হলেণ্ডৰ পৰা মাজুলীত উপস্থিত উচ্চ শিক্ষিত ডিনা

Dainik janambhumi February 10, 2025

ডিজিটেল ডেস্ক: তেওঁক ভাল পাবলৈ এটা বিশেষ দিনৰ প্ৰয়োজন নাই, তেওঁ কাষত থাকিলে প্রতিটো পল জীপাল হৈ উঠে, তেওঁ কাষত থাকিলে চৌপাশ যেন উজলি উঠে। যাৰ অবিহনে হয়তো সকলোৱেই অস্তিত্বশূন্য। তেওঁ হৈছে 'মা'। সেই 'মা' নামৰ জীৱনসত্তাক প্ৰতিপল বুকুত কঢ়িয়াই হাহাকাৰ কৰি ফুৰিছে হলেণ্ডৰ উচ্চশিক্ষিতা যুৱতী ডিনা। শুনিলেই চিনেমা চিনেমা লগা কাহিনীৰ দৰেই ডিনাৰ জীৱন কাহিনী। 

এসময়ত চিকিৎসালয়তে জন্মদাত্রী মাতৃয়ে এৰি যোৱা এই যুৱতীগৰাকীয়ে এতিয়া অসমৰ ইমূৰৰপৰা সিমূৰলৈ সন্ধান কৰি হাহাকাৰ লগাইছে নিজৰ জন্মদাত্রী মাতৃক। এবাৰ 'মা' বুলি মাতি সাবটি ধৰিবলৈ ব্যাকুল হৈ পৰা হলেণ্ডৰ যুৱতী ডিনা আহি মাজুলীত উপস্থিত হয়। তোলনীয়া পিতৃৰ সৈতে অসমলৈ জন্মদাত্রী মাতৃৰ সন্ধানত অহা ডিনাই মাজুলীত আহি সাংবাদিকৰে মুখামুখি হৈ ব্যক্ত কৰা কৰুণ জীৱন কাহিনীয়ে এতিয়া খুবেই চর্চা লাভ কৰিছে। নিজৰ জীৱন সম্পর্কে ডিনাই কয় যে তেওঁৰ জন্ম হৈছিল অসমৰ ডিব্ৰুগড়ত। পুৰণি ভাৰতীয় পাছপৰ্টখনত যুৱতীগৰাকীৰ জন্ম ৪-৮-১৯৯১ আৰু জন্মস্থান অসম বুলি উল্লেখ আছে। চৌত্ৰিছ বছৰীয়া যুৱতীগৰাকীৰ এতিয়া একমাত্র লক্ষ্য হৈছে শিপাৰ সন্ধান কৰা। 

জন্মদাত্রী মাতৃক বিচাৰি হলেণ্ডৰ পৰা উভতি আহি উজনি অসমৰ এগৰাকী দোভাষীক লৈ পিতৃসহ ডিনা মাজুলীৰ চামগুৰি সত্ৰত উপস্থিত হৈ সাংবাদিকক উক্ত কথা ব্যক্ত কৰি সহযোগিতা বিচাৰে। ইফালে ডিনা আৰু তেওঁৰ তোলনীয়া পিতৃয়ে আৰু জনোৱা মতে, কেঁচুৱা অৱস্থাতে মাকে এৰি থৈ যোৱা ডিনাক দিল্লীৰ এখন অনাথ আশ্রমে গ্রহণ কৰিছিল আৰু পাঁচ বছৰ বয়সত উক্ত তোলনীয়া পিতৃয়ে পিতৃত্বৰ মৰমেৰে তাইক হলেণ্ডলৈ লৈ গৈছিল। মুঠতে ডিনাৰ এই মুহূৰ্তত জীৱনৰ প্ৰধান লক্ষ্য হ'ল মাতৃক বিচাৰি উলিওৱা। পিতৃত্বৰ মৰমেৰে তুলি-তালি ডাঙৰ-দীঘল কৰা ডিনাৰ তোলনীয়া পিতৃয়েও বিচাৰিছে কন্যাৰ উক্ত আশা যেন পূৰণ হওক। আনহাতে, ডিব্ৰুগড়ৰ যিখন নাৰ্ছিংহ 'মত ডিনা জন্ম হোৱা বুলি ঠাৱৰ কৰা হৈছে, উক্ত চিকিৎসালয়ত সন্তান জন্মৰ তথ্য বিচৰা হৈছিল যদিও সেই নাৰ্ছিংহ 'মখনতো ইমান পুৰণি তথ্য মজুত নাই বুলি জানিবলৈ দিয়ে। এই হ'লেও সাত সাগৰ তেৰ নদীৰ সিপাৰৰ পৰা মাতৃত্বৰ মমতা বিচাৰি অহা ডিনাৰ আশা যেন পূৰণ হওক, তাকেই ৰাইজেও কামনা কৰিছে।

Share This