৩দিনজুৰি মুখ্যমন্ত্ৰীৰ জন্মদিন পালন কৰিব পৌৰ নিগমে

Kakali Deka January 28, 2025

ডিজিটেল ডেস্ক : তিনিদিনীয়া কাৰ্যসূচীৰে উদযাপন কৰা হ'ব মুখ্যমন্ত্ৰী ড° হিমন্ত বিশ্ব শৰ্মাৰ জন্মদিন। ৩০ জানুৱাৰীৰ পৰা ১ ফেব্ৰুৱাৰীলৈ উদযাপন কৰা হ'ব মুখ্যমন্ত্রী শৰ্মাৰ জন্মদিন। গুৱাহাটী পৌৰ নিগমৰ উদ্যোগত উদযাপন কৰা হ'ব মুখ্যমন্ত্ৰীৰ জন্মদিন।এখন সংবাদমেল আয়োজন কৰি এই কথা ঘোষণা কৰে গুৱাহাটী পৌৰ নিগমৰ মেয়ৰ মৃগেন শৰণীয়াই।

সংবাদমেলত গুৱাহাটী পৌৰ নিগমে গ্রহণ কৰা কাৰ্যসূচী ব্যাখ্যা কৰি মেয়ৰ শৰণীয়াই কয় মুখ্যমন্ত্রী হিমন্ত বিশ্ব শৰ্মাৰ জন্মদিন উপলক্ষে ৩০ জানুৱাৰীত গুৱাহাটী পৌৰ নিগমৰ সকলো বজাৰ আৰু ৰাজহুৱা শৌচাগাৰসমূহত পৰিষ্কাৰ-পৰিচ্ছন্নতাৰ অভিযান চলিব। ৩১ জানুৱাৰীৰ দিনা গুৱাহাটী মহানগৰস্থিত সকলো মহান ব্যক্তিৰ প্ৰতিমূর্তি পৰিষ্কাৰ কৰি গুৱাহাটীৰ পৌৰ নিগমৰ পাৰিষদ তথা বিষয়াসকলে শ্রদ্ধাঞ্জলি জ্ঞাপন কৰিব। ১ ফেব্ৰুৱাৰীৰ দিনা ৰাজহুৱা ধর্মীয় স্থানসমূহত গছপুলি ৰোপণৰ লগতে স্বচ্ছতা অভিযানৰ আয়োজন কৰা হ'ব। তিনিদিনীয়া স্বচ্ছতা অভিযানৰ অন্তত গুৱাহাটী পৌৰ নিগমৰ ছটা সংমণ্ডলতে গুৱাহাটী পৌৰ নিগম চাফাই কর্মীসকলৰ সৈতে বাৰ্তালাপৰ লগতে দুপৰীয়া আহাৰৰ ব্যৱস্থা কৰিব। 

সংশ্লিষ্ট ৱাৰ্ডৰ পাৰিষদৰ সৈতে গুৱাহাটী পৌৰ নিগমৰ সকলো বিষয়াৰ উপস্থিতিত দুপৰীয়াৰ আহাৰ গ্ৰহণ কৰা হ'ব। গৃহ নিৰ্মাণৰ অনুমতি-পত্ৰ আৰু পৰৱৰ্তী সেই নির্মিত গৃহৰ দখলৰ প্ৰমাণ-পত্ৰ নিয়মীয়াকৰণৰ সংক্রান্তত ১ ফেব্ৰুৱাৰীৰ পৰা ৩১ মাৰ্চলৈকে এটা বিশেষ শিবিৰ আয়োজন কৰা হ'ব। এই শিবিৰত নিয়মীয়াকৰণৰ আৱেদনসমূহ ক্ষিপ্ৰতাৰে নিষ্পত্তিকৰণৰ ব্যৱস্থা গ্রহণ কৰা হ'ব। সংবাদমেলত তেওঁ লগতে কয় যে মিছন ফ্লাড ফ্রীৰ অধীনত পৰিষ্কাৰ কৰা হ'ব ভৰলু। 

গুৱাহাটীক স্বচ্ছ আৰু জাৱৰমুক্ত কৰাৰ লক্ষ্যৰে ২০২৪ চনৰ ১৪ ডিচেম্বৰৰ পৰা ৩ মহীয়াকৈ লোৱা হৈছে মিছন ফ্লাড ফ্রী কার্যসূচী। এই অভিযানৰ অধীনত ৭৪০কিল'মিটাৰ দৈর্ঘ্যপথ আৰু ৩৪০কিল'মিটাৰ দৈৰ্ঘ্যৰ নলা পৰিষ্কাৰ কৰা হৈছে। আনহাতে মুখ্যমন্ত্রী শৰ্মাৰ জন্মদিন উপলক্ষে গছপুলি ৰোপণ আৰু ৬টাকৈ স্থানত প্রীতি ভোজৰো আয়োজন কৰা হ'ব বুলি মেয়ৰজনে সংবাদমেলযোগে সদৰী কৰে।

Share This