মাৰ্ঘেৰিটাত টালি-টোপোলা বান্ধিছে অবৈধ বেদখলকাৰীয়ে

Rashmi August 11, 2025

ডিজিটেল ডেস্কঃ উজনিত অব্যাহত আছে সন্দেহযুক্ত নাগৰিক খেদা অভিযান। সন্দেহযুক্ত নাগৰিকৰ উচ্ছেদক লৈ সক্ৰিয় হৈ পৰিছে বিভিন্ন দল-সংগঠন। 

আজি মাৰ্ঘেৰিটা সমজিলাৰ লিডুৰ মোলাং অঞ্চলৰ পৰা টালি-টোপোলা বান্ধি ঘৰমুৱা হৈছে বহু অবৈধ বেদখলকাৰী । চৰকাৰী ভূমি বেদখল কৰি বছৰ বছৰ ধৰি বসবাস কৰা বহু সন্দেহযুক্ত নাগৰিকে আজি টালি-টোপোলা বান্ধি সাজু হৈছে মাৰ্ঘেৰিটা তথা উজনি অসম এৰিবলৈ । 

কিছুদিন পূৰ্বে অসম জাতীয়তাবাদী যুৱ-ছাত্ৰ পৰিষদে মাৰ্ঘেৰিটা আৰু লিডুৰ দাঁতি-কাষৰীয়া অঞ্চলত বসবাস কৰা সন্দেহযুক্ত বিদেশী নাগৰিকক উজনি অসম ত্যাগ কৰিবলৈ দাবী জনাইছিল। ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্যস্ত কৰিছিল। লগতে প্ৰাক্তন আলফা নেতা জিতেন দত্তই মাৰ্ঘেৰিটাত উপস্থিত হৈ ১৫ আগষ্টৰ পূৰ্বে সন্দেহযুক্ত অবৈধ বেদখলকাৰীক উজনি অসম ত্যাগ কৰিবলৈ সকীয়াই দিছিল। 

তাৰ পাছতেই এতিয়া মাৰ্ঘেৰিটা ত্যাগ কৰিছে এইসকল সন্দেহযুক্ত নাগৰিকে। একাংশই ইতিমধ্যে কম মূল্যতে পশুধন বিক্ৰী কৰি সাজু হৈছে যাবলৈ ।আতংকত পৰি বহু লোকে ৩০-৪০ হাজাৰ টকাৰ জাৰ্চি গৰু ১০-১৫ হাজাৰ টকাতে বিক্ৰী কৰা বুলি জানিব পৰা গৈছে । এক কথাত দলীয় সংগঠনৰ  হুংকাৰত এতিয়া উজনি অসমত পথভ্ৰস্ত হৈ পৰিছে সন্দেহজনক নাগৰিক। 

উল্লেখযোগ্য যে ১৫  আগষ্টৰ পাছত প্ৰাক্তন আলফা নেতা জিতেন দত্তই পুনৰ অভিযান চলাব বুলি মন্তব্য কৰিছিল।


উৎস : প্ৰাগ নিউজ ডিজিটেল

Share This