হৰমীট সিঙক ডি জি পিৰ অস্থায়ী দায়িত্ব

dainik janambhumi January 28, 2025

ডিজিটেল ডেস্ক : কেন্দ্ৰীয় চৰকাৰৰ ডেপুটেশ্যনত অসম আৰক্ষীৰ সঞ্চালকপ্রধান জি পি সিঙে ৰাজ্য এৰাৰ পাছত অসম আৰক্ষীৰ নতুন সঞ্চালকপ্ৰধান হিচাপে অস্থায়ীভাৱে বিশেষ সঞ্চালকপ্ৰধান হৰমীট সিঙক দায়িত্ব অর্পণ কৰা হৈছে।অসমৰ গৃহ বিভাগে এক নির্দেশনাযোগে ৰাজ্যৰ পৰৱৰ্তী স্থায়ী ডি জি পি নিযুক্তি প্ৰদান নকৰাপৰ্যন্ত সিঙক ডি জি পিৰ দায়িত্ব পালন কৰিবলৈ দায়িত্ব অর্পণ কৰে। 

তেওঁ অহা ২৯ জানুৱাৰীত এই দায়িত্ব গ্রহণ কৰাৰ সম্ভাৱনা আছে। কাৰণ সেইদিনাই ডি জি পি জি পি সিঙে অসম এৰাৰ কথা আছে। উল্লেখযোগ্য যে সম্প্ৰতি অসম আৰক্ষীৰ ডি জি পি হিচাপে দায়িত্বত থকা ১৯৯১ বৰ্ষৰ আই পি এছ জি পি সিঙে কেন্দ্ৰীয় সংৰক্ষিত আৰক্ষী বাহিনীৰ সঞ্চালকপ্রধান হিচাপে নিযুক্তি লাভ কৰিছে। তেওঁ কেন্দ্রীয় ডেপুটেশ্যনত অসম এৰাৰ পাছত তেওঁৰ স্থানত নতুন ডি জি পিক স্থায়ী দায়িত্ব দিয়াৰ পূৰ্বে এই দায়িত্ব পালনৰ বাবে হৰমীট সিঙক অস্থায়ীভাৱে দায়িত্ব অর্পণ কৰা হয়। 

উল্লেখযোগ্য যে হৰমীট সিং ১৯৯২ বৰ্ষৰ অসম-মেঘালয় কেদাৰৰ আই পি এছ বিষয়া।তেওঁ সম্প্রতি অসম আৰক্ষীৰ বিশেষ সঞ্চালকপ্ৰধানৰ দায়িত্বত আছে। অসামৰিক প্ৰতিৰক্ষাৰ সঞ্চালকপ্ৰধান আৰু গৃহৰক্ষী বাহিনীৰ অধিনায়কপ্ৰধানৰ দায়িত্বতো থকা সিং বিশেষ সঞ্চালকপ্রধান হিচাপে মুখ্য কার্যালয় আৰু সীমান্ত শাখাৰ দায়িত্বতো আছে। অগ্নিনির্বাপক আৰু জৰুৰীকালীন সেৱাৰ সঞ্চালকৰ দায়িত্বতো আছে হৰমীট সিং।১৯৯২ চনৰ অসম-মেঘালয় কেদাৰৰ আই পি এছ সিঙে ১৯৯৮ চনত নগাঁৱৰ আৰক্ষী অধীক্ষক হিচাপে কৰ্মৰত অৱস্থাতে অসমৰ পৰা কেন্দ্ৰীয় চৰকাৰৰ ডেপুটেশ্যনত তেওঁ দিল্লীলৈ গৈছিল। 

কেইবাবছৰ ধৰি কেন্দ্ৰীয় গৃহ মন্ত্ৰ্যালয়ত কর্মৰত হৰমীট সিঙে কেন্দ্ৰীয় চোৰাংচোৱা সংস্থাতো দীর্ঘদিন কাৰ্যনিৰ্বাহ কৰিছিল। ২০১৭ চনত অসমলৈ প্ৰত্যাৱৰ্তন কৰা জ্যেষ্ঠ আই পি এছ বিষয়াজনে ২০২১ চনত প্ৰায় ডেৰ বছৰ কাল গুৱাহাটীৰ আৰক্ষী আয়ুক্ত হিচাপে কাৰ্যনিৰ্বাহ কৰিছিল। ইফালে অসম এৰিবলৈ সাজু হোৱা ডি জি পি জি পি সিঙে অসমৰ অন্তিমটো গণৰাজ্য দিৱসৰ কেন্দ্ৰীয় কাৰ্যসূচীত অংশগ্ৰহণ কৰি আৱেগিক হৈ পৰে।দুটা দশকতকৈ অধিক সময় অসম আৰক্ষীত সেৱা আগবঢ়াই অহা ২৯ জানুৱাৰীত তেওঁ দিল্লীত চি আৰ পি এফৰ মুৰব্বী হিচাপে যোগদান কৰিব। অসম এৰিবলৈ সাজু হোৱা ডি জি পি সিঙে ৭৬সংখ্যক গণৰাজ্য দিৱসত অসমত মঞ্চত উপস্থিত থকা অন্তিমটো ডাঙৰ পেৰেড কাৰ্যসূচীত অংশ লৈ আৱেগিকভাৱে ২০০০ চনৰ কথা সোঁৱৰণ কৰাৰ লগতে অসমবাসীক সেৱা জনাই বিদায় লয়। 

তেওঁ কয় যে ২০০০ চনত ৰাজ্যপাল এছ কে সিন্‌হাৰ কাৰ্যকালত প্রথম গণৰাজ্য দিৱসৰ কেন্দ্ৰীয় কাৰ্যসূচীৰ মঞ্চত উপস্থিত থকাৰ সুবিধা লাভ কৰিছিল। তেতিয়া তেওঁ গুৱাহাটীৰ আৰক্ষী অধীক্ষক আছিল। উল্লেখযোগ্য যে সুদীর্ঘ ২৪ বছৰ অসম আৰক্ষীত সেৱা আগবঢ়োৱা জি পি সিঙে মাজতে ডেপুটেশ্যনত দিল্লীত নিয়া আৰু এছ পি জিতো গুৰুত্বপূৰ্ণ দায়িত্বত আছিল। কা আন্দোলনৰ সময়ত ২০১৯ চনত অসমলৈ ঘূৰি আহি অসম আৰক্ষীৰ বিশেষ সঞ্চালকপ্রধান হিচাপে দায়িত্ব গ্ৰহণ কৰে। লক্ষণীয় যে তেওঁৰ এই প্ৰত্যাৱৰ্তনৰ সময়তে অসম আৰক্ষীত নতুনকৈ বিশেষ সঞ্চালকপ্ৰধানৰ পদটো সৃষ্টি কৰা হৈছিল।২০২৩ চনৰ ৩১ জানুৱাৰীত তেওঁ অসম আৰক্ষীৰ সঞ্চালকপ্ৰধান হিচাপে দায়িত্ব গ্রহণ কৰিছিল। তেওঁ অসম আৰক্ষীৰ সংস্কাৰৰ বাবেও বহু কাম কৰিছিল।

Share This