পূৰ্বৰ সকলো অভিলেখ ভংগ, কাজিৰঙাত পাঁচ মাহত আঢ়ৈ লাখ পৰ্যটক

dainik janambhumi March 03, 2025

ডিজিটেল ডেস্ক: এই বর্ষত অর্থাৎ ২০২৪-২৫ পৰ্যটন বৰ্ষত কাজিৰঙা ৰাষ্ট্ৰীয় উদ্যান তথা ব্যাঘ্র সংৰক্ষিত বনাঞ্চললৈ আগৰ সকলো ৰেকৰ্ড ভংগ কৰি দেশ-বিদেশৰ পৰ্যটকৰ আগমনে এক নতুন অভিলেখ সৃষ্টি কৰিছে। প্ৰধানকৈ অতি কম দিনৰ ব্যৱধানত দেশৰ দুগৰাকীকৈ ৰাষ্ট্ৰপতিয়ে বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যান দৰ্শন কৰি যোৱাৰ পাছতেই দেশৰ জনপ্ৰিয় প্ৰধানমন্ত্ৰী নৰেন্দ্ৰ মোদীয়ে কাজিৰঙাত নিশাটো কটাই ৰাষ্ট্ৰীয় উদ্যান ভ্ৰমণ কৰি নিজে কাজিৰঙা ৰাষ্ট্ৰীয় উদ্যানৰ বন্যপ্রাণী, জৈৱ-বৈচিত্র্য, মনোমোহা প্রাকৃতিক সৌন্দর্য, অসমীয়া আতিথ্য আদিৰ কথা প্ৰচাৰ কৰাৰ পাছত একপ্ৰকাৰ কাজিৰঙালৈ দেশ-বিদেশৰ পৰ্যটকৰ সোঁত ব'বলৈ আৰম্ভ কৰিছে। 

বিভাগীয় এক তথ্যৰ পৰা জানিব পৰা মতে বিগত পাঁচ মাহত কাজিৰঙা ৰাষ্ট্ৰীয় উদ্যান দর্শন কৰিলে আঢ়ৈ লক্ষাধিক পৰ্যটকে। বিপৰীতে ৰাজহ সংগ্ৰহ হ'ল ৬ কোটি ৮৪ লাখ টকা। কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ তৰফৰ পৰা সদৰী কৰা হৈছে এই তথ্য। সেই অনুসৰি কাজিৰঙা ৰাষ্ট্ৰীয় উদ্যানৰ সঞ্চালকে জানিবলৈ দিয়া মতে, ২০২৪ বৰ্ষৰ অক্টোবৰ মাহত উদ্যান দর্শনার্থীৰ বাবে মুকলি কৰাৰ পাছতে অক্টোবৰত ৫৯৩জন বিদেশী আৰু ২৮,৯৮৬জন দেশী পর্যটকসহ মুঠ ২৯,৫৭৯, নৱেম্বৰত ২,৮৬৯ বিদেশী আৰু ৪৯,১৫২জন দেশী পর্যটকসহ ৫২,০২১, ডিচেম্বৰত ২,০৪৮জন বিদেশী, ৭৮,০৫৭জন দেশী পর্যটকসহ মুঠ ৮০,১০৫জন, জানুৱাৰীত ২,০০৬জন বিদেশী আৰু ৬২,৮৩৮জন দেশী পর্যটকসহ মুঠ ৬৪,৮৪৪জন আৰু ফেব্ৰুৱাৰী মাহত ২,১৯৫জন বিদেশী পর্যটক আৰু ৩১,১৪৮জন দেশী পর্যটকসহ মুঠ ৩৩,৩৪৩ পৰ্যটকৰ কাজিৰঙা ৰাষ্ট্ৰীয় উদ্যানলৈ আগমন ঘটে। অর্থাৎ, বিগত ৫ মাহত ৯,৭১১গৰাকী বিদেশী পর্যটক আৰু ২,৫০,১৮১জন দেশী পর্যটকসহ মুঠ ২,৫৯,৮৯২জন পর্যটকে কাজিৰঙা ৰাষ্ট্ৰীয় উদ্যান দৰ্শন কৰে। যাৰ বাবে অক্টোবৰ মাহত ৬৫,৪৭,৮১৫ টকা, নৱেম্বৰত ১,৪৮,০৩,৭৫৩ টকা, ডিচেম্বৰত ২,০৫,৮০,৭৭২ টকা, জানুৱাৰীত ১,৬১,৪৩,০১১ টকা আৰু ফেব্ৰুৱাৰী মাহত ১,০৩,২৯,৩৪২ টকাসহ বিগত পাঁচ মাহত ৬,৮৪,০৪,৬৯৩ টকা ৰাজহ সংগ্ৰহ কৰে কাজিৰঙা ৰাষ্ট্ৰীয় উদ্যান কর্তৃপক্ষই। 

উল্লেখযোগ্য যে লকডাউনৰ কঠিন সময়ৰ পৰা ক্ৰমান্বয়ে ঠন ধৰি উঠা কাজিৰঙা ৰাষ্ট্ৰীয় উদ্যানত বিগত দুটা বৰ্ষৰ লগতে চলিত বর্ষতো উৎসাহিত ৰূপত বৃদ্ধি পাইছে পৰ্যটকৰ সংখ্যা। বিশেষকৈ এটা খর্গ থকা গঁড়, বনৰীয়া হাতী, দুষ্প্রাপ্য দল হৰিণা, ম'হৰ লগতে ঢেঁকীয়াপতীয়া বাঘৰ সুলভ বিচৰণৰ দৃশ্যই পৰ্যটকক আকৰ্ষণ কৰিছে কাজিৰঙালৈ। শেহতীয়াকৈ গুৱাহাটীত অনুষ্ঠিত হোৱা এডভাণ্টেজ আছাম ২.০-ত অংশগ্ৰহণ কৰিবলৈ অহা দেশৰ বৈদেশিক মন্ত্ৰীৰ নেতৃত্বত প্রায় ৫০খন দেশৰ ৰাষ্ট্ৰদূতে কাজিৰঙা ৰাষ্ট্ৰীয় উদ্যান দৰ্শন কৰাত বিশেষকৈ বিশ্বৰ পৰ্যটন মানচিত্ৰত আন এক গুৰুত্ব লাভ কৰিবলৈ সক্ষম হৈছে।

Share This