যান-বাহন আৰক্ষীত ৰুজু হোৱা গোচৰত গ্ৰেপ্তাৰ নন্দিনী কাশ্যপ

Rashmi July 30, 2025

ডিজিটেল ডেস্কঃ অৱশেষত গ্ৰেপ্তাৰ হ'ল অভিনেত্ৰী নন্দিনী কাশ্যপ। নন্দিনীৰ গাড়ীৰ তীব্ৰ গতিত চিৰদিনলৈ প্ৰাণ হেৰুৱালে চফল ডেকা ছামিউল হকে। জীৱনৰ মাত্ৰ ২১টা বসন্ত গৰকিছিলেহে ছামিউলে। ইঞ্জিনীয়াৰ হোৱাৰ প্ৰবল হেঁপাহ আছিল যুৱকজনৰ। ঘৰখনেও ছামিউলক লৈ দেখিছিল অলেখ সপোন। কিন্তু সকলো থানবান কৰি দিলে নন্দিনীয়ে। তীব্ৰ গতিৰে গাড়ী চলাই আহি অভিনেত্ৰীগৰাকীয়ে প্ৰাণ ল'লে ছামিউলৰ। 

নন্দিনী কাশ্যপৰ বিৰুদ্ধে ছ'চিয়েল মিডিয়াত সকলোৱে উজাৰিলে ক্ষোভ, কাৰণ দুৰ্ঘটনাত পতিত হোৱা ছামিউলৰ প্ৰতি সামান্যতমো মানৱীয়তা দেখুওৱা নাছিল নন্দিনীয়ে। 

ছামিউলে মৃত্যুক সাবটি লোৱাৰ পাছতে যান-বাহন আৰক্ষীত ৰুজু হোৱা গোচৰত গ্ৰেপ্তাৰ কৰা হয় অভিনেত্ৰীগৰাকীক।

কালি নিশা হোৱাৰ বাবে আটক কৰি পাণবজাৰ মহিলা থানাত ৰখা হৈছিল নন্দিনীক। বুধবাৰে পুৱাৰ ভাগতে গ্ৰেপ্তাৰ কৰা হয় অভিনেত্ৰীগৰাকীক, যিহেতু সূৰ্য অস্ত যোৱাৰ পিছত মহিলাক গ্ৰেপ্তাৰ কৰিবলৈ সেই থানাৰ অন্তৰ্গত judicial magistrateৰ অনুমতি লাগে।

পাণবজাৰ মহিলা থানাতে জেৰা কৰা হ'ব অভিনেত্ৰীগৰাকীক। অৱশ্যে বৰ্তমানো গোচৰটোত সংযোজিত ধাৰাৰ কথা অৱগত কৰা নাই আৰক্ষীয়ে।

উৎস : প্ৰাগ নিউজ ডিজিটেল

Share This