ব্যক্তিগত খণ্ডৰ বিদ্যালয়ত এতিয়াৰে পৰা নাথাকে একাদশ শ্ৰেণীৰ পৰীক্ষা কেন্দ্র

dainik janambhumi March 27, 2025

ডিজিটেল ডেস্ক : নৱগঠিত অসম ৰাজ্যিক বিদ্যালয় শিক্ষা পৰিষদে ৰাষ্ট্ৰীয় শিক্ষানীতিৰ আধাৰত প্ৰথমবাৰৰ বাবে ৰাজ্যত অনুষ্ঠিত কৰা একাদশ শ্ৰেণীৰ পৰীক্ষাৰ একাধিক বিষয়ৰ প্ৰশ্নকাকত ফাদিল হোৱাৰ পাছতে পৰীক্ষা বাতিল কৰাৰ পাছত এইবাৰ ব্যক্তিগত খণ্ডৰ শিক্ষানুষ্ঠানৰ বিৰুদ্ধে কঠোৰ পদক্ষেপ গ্ৰহণ কৰিছে। অসম ৰাজ্যিক বিদ্যালয় শিক্ষা পৰিষদে বুধবাৰে এক নির্দেশনাযোগে এতিয়াৰ পৰা একাদশ শ্ৰেণীৰ পৰীক্ষাও মেট্ৰিক আৰু উচ্চতৰ মাধ্যমিক শিক্ষান্ত পৰীক্ষাৰ দৰেই কঠোৰ ব্যৱস্থাৰ মাজেৰে অনুষ্ঠিত কৰাৰ কথা ঘোষণা কৰে। 

মেট্ৰিক আৰু উচ্চতৰ মাধ্যমিক চূড়ান্ত পৰীক্ষাৰ দৰে এতিয়াৰ পৰা কোনো ব্যক্তিগত খণ্ডৰ শিক্ষানুষ্ঠানত একাদশ শ্ৰেণীৰ পৰীক্ষাৰ কেন্দ্ৰ নাথাকিব। আনহাতে এতিয়াৰ পৰা একাদশ শ্ৰেণীৰ পৰীক্ষাৰ প্ৰশ্নকাকতো মেট্রিক আৰু উচ্চতৰ মাধ্যমিকৰ দৰে স্থানীয় আৰক্ষীৰ জিম্মাত কটকটীয়া নিৰাপত্তা ব্যৱস্থাৰ মাজত ৰখা হ'ব। উল্লেখযোগ্য যে শেহতীয়াকৈ উচ্চতৰ মাধ্যমিকৰ প্ৰথম বৰ্ষৰ পৰীক্ষাৰ প্ৰশ্নকাকত ফাদিল হোৱাৰ পাছতে পৰীক্ষা প্ৰক্ৰিয়াৰ গোপনীয়তা নিশ্চিত কৰাৰ বাবে কঠোৰ নিৰাপত্তা ব্যৱস্থা গ্রহণৰ কথা বুধবাৰে অসম ৰাজ্যিক বিদ্যালয় শিক্ষা পৰিষদে ঘোষণা কৰে। যোৱা ২৪ মাৰ্চত পৰিষদৰ উচ্চ পৰ্যায়ৰ বৈঠকত গ্রহণ কৰা সিদ্ধান্ত অনুসৰি এতিয়াৰ পৰা মেট্ৰিক আৰু উচ্চতৰ মাধ্যমিক চূড়ান্ত পৰীক্ষাৰ দৰেই কঠোৰ ব্যৱস্থা গ্রহণ কৰা হ'ব একাদশ শ্ৰেণীৰ ক্ষেত্ৰতো। 

প্রণিধানযোগ্য যে ৰাষ্ট্ৰীয় শিক্ষানীতিৰ আধাৰত এইবাৰ অসমত আয়োজিত একাদশ শ্ৰেণীৰ পৰীক্ষাৰ প্ৰশ্নকাকত নির্দিষ্ট পৰীক্ষা কেন্দ্ৰ থকা বিদ্যালয়তে ৰখাৰ ব্যৱস্থা কৰা হৈছিল। কিন্তু একাধিক বিষয়ৰ প্ৰশ্নকাকত ফাদিল হৈ পৰাত পৰীক্ষা কেন্দ্ৰৰ গোপনীয়তা ভংগ হৈ পৰে। তাৰ পাছতে বুধবাৰে পৰিষদে ৰাজ্যৰ সকলো বিদ্যালয় পৰিদৰ্শক আৰু সকলো লীড কলেজৰ অধ্যক্ষলৈ এক জাননী প্ৰেৰণ কৰি এতিয়াৰ পৰা একাদশ শ্ৰেণীৰ পৰীক্ষাৰ কেন্দ্ৰ কোনো ব্যক্তিগত খণ্ডৰ শিক্ষানুষ্ঠানত অনুষ্ঠিত নকৰাৰ কথা ঘোষণা কৰে। মেট্ৰিক আৰু উচ্চতৰ মাধ্যমিক চূড়ান্ত পৰীক্ষাৰ দৰেই এই পৰীক্ষাৰো কেন্দ্ৰসমূহ চৰকাৰী আৰু প্ৰাদেশীকৃত শিক্ষানুষ্ঠানত থাকিব। বিদ্যালয় পৰিদৰ্শকসকলক এই পৰীক্ষা কেন্দ্ৰসমূহ স্থানীয় আৰক্ষী থানা বা চকীৰ যিমান পাৰে সমীপত হোৱা বিষয়ত গুৰুত্ব আৰোপ কৰাৰ নিৰ্দেশো দিয়া হৈছে। আনহাতে কেৱল একাদশ আৰু দ্বাদশ শ্রেণী থকা ছিনিয়ৰ ছেকেণ্ডাৰী স্কুলকো পৰীক্ষা কেন্দ্ৰৰ বাবে বিবেচনা নকৰিবলৈ নিৰ্দেশ দিয়া হৈছে। পৰীক্ষা কেন্দ্ৰৰ সৈতে সংলগ্ন কৰা বিদ্যালয়সমূহ যিমান পৰা যায় ওচৰত হোৱাৰ ক্ষেত্ৰত গুৰুত্ব দিবলৈ নির্দেশ দিয়া হৈছে। ইয়াৰ উপৰি প্ৰশ্নকাকতসমূহো স্থানীয় আৰক্ষী থানা বা চকীত ছীল অৱস্থাত সুৰক্ষিতভাৱে ৰখা হ'ব। পৰীক্ষাৰ পূৰ্বে পৰীক্ষা কেন্দ্ৰৰ নির্দিষ্ট দায়িত্বত থকা লোকে থানাৰ পৰা প্ৰশ্নকাকত সংগ্ৰহ কৰিব লাগিব। প্রণিধানযোগ্য যে এইবাৰ পৰীক্ষাৰ এদিন পূৰ্বে প্রট'কল উলংঘা কৰি প্ৰশ্নকাকত ফাদিল কৰাৰ অভিযোগত ১৫খন ব্যক্তিগত বিদ্যালয়ৰ বিৰুদ্ধে অনুশাসনমূলক ব্যৱস্থা গ্রহণ কৰি স্বীকৃতি বাতিল কৰা হয়। লগতে সেই বিদ্যালয়ৰ বিৰুদ্ধে চি আই ডিত গোচৰ তৰা হৈছে। তদুপৰি ২৪ মাৰ্চৰ পৰা ২৯ মাৰ্চলৈ নিৰ্ধাৰিত সকলো বিষয়ৰ পৰীক্ষা বাতিল কৰা হয়।

Share This