ক্ষুদ্ৰ ঠিকাদাৰক ভাতে মৰাৰ চক্ৰান্ত 

dainik janambhumi March 23, 2025

ডিজিটেল ডেস্কঃ জনস্বাস্থ্য কাৰিকৰী বিভাগৰ অধীনৰ জলজীৱনৰ মিছনৰ কাম কৰা ঠিকাদাৰসকললৈ কেন্দ্ৰীয় চৰকাৰৰ তৰফৰ পৰা প্ৰায় এশ কোটি আগবঢ়োৱাত ছয়, সাত মাহ ধৰি ধন নোপোৱা ঠিকাদাৰসকলৰ মাজত আশাৰ সঞ্চাৰ হৈছিল। 

কিন্তু ঠিকাদাৰসকলৰ আশাত চেঁচাপানী ধালি বিভাগটোৰ যোৰহাট সংমণ্ডলৰ কার্যালয়ে এজন মাত্র ঠিকাদাৰকে যোৰহাটৰ বাবে আবণ্টিত ধনৰাশি প্ৰদান কৰাৰ খবৰে ক্ষুদ্র ঠিকাদাৰসকলৰ মাজত তীব্র অসন্তুষ্টিৰ সৃষ্টি হৈছে। জনস্বাস্থ্য কাৰিকৰী বিভাগৰ যোৰহাট ঠিকাদাৰ সন্থাৰ তৰফৰ পৰা জানিব পৰা মতে, যোৰহাট জিলাত জনস্বাস্থ্য কাৰিকৰী বিভাগৰ অধীনত জলজীৱন মিছনৰ প্ৰধান মন্ত্ৰীৰ সপোনৰ আঁচনিৰ হৰ ঘৰ নল, হৰ ঘৰ জল সফল ৰূপায়ণৰ বাবে ঠিকাদাৰসকলে গুৰুত্বপূৰ্ণ ভূমিকা গ্রহণ কৰিছে। 

যোৰহাটৰ ক্ষুদ্ৰ ঠিকাদাৰসকলে জলজীৱন মিছনৰ গ্ৰামাঞ্চলত পাইপ পোতাকে ধৰি বিভিন্ন কামত জনসাধাৰণক খোৱাপানী প্রদান কৰাৰ ব্যৱস্থা গ্রহণ কৰিছে। ঠিকাদাৰসকলে সাত, আঠ মাহ পর্যন্ত জলজীৱনৰ কাম কৰাৰ পাছতো আঁচনিৰ ধনৰাশি পোৱা নাছিল। কিন্তু কেন্দ্ৰৰ পৰা প্ৰায় এশ কোটি টকাৰ ধনৰাশি অহাৰ পাছত ৰাজ্যখনৰ ঠিকাদাৰসকলৰ লগতে যোৰহাটৰ জলজীৱন মিছনৰ কাম কৰা ঠিকাদাৰসকলেও মাহৰ পাছত মাহ বঞ্চিত হৈ থকা ধন লাভ কৰিব বুলি আশা কৰিছিল। কিন্তু আজি ঠিকাদাৰসকলে জানিব পাৰে যে যোৰহাটৰ সকলো ঠিকাদাৰে যোৰহাট সংমণ্ডললৈ অহা ১০.৯৭ কোটি টকাৰ প্ৰাপ্য নাপায়। যোৰহাটলৈ অহা এই ধনৰাশি মাত্ৰ এজন ঠিকাদাৰক দিবলৈহে নির্দেশ দিছে বুলি জানিব পাৰিছে। 

শনিবাৰে ঠিকাদাৰসকলে এই প্রতিবেদকক জনাই যে আগন্তুক বহাগ বিহুৰ পৰিপ্ৰেক্ষিতত প্রাপ্য ধনৰাশি লাভ কৰিব বুলি ভাবিছিল। লাখ লাখ টকা ঠিকাৰ কামত নিয়োজিত কৰাত ধনৰ অভাৱত ভুগিছে ক্ষুদ্র ঠিকাদাৰে। বহুজন ঠিকাদাৰে বেংকৰ পৰা ঋণ লৈ আৰু কোনোজনে সুতত ধাৰ লৈ সেই ধন ঠিকাৰ কামত খটুৱাইছে। এনেদৰে জলজীৱন মিছনৰ কাম কৰা ঠিকাদাৰসকলে মাহৰ পাছত মাহ ধৰি প্ৰাপ্যৰ পৰা বঞ্চিত হৈ আছে। 

ঠিকাদাৰসকলে জনোৱা অনুসৰি যোৰহাট সংমণ্ডলত যিগৰাকী ঠিকাদাৰকে সমুদায় ধন দিবলৈ নির্দেশ আহিছে সেইগৰাকীক প্ৰদান কৰাত আপত্তি নাই। কিন্তু আনসকল ঠিকাদাৰৰ অনাদায় হৈ থকা প্ৰাপ্য ধনৰাশিও প্ৰদান কৰক। কাৰণ ক্ষুদ্ৰ ঠিকাদাৰসকলৰ অনাদায় হৈ থকা ধনৰাশিৰ বাবে সমস্যাৰ সৃষ্টি হৈছে। সেয়েহে ঠিকাদাৰসকলৰ প্ৰাপ্য প্ৰদান কৰিবলৈ আহ্বান জনাইছে। এইক্ষেত্রত জনস্বাস্থ্য কাৰিকৰী বিভাগৰ মন্ত্ৰী জয়ন্ত মল্ল বৰুৱাক যোৰহাটৰ সকলো ঠিকাদাৰৰ মাজতে ধনৰাশি বিলাই দিবলৈ নিৰ্দেশ দিবলৈ ঠিকাদাৰসকলে আহ্বান জনাইছে।

Share This