ৰাজ্যৰ ১৯খন জিলাত বানৰ তাণ্ডৱ

dainik janambhumi June 02, 2025

ডিজিটেল ডেস্ক : ৰাজ্যত চলিত বৰ্ষৰ প্ৰথমটো বানে ক্ৰমাৎ ভয়ংকৰ ৰূপ ধাৰণ কৰিছে। অসমকে ধৰি চুবুৰীয়া কেইবাখনো ৰাজ্যত বিগত কেইবাদিন ধৰি অব্যাহত থকা ধাৰাবাহিক বৰষুণৰ বাবে উত্তৰ-পূবৰ তিনিখনকৈ ৰাজ্যত বান পৰিস্থিতি জটিল হৈ পৰিছে। বছৰৰ প্ৰথমটো বানত ৰাজ্যত এইপর্যন্ত শিশুসহ ৭জন লোকে প্রাণ হেৰুৱাবলগীয়া হৈছে। নেৰানেপেৰা বৰষুণৰ লগতে নীপকোৱে ৰঙানদী আৰু কাৰ্বি লাংপি জলবিদ্যুৎ প্রকল্প আৰু এন এইচ পি চিয়ে নামনি সোৱণশিৰি জলবিদ্যুৎ প্রকল্পৰ পানী এৰি দিয়াৰ ফলত বান পৰিস্থিতিৰ অধিক অবনতি ঘটিছে। 

অসম ৰাজ্যিক দুর্যোগ ব্যৱস্থাপনা প্ৰাধিকৰণে প্রকাশ কৰা মতে বছৰৰ প্ৰথমটো বানত ৰাজ্যত এইপর্যন্ত ৭জন লোকৰ মৃত্যু ঘটিছে। বানত গোলাঘাট জিলাত এটি শিশুসহ দুজন লোকৰ মৃত্যু হোৱাৰ উপৰি লখিমপুৰ জিলাত এজন, শ্রীভূমি জিলাত দুজন, ডিব্রুগড় জিলাত এজন আৰু কাৰ্বি আংলং জিলাৰ মাঞ্জাত এজন লোকৰ সলিল সমাধি ঘটিছে। ইফালে গুৱাহাটীত সংঘটিত ভূমিস্খলনৰ ফলত ৫জন লোক নিহত হোৱাৰ লগতে অন্য দুজন লোক আহত হয়। লক্ষণীয় যে ৰাজ্যখনৰ এইপর্যন্ত ১৯খন জিলা বানৰ কবলত পৰিছে। ধেমাজি, লখিমপুৰ, ডিব্রুগড়, গোলাঘাট, দৰং, নগাঁও, কার্বি আংলং, কামরূপ, বিশ্বনাথ, তিনিচুকীয়া, পশ্চিম কাৰ্বি আংলং, হাইলাকান্দি, হোজাই, শ্রীভূমি, শোণিতপুৰ, ডিমা হাছাও, কাছাৰ, শিৱসাগৰ, মাজুলী জিলাৰ ৫৬টা ৰাজহ চক্রৰ অন্তর্গত ৭৬৪খন গাঁও বানৰ কবলত পৰিছে। তথ্য অনুসৰি এই জিলাকেইখনৰ ৩.৬৫ লাখ লোক প্ৰথমটো বানৰ ফলত ক্ষতিগ্রস্ত হৈছে।

 ইফালে ৩৬০০ হেক্টৰ কৃষিভূমি এইপর্যন্ত বানত ডুব গৈছে। প্রায় ১০ হাজাৰ বানাক্ৰান্তক জিলা প্রশাসনে নির্ধাৰণ কৰা সাহায্য শিবিৰ আৰু সাহায্য বিতৰণ কেন্দ্ৰত আশ্রয় প্রদান কৰা হৈছে। আনহাতে বানাক্রান্ত জিলাকেইখনত প্রায় ২.৩৫ লাখ জীৱ-জন্তু ক্ষতিগ্রস্ত হৈছে আৰু এইপর্যন্ত প্রায় ৭০০ জীৱ-জন্তুৰ মৃত্যু হৈছে। লক্ষণীয় যে যোৱা ২৪ ঘণ্টাত বানত ২২টা পথ, এখন দলং, ৩টা মথাউৰি ভাঙিছে আৰু ৪টা মথাউৰি, জলসিঞ্চনৰ খাল, বিদ্যালয় ভবন, অংগনৱাড়ী কেন্দ্র আদি বানে ক্ষতিসাধন কৰিছে। চৰকাৰী তথ্য অনুসৰি কামৰূপ, ডিব্ৰুগড়, দৰং, কাছাৰ আৰু কামৰূপ (ম) জিলাকেইখন নগৰীয়া বানৰ কবলত পৰিছে। এই জিলা পাঁচখনৰ ১০ সহস্রাধিক লোক ক্ষতিগ্রস্ত হৈছে। প্রণিধানযোগ্য যে ৰাজ্যত ভয়ংকৰ ৰূপ ধাৰণ কৰা বানৰ বাবে বিভিন্ন স্থানত ৰে'লপথ আৰু পথৰ উপৰি দলং ক্ষতিগ্রস্ত হোৱাৰ বাবে যাতায়াত প্রক্রিয়া ব্যাহত হৈ পৰিছে। ইয়াৰ উপৰি কেইবাটাও স্থানত ৰাষ্ট্ৰীয় ঘাইপথৰ ওপৰেৰে পানী বাগৰি যোৱাৰ বাবেও যান-বাহনৰ চলাচল ব্যাহত হৈ পৰিছে। দেওবাৰে বৰাক-ব্ৰহ্মপুত্ৰকে ধৰি ৰাজ্যৰ ১০ খনকৈ গুৰুত্বপূৰ্ণ নদীৰ জলস্তৰ বিপদসীমাৰ ওপৰেৰে বৈ থকাৰ বাবে বান পৰিস্থিতি অধিক ভয়াৱহ হৈ পৰাৰ আশংকা কৰা হৈছে। ইফালে ৰাজ্যৰ বান পৰিস্থিতিৰ অৱনতি ঘটাৰ পাছত কেন্দ্রীয় গৃহ মন্ত্রী অমিত শ্বাহে বান পৰিস্থিতিৰ সৈতে মোকাবিলা কৰিবলৈ ৰাজ্য চৰকাৰক সকলো ধৰণৰ সহায়ৰ আশ্বাস প্রদান কৰিছে। কেন্দ্রীয় গৃহ মন্ত্রী শ্বাহে অসমৰ মুখ্যমন্ত্রী ড° হিমন্ত বিশ্ব শৰ্মাৰ সৈতে দেওবাৰে ফ'নযোগে অসমৰ বান পৰিস্থিতি সম্পৰ্কত আলোচনাত মিলিত হয়। তেওঁ ৰাজ্যৰ বান পৰিস্থিতিৰ সৈতে মোকাবিলা কৰিবলৈ ৰাজ্য চৰকাৰক সকলোধৰণ সহায়ৰ আশ্বাস প্রদান কৰা বুলি মুখ্যমন্ত্রীজনে সামাজিক মাধ্যমযোগে প্রকাশ কৰে। 

টুইট কৰি মুখ্যমন্ত্রীজনে প্রকাশ কৰে যে কেন্দ্ৰীয় গৃহ মন্ত্ৰীজনৰ সৈতে আলোচনাৰ সময়ত তেওঁ বান পৰিস্থিতিৰ সৈতে মোকাবিলা কৰিবৰ বাবে ৰাজ্য চৰকাৰে এইপর্যন্ত গ্রহণ কৰা পদক্ষেপসমূহৰ বিষয়ে অৱগত কৰে। উল্লেখযোগ্য যে চুবুৰীয়া অৰুণাচল প্ৰদেশত নৈ উপনৈসমূহৰ জলস্তৰ ক্ৰমাৎ বৃদ্ধি পোৱাত অসমৰ বান পৰিস্থিতি অধিক অৱনতি ঘটাৰ আশংকা কৰি সতর্কতা জাৰি কৰা হৈছে। মুখ্যমন্ত্রী ড° শর্মাই সামাজিক মাধ্যমযোগে প্রকাশ কৰে যে কিবিথু, হায়ুলিয়াং, কালাকটাঙকে ধৰি সমগ্ৰ অৰুণাচল প্রদেশত ধাৰাসাৰ বৰষুণৰ ফলত নামনি অংশৰ নদীৰ জলস্তৰ তীব্ৰভাৱে বৃদ্ধিৰ আশংকা কৰা হৈছে। সেয়ে দ-ভূমি তথা নৈৰ পাৰত বাস কৰা ৰাইজক সজাগ হৈ থাকি স্থানীয় প্রশাসনৰ পৰামৰ্শসমূহ অনুসৰণ কৰিবলৈ তেওঁ অনুৰোধ জনায়। ইয়াৰ উপৰি বতৰ বিজ্ঞান কেন্দ্ৰই অসমৰ লগতে চুবুৰীয়া ৰাজ্যকেইখনত আগন্তুক একাধিক দিনত ধাৰাসাৰ বৰষুণ হোৱাৰ আশংকা প্রকাশ কৰি ঠাইবিশেষে 'ৰেড এলাট' আৰু 'অৰেঞ্জ এলার্ট' জাৰি কৰিছে।

Share This