খাদী আৰু গ্ৰামোদ্যোগ বʼৰ্ডৰ প্ৰস্তুতি তুংগত, ২০ লাখ টকা মূল্যৰ পতাকা বিক্ৰীৰ লক্ষ্য

Dainik janambhumi January 24, 2025

ডিজিটেল ডেস্কঃ আগন্তুক গণৰাজ্য দিৱসৰ প্রাকক্ষণত অত্যধিক ব্যস্ত হৈ পৰিছে অসম খাদী আৰু গ্রামোদ্যোগ ব'র্ড। ইতিমধ্যে অসম খাদী আৰু গ্রামোদ্যোগ ব'ৰ্ডত ১১গৰাকী শিপিনীয়ে অধিকসংখ্যক পতাকা প্ৰস্তুতিৰ কাম সম্পূৰ্ণ কৰি তুলিছে। আনহাতে, বজাৰত পতাকাৰ চাহিদা মজুত ৰাখিবলৈ প্রয়োজনীয় হোৱা পতাকা প্রস্তুতৰ কাম পূর্ণগতিত অব্যাহত ৰাখিছে।

৭৬সংখ্যক গণৰাজ্য দিৱসৰ বাবে এইবাৰ অসম খাদী আৰু গ্রামোদ্যোগ ব'র্ডে প্রায় ৫,০০০খনৰো অধিক খাদী পতাকা প্রস্তুত কৰি প্ৰায় ২০ লাখ টকাৰ পতাকা বিক্ৰীৰ পৰিকল্পনা কৰিছে। গুৱাহাটীৰ চানমাৰিৰ অসম খাদী আৰু গ্রামোদ্যোগ ব'ৰ্ডৰ মার্কেটিং বিভাগৰ বিষয়াই জনোৱা অনুসৰি, বিভিন্ন আকাৰৰ খাদী পতাকা অসমৰ বিক্ৰী কেন্দ্ৰসমূহলৈ প্ৰেৰণ কৰা হৈছে।

ইতিমধ্যে প্ৰেৰণ কৰা পতাকাসমূহৰ মূল্য ১৫ লাখ টকাৰো অধিক হ'ব। তদুপৰি ৰাজ্য চৰকাৰৰ আহ্বানমর্মে অসম সচিবালয়, জিলা আয়ুক্তৰ কাৰ্যালয়, সমজিলা আয়ুক্তৰ কাৰ্যালয় আৰু অসম বেচা-কিনা নিগমকে ধৰি বিভিন্ন চৰকাৰী কার্যালয়লৈ প্রায় ২ লাখ ৫০ হাজাৰ টকাৰ খাদী পতাকা প্ৰেৰণ কৰা হৈছে। উল্লেখযোগ্য যে খাদী ব'র্ডে নির্মাণ কৰি উলিওৱা পতাকাসমূহৰ আকাৰ অনুসৰি মূল্য ক্রমে- ৬ ফুট দীঘল, ৪ ফুট বহলৰ মূল্য ৭৭০ টকা, ৪ ফুট দীঘল, ৩ ফুট বহলৰ মূল্য ৫৮০ টকা, ৩ ফুট দীঘল আৰু ২ ফুট বহল পতাকাৰ মূল্য ৩৩০ টকা, ২ ফুট ৩ ইঞ্চি দীঘল আৰু ডেৰ ফুট বহল পতাকাৰ মূল্য ২০০ টকা, ডেৰ ফুট দীঘল ১ ফুট বহল পতাকাৰ মূল্য ১৫০ টকা আৰু ৯ ইঞ্চি দীঘল, ৬ ইঞ্চি বহল পতাকাৰ মূল্য ১০০ টকা নিৰ্ধাৰণ কৰা হৈছে।

আনহাতে, ১২ ফুট দীঘল আৰু ৯ ফুট বহল এখন পতাকাৰ দাম ৪,৭০০ টকা হ'ব। বিশেষকৈ ২ ফুট ৩ ইঞ্চি দীঘল, ডেৰ ফুট বহল; ডেৰ ফুট দীঘল ১ ফুট বহল আৰু ৯ ইঞ্চি দীঘল, ৬ ইঞ্চি বহল পতাকাৰ চাহিদা বজাৰত অধিক বৃদ্ধি হয়। উল্লেখযোগ্য যে প্রত্যেক বছৰে খাদী ব'ৰ্ডৰ পতাকা বিক্ৰীৰ পৰিমাণ বৃদ্ধি পাইছে যদিও আশাব্যঞ্জক চাহিদা বৃদ্ধিৰ ক্ষেত্ৰত আজিকালি বজাৰত সুলভ হৈ পৰা বিভিন্ন ধৰণৰ প্লাষ্টিকৰ পতাকাই প্রতিবন্ধকতাৰ সৃষ্টি কৰিছে বুলি কৰ্মচাৰীসকলে জানিবলৈ দিছে।

Share This