মাত্ৰ এটা দমকলেই গাঁওবাসীৰ ভৰসা

dainik janambhumi February 17, 2025

ডিজিটেল ডেস্ক: দেশৰ সমান্তৰালকৈ ৰাজ্যৰ প্ৰতিটো পৰিয়ালক দৈনিক পর্যাপ্ত পৰিমাণে বিশুদ্ধ খোৱাপানী যোগান ধৰাৰ লক্ষ্যৰে কোটি কোটি টকা ব্যয় কৰি জলজীৱন মিছনৰ অধীনত প্ৰতিটো চুবাতে নিৰ্মাণ কৰা হৈছে জলজীৱনৰ পানী যোগান আঁচনি। চৰকাৰে জনস্বাস্থ্য কাৰিকৰী বিভাগৰ অধীনত শ শ কোটি টকা ব্যয় কৰি ৰাজ্যবাসীক খোৱাপানী যোগান ধৰাৰ ব্যৱস্থা কৰাৰ সময়তে কামৰূপ জিলাৰ বকো-ছয়গাঁও সমষ্টিৰ অন্তৰ্গত নগৰবেৰাৰ পাহাৰপাৰা গাঁওৰ প্রায় ১৭০টা পৰিয়ালে বছৰ বছৰ ধৰি খোৱাপানীৰ বাবে হাহাকাৰ কৰিবলগীয়া হৈছে। 

গাঁওবাসীয়ে জনোৱা মতে, গাঁওখনত থকা একমাত্র ক্ষুদ্র পানী যোগান আঁচনিৰ জৰিয়তে খোৱাপানী যোগান ধৰা হয় যদিও এয়া এপাচি শাকত এটা জালুক সদৃশহে। গাঁওখনৰ বৃহৎসংখ্যক পৰিয়ালক এই আঁচনিৰ জৰিয়তে পর্যাপ্ত পানী যোগান ধৰিবলৈ সক্ষম হোৱা নাই। এনে পৰিস্থিতিত গাঁওবাসীয়ে বছৰটোৰ বেছিভাগ সময়তে খোৱাপানীৰ সংকটত ভুগিবলগীয়া হয়। একাংশ লোকে ব্যক্ত কৰা মতে, নগৰবেৰা পাহাৰ সংলগ্ন ৰজাদিনীয়া ঐতিহাসিক গাঁওখনৰ ভু-গৰ্ভত অত্যধিক শিল থকা বাবেই গাঁওখনত বসবাস কৰা পৰিয়ালসমূহে পুতিব পৰা নাই দমকল অথবা পানীতোলা মটৰ। বর্ষাকালত গাঁওখনৰ প্ৰতিটো পৰিয়ালত থকা কুঁৱাৰ পানীৰে অভাৱ পূৰণ কৰিলেও খৰালি কুঁৱাসমূহতো পানীৰ পৰিমাণ ব্যাপকভাৱে হ্রাস পোৱাত জলসংকটত পৰে গাঁওবাসী। বিশেষকৈ ডিচেম্বৰৰ পৰা এপ্রিল মাহলৈ অৰ্থাৎ প্ৰচুৰ পৰিমাণে বৰষুণ নপৰালৈকে খোৱাপানীৰ বাবে হাহাকাৰ কৰিবলগীয়া হয় পাহাৰপাৰা গাঁওৰ প্ৰায় ১৭০টা পৰিয়ালে। একাংশ পৰিয়ালে ওচৰে-পাজৰে থকা পুখুৰী, খাদৰ পৰা মটৰ ব্যৱহাৰ কৰি সেই পানী কুঁৱাত জমা কৰি বাচন-বৰ্তন, কাপোৰ-কানি ধোৱাত ব্যৱহাৰ কৰে। ইপিনে ন্যূনতম খোৱাপানীৰ সংকট মোচনৰ বাবে গাঁওবাসীয়ে এটা দমকলৰ ওপৰতে নিৰ্ভৰ কৰে। গাঁওখনৰ দক্ষিণ প্ৰান্তৰ জলজলি নদীৰ কাষত বহুৱাই লোৱা এটা দমকলৰ পৰাই দৈনিক প্রয়োজনীয় খোৱাপানী সংগ্ৰহ কৰে প্ৰতিটো পৰিয়ালে। 

গাঁওৰ প্ৰতিটো পৰিয়ালৰ পুৰুষ-মহিলাসকলে বাল্টি, কলহ আদি ঠেলাত তুলি সেই দমকলৰ পৰা খোৱাপানী সংগ্ৰহ কৰি কোনোমতে চলিবলগীয়া হৈছে। ভাৰতবৰ্ষৰ অন্যান্য খৰাংপীড়িত ৰাজ্যসমূহৰ দৰেই ব্যাপক জলসংকটত ভুগিছে নগৰবেৰাৰ পাহাৰপাৰা গাঁওবাসীয়ে। চৰকাৰৰ অৱহেলাৰ বাবেই ৰজাদিনীয়া গাঁওখনৰ ১৭০টা পৰিয়ালে খোৱাপানীৰ সংকটত ভুগিবলগীয়া হৈছে বুলি ক্ষোভ ব্যক্ত কৰিছে একাংশ লোকে। শীঘ্ৰে গাঁওখনত বৃহৎ পানী যোগান আঁচনি ৰূপায়ণ কৰি পৰ্যাপ্ত খোৱাপানী যোগানৰ ব্যৱস্থা কৰিবলৈ ৰাজ্যৰ মুখ্যমন্ত্ৰী হিমন্ত বিশ্ব শর্মাক দাবী জনাইছে গাওঁবাসীয়ে।

Share This