হঠাৎ স্থগিত উচ্চতৰ মাধ্যমিক প্ৰথম বৰ্ষৰ গণিতৰ পৰীক্ষা

dainik janambhumi March 21, 2025

ডিজিটেল ডেস্ক : ৰাজ্যৰ শিক্ষা বিভাগত নোহোৱা-নোপোজা ঘটনা। উচ্চতৰ মাধ্যমিকৰ প্ৰথম বৰ্ষৰ গণিত বিষয়ৰ পৰীক্ষা স্থগিত ৰখা হৈছে। ২১ মার্চত, অর্থাৎ আজি এই পৰীক্ষা অনুষ্ঠিত হোৱাৰ কথা আছিল। কিন্তু অসম বিদ্যালয় শিক্ষা ব'র্ডে কালি এক জাননী যোগে এই পৰীক্ষা স্থগিত ৰখাৰ কথা ঘোষণা কৰে। পৰৱৰ্তী সময়ত পৰীক্ষাৰ দিন ঘোষণা কৰা হ'ব বুলিও ব'র্ডে প্রকাশ কৰিছে। 

ইফালে, বিৰোধী দল কংগ্ৰেছে উচ্চতৰ মাধ্যমিকৰ প্ৰথম বৰ্ষৰ অংকৰ পৰীক্ষা হঠাতে স্থগিত ৰখাক লৈ ৰাজ্য চৰকাৰক সমালোচনা কৰিছে। দলটোৰ মতে, বৰপেটা জিলাৰ নৱম শ্ৰেণীৰ পৰীক্ষাৰ প্ৰশ্নকাকতো আগতীয়াকৈ প্রকাশ হৈছে। ছাত্ৰ-ছাত্ৰীৰ ভৱিষ্যতক লৈ চৰকাৰে এই ধৰণৰ হেতালি খেলিছে কিয় বুলি প্রশ্ন তুলি অসম প্রদেশ কংগ্ৰেছৰ সভাপতি ভূপেন কুমাৰ বৰাই কয় যে চৰকাৰখনে ছাত্ৰ-ছাত্ৰীৰ বছৰটোৰ কষ্টক লৈ ল'ৰা-ধেমালি খেলা কার্য নিন্দনীয়ই নহয়, ই অক্ষমণীয় অপৰাধ। ছাত্ৰ-ছাত্ৰীৰ ভৱিষ্যতক লৈ বাৰে বাৰে এনেধৰণৰ হেতালি খেলি অহা কথাটোৱে ছাত্ৰ-ছাত্ৰীক মানসিকভাৱে হাৰাশাস্তি কৰাৰ অভিযোগ উত্থাপন কৰি বৰাই কয় যে মুখ্যমন্ত্ৰী হিমন্ত বিশ্ব শৰ্মাৰ আমোলত অসমৰ ছাত্ৰ-ছাত্ৰীৰ ভৱিষ্যৎ একেবাৰে সুৰক্ষিত নহয়, বাৰে বাৰে প্ৰশ্নকাকত আগতীয়াকৈ ফাদিল হৈছে। নিযুক্তি পৰীক্ষাৰ প্ৰশ্নকাকাতসমূহো আগতীয়াকৈ প্ৰকাশ হৈছে। এইখন চৰকাৰে বিদ্যায়তনিক পৰিৱেশ গঢ়াৰ পৰিৱৰ্তে এক হৈ-চৈ আৰু ৰং-ৰহইচৰ পৰিৱেশৰ মাজত শিক্ষাৰ মূল বিষয়কসমূহক পাতল কৰাৰ অভিযোগ আনিছে প্রদেশ কংগ্ৰেছৰ সভাপতিগৰাকীয়ে। 

শেহতীয়াকৈ মুখ্যমন্ত্ৰীয়ে মেট্ৰিক পৰীক্ষাৰ সমাজ বিজ্ঞান বিষয়ত ১০ নম্বৰকৈ বঢ়াই দিয়াৰ যি ঘোষণা কৰিছে সেয়াও বিজ্ঞানসন্মত নহয় বুলি বৰাই উল্লেখ কৰে। সমগ্র ঘটনাৰ বাবে নৈতিক দায়িত্ব স্বীকাৰ কৰি অসমৰ শিক্ষা মন্ত্ৰী ৰণোজ পেগুরে পদত্যাগ কৰা উচিত বুলিও প্রদেশ কংগ্রছৰ সভাপতিগৰাকীয়ে মন্তব্য কৰিছে।

Share This