কাছাৰিঘাট আৰু পূজা ঘাটৰ দৰে খহনীয়া প্ৰৱণ অঞ্চলসমূহত ইয়াৰ প্ৰভাৱ বেছি হৈছে। এই সমস্যাৰ পৰা নগৰক ৰক্ষা কৰিবলৈ স্থানীয় লোকসকলে এতিয়া স্থায়ী আৰু বৈজ্ঞানিক সমাধানৰ বাবে ৰাইজে দাবী জনাই আহিছে।

Share This