হোলীৰ ৰঙৰ পৰা শৰীৰক কিদৰে সুৰক্ষা দিব?

Kakali Deka March 13, 2025

ডিজিটেল ডেস্কঃ আৰু মাত্ৰ কেইটামান মুহূৰ্তৰ অপেক্ষাৰ অন্তত হোলী আহি আমাৰ পদূলিমুখত উপস্থিত হওঁ হওঁ৷  এনে ক্ষেত্ৰত হোলী উদযাপন তথা হোলী খোলোতে কিছু নীতি-নিয়মৰ মাজেৰে, একেবাৰে নিকটাত্মীয়ৰ সৈতে, ওচৰ-চুবুৰীয়া বা ঘৰুৱাভাৱে এই× পৰম্পৰা ধৰি ৰখাৰ প্ৰয়াস কৰাৰ চেষ্টা কৰিব পাৰে৷

 অৱশ্যে হোলী উদ্‌যাপনৰ সময়ত আমাৰ ছাল, চুলিৰ কাৰণে ল’বলগীয়া কিছুমান সাৱধানতাৰ বিষয়ে চমুকৈ জনা খুবেই দৰকাৰ৷

হোলী খেলাৰ আগতে কি কৰিব
[১] ছানস্ক্ৰীন লগাবলৈ ভুলতো নাপাহৰিব– হোলী খেলোতে কেমিকেলযুক্ত ৰঙৰ বাবে ছালৰ যাতে কোনো ক্ষতি নহয়, তাৰ বাবে হোলী খেলাৰ আগতে ছানস্ক্ৰীন লগাব৷ নহ’লে ৰঙত থকা কেমিকেলৰ কাৰণে ছালৰ এলাৰ্জিৰ দৰে সমস্যাই দেখা দিব পাৰে৷

[২] ছানগ্লাছ, টুপী পিন্ধি লওক– হোলী খেলিবলৈ যাওঁতে আমি ছানগ্লাছ আৰু টুপী পৰিধান কৰিহে যাব লাগে৷ কিয়নো, ফাকুগুড়ি বা অন্য ৰাসায়নিক দ্ৰব্যই যাতে চকুযুৰিক স্পৰ্শ কবি নোৱাৰে৷ তাপ লগতে চুলিক ফাকুগুৰিৰ পৰা ৰক্ষা কৰিবলৈ টুপী পিন্ধাটো আৱশ্যক৷ ইয়াৰ উপৰি গোটেই গা ঢকাকৈ কাপোৰ পৰিধান কৰিহে আমি হোলী খেলিব লাগে৷ 

[৩] চুলিত নাৰিকলৰ তেল লগাওক– হোলী খেলাৰ সময়ত ছালৰ লগতে চুলিৰো যথেষ্ট ক্ষতি হ’ব পাৰে৷ ইয়াৰ ফলত চুলি ৰুক্ষ আৰু নিৰ্জীৱ হৈ পৰিব পাৰে৷ সেইবাবে হোলী খেলাৰ আগতে চুলিকোছাত ভালদৰে নাৰিকলৰ তেল লগাই লওক, যাতে হোলীৰ ৰঙে চলিৰ লাগি নধৰে আৰু লাগিলেও পিছলি যায়৷

[৪] ওঁঠত পেট্ৰলিয়াম জেল লগাওক– সাধাৰণতে হোলীৰ ৰঙৰ দাগ ওঁঠত লাগিছে সহজে নাযায়৷ ওঁঠৰ উপৰি শৰীৰৰ কোনো অংশতে কেমিকেলৰ দাগ লাগিলে যিমান ঘঁহিলেও সহজে নাযায়৷ লাগিলে গাৰ মাখিচালেই ছিঙি নাযাওক কিয়৷ এনেবোৰ দাগ গুচাবলৈ নানা চেষ্টা কৰিও বিফল হ’ব লগা হয়৷ যাৰ ফলত ছালখনৰো ক্ষতি হয়৷ এই ক্ষেত্ৰত হোলীৰ ৰঙৰ দাগ নালাগিবলৈ বিশেষকৈ ওঁঠ, হাত, গাৰ অংশত পেট্ৰলিয়াম জেল ঘঁহি লওক– হোলী খেলাৰ আগমুহূৰ্ততত৷ তেনে কৰিলে সগজে দাগ নালাগে৷

[৫] মহিলাসকলে নেইল পলিচ লগাওক– হোলী খেলোতে হোলীৰ ৰঙৰ কেমিকেলত দাগ নখৰ ভিতৰত সোমাই লাগি ধৰে৷ আৰু পাছলৈ নখবোৰ দেখিবলৈ কুৎচিৎ হয় লগতে এনে অৱস্থাত কিবা বস্তু খাওঁতে খোৱা খাদ্যৰ লগত কেমিকেল পেটলৈ সোমাই যায়৷ ইয়াৰ ফলত পেটৰ নানা উপসৰ্গই দেখা দিব পাৰে৷ খেলাীৰ আগতে নেইল পলিচ লগালে নখবোৰত কেমিকেল লাগি নধৰে৷ ফলত আমাৰ পেটৰো কোনো সমস্যা নহয়৷

হোলী খেলাৰ পাছত কিদৰে ৰং গুচাব

[১] তেলৰ সহায়ত ৰং পৰিষ্কাৰকৰণ– হোলী খেলাৰ পাছত ছাল আৰু চুলিৰ হোলীৰ ৰং কিদৰে গুচাব, সেই লৈ এটা দুশ্চিন্তা থাকে৷ কিন্তু আপুনি এনেধৰণৰ চিন্তাৰ কোনো কাৰণ নাই৷ ইয়াৰ বাবে আপুনি অলপ যত্ন ল’লে: সমস্যাটো সমাধানৰ বাট ওলাব৷ ৰং গুচাবলৈ ছালখন কেতিয়াও জোৰকৈ নঘঁহিব৷ বেছিকৈ ঘঁহিলে আপোনাৰ ছাল ছিঙি গৈ আন এটা সমস্যাৰহে সৃষ্টি কৰিব পাৰে৷ সেয়ে ইয়াৰ পৰিত্ৰাণৰ বাবে অলপ অলভ অইল বা জোজোবা তেল কটনত লগাই ৰং লগা ঠাইখিনিত লাহে লাহে ঘঁহি থাকক৷ অলপ সময়ৰ পাছতে দেখিব ৰংবোৰ ক্ৰমান্বয়ে যাবলৈ ধৰিছে৷
[২] চুলি কণ্ডিশ্যনিং কৰিবলৈ নাপাহৰিব – সাধাৰণতে আমি সকলোৱে হোলী খেলি আহি গা-মূৰৰ ধোৱাৰ লগতে চুলিও ছেম্পু কৰি লওঁ৷ দেখা যায় যে হোলী খেলি আহি বহুতেই চুলিত কণ্ডিশ্যনিং কৰাটো জৰুৰী বুলি নাভাবে৷ মনত ৰাখিব, হোলী খেলি উঠি চুলিকোছাত ছেম্পু কৰাৰ লগতে কণ্ডিশ্যনিং কৰাটো অত্যন্ত দৰকাৰী৷ কিয়নো চুলিৰ গুৰিত লাগি ধৰা ৰঙবোৰ একমাত্ৰ কণ্ডিশ্যনিং কৰাপ ফলতহে যাব, অন্যথা কেমিকেলযুক্ত ৰংবোৰ চুলিৰ গুৰিত লাগি থাকি আপোনাৰ চুলিৰ নানা সমস্যাৰ সৃষ্টি কৰিব পাৰে৷

[৩] ছালখন মইশ্বাৰাইজ কৰক– বিভিন্ন উপায় প্ৰয়োগ কৰি হোলীৰ ৰঙৰ দাগবোৰ যোৱাৰ পাছত ছালখন মইশ্বাৰাইজ কৰাটো খুবেই জৰুৰী৷ দাগবোৰ যোৱাৰ পাছতে ছালখন মইশ্বাৰাইজ কৰিব লাগে৷ মইশ্বাৰাইজ কৰিলে ছালখন ৰুক্ষ নহয় আৰু ছালখনত পুনৰ নৰম অৱস্থাপ্ৰাপ্ত হয়৷

Share This