অতীতক সুঁৱৰি নষ্টালজিক হৈ পৰিল মুখ্যমন্ত্ৰী ড° হিমন্ত বিশ্ব শৰ্মা

Rashmi March 31, 2025

ডিজিটেল ডেস্ক : অতীত মানেই এক পাহৰিব নোৱৰা স্মৃতি আৰু এই অতীতক ৰোমন্থন কৰি  নষ্টালজিক হৈ পৰিল ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মা ৷ ‘এক দুই তিনি চাৰি, যুটি দিলোঁ গৰু গাড়ী’– সুদীৰ্ঘ ৪২ বছৰৰ পাছত কপিলীৰ দলঙেৰে পুনৰ এবাৰ হাতীৰ পিঠিত উঠি ৰোমাঞ্চকৰ যাত্ৰা কৰিলে তাহানিৰ বোলছবিৰ সৰুমইনা তথা বৰ্তমানৰ মুখ্যমন্ত্ৰী ড° হিমন্ত বিশ্ব শৰ্মাই৷ 

নগাঁৱৰ কামপুৰত এখন দলং উদ্বোধন কৰাৰ পাছত অসমৰ মুখ্যমন্ত্ৰী ড° শৰ্মাই এখন অসমীয়া ছবিৰ কথা সুঁৱৰি স্মৃতিবোৰ পুনৰ সজীৱ কৰি তোলে । এদিনীয়া কাৰ্যসূচীৰে নগাঁও জিলা ভ্ৰমণ কৰি কামপুৰৰ কপিলী নৈৰ ওপৰত থকা তেওঁৰ শৈশৱৰ স্মৃতি বিজড়িত দলংখন নৱৰূপ প্ৰদানেৰে পদপথ দলং ৰূপে জনসাধাৰণৰ সেৱাত উৎসৰ্গা কৰে মুখ্যমন্ত্ৰী ড° হিমন্ত বিশ্ব শৰ্মাই। 

সামাজিক মাধ্যমত এটা প'ষ্টযোগে মুখ্যমন্ত্ৰীগৰাকীয়ে কপিলী নদীৰ ওপৰত নতুনকৈ নিৰ্মাণ কৰা দলংখন উদ্বোধন কৰি হাতীত উঠি আমোদ লোৱাৰ কথা সদৰী কৰে। ইয়াৰোপৰি মুখ্যমন্ত্ৰী ড° শৰ্মাই এই মুহূৰ্তটোক "ৰীল টু ৰিয়েল" বুলি অভিহিত কৰে । মুখ্যমন্ত্ৰীগৰাকীৰ অতীতৰ এই ৰোমাঞ্চকৰ যাত্ৰাই আপ্লুত কৰি তোলে সকলোকে।

Share This