ৰাজ্যত বৃদ্ধি চাহৰ উৎপাদন 

dainik janambhumi May 15, 2025

ডিজিটেল ডেস্ক : দুশ বছৰীয়া ৰাজ্যৰ চাহ উদ্যোগটোৰ বাবে আশাৰ বতৰা। চলিত বৰ্ষত ৰাজ্যত চাহৰ উৎপাদন বৃদ্ধি পোৱাৰ সম্ভাৱনাই দেখা দিছে। জলবায়ু পৰিৱৰ্তনৰ বাবে যোৱা দুটা বছৰ বিভিন্ন সমস্যাৰ সন্মুখীন হোৱা ৰাজ্যৰ চাহ উদ্যোগটোৰ এইবাৰ প্ৰথম ভাগতে পূর্বতকৈ উৎপাদন বৃদ্ধি পাইছে। একমাত্র অসমতে নহয়, সমগ্র দেশতে মার্চ মাহত উৎপাদন যোৱা বৰ্ষৰ মাৰ্চতকৈ বৃদ্ধি পাইছে। 

চাহ ব'র্ডে প্রকাশ কৰা তথ্য অনুসৰি, যোৱা বৰ্ষৰ মাৰ্চ মাহত অসমত মুঠ ২১.৪৫ মিলিয়ন কিল'গ্রাম চাহপাত উৎপাদন হৈছিল। ইয়াৰে ভিতৰত বৃহৎ চাই বাগিচাসমূহে উৎপাদন কৰিছিল ৮.৭৫ মিলিয়ন কিল'গ্রাম আৰু ক্ষুদ্র চাহ বাগিচাসমূহে উৎপাদন কৰিছিল ১২.৭০ মিলিয়ন কিল'গ্রাম। ইয়াৰ বিপৰীতে চলিত বৰ্ষৰ মাৰ্চ মাহত ৰাজ্যখনত উৎপাদন হৈছে মঠ ২৭.৫১ মিলিয়ন কিল'গ্রাম চাহ। উৎপাদিত এই চাহৰ ৯.৭৭ মিলিয়ন কিল'গ্রাম চাহ বৃহৎ চাহ বাগিচাই আৰু ১৭.৭৫ মিলিয়ন কিল'গ্রাম চাহ ক্ষুদ্র চাহ বাগিচাসমূহে উৎপাদন কৰিছিল। 

প্রণিধানযোগ্য যে সমগ্র দেশতে উৎপাদিত হোৱা চাহৰ প্ৰায় ৫২ শতাংশ চাহেই অসমে উৎপাদন কৰে। চাহ ব'র্ডে প্রকাশ কৰা মতে, যোৱা মাৰ্চ মাহত সমগ্র দেশত মুঠ ৬৫.১৪ মিলিয়ন কিল'গ্রাম চাহপাত উৎপাদন হৈছে। ইয়াৰ বিপৰীতে যোৱা বর্ষত মার্চ মাহত উৎপাদন হৈছিল ৬৩.৭৮ মিলিয়ন কিল'গ্রাম চাহপাত। বিশেষজ্ঞসকলৰ মতে জলবায়ু পৰিৱৰ্তনৰ বাবে ৰাজ্যখনত যোৱা দুই বছৰত চাহৰ উৎপাদন হ্রাস পাইছে। বিশেষকৈ অতিপাত তাপমান আৰু অতিপাত বৰষুণে চাহৰ উৎপাদনত ব্যাপক প্ৰভাৱ পেলাইছিল। যাৰ বাবে ৰাজ্যখনত চাহৰ উৎপাদন হ্রাস পাইছিল। ইফালে ৰাজ্যৰ চাহ বাগিচাসমূহত ব্যাপক মাত্ৰাত ৰাসায়নিক সাৰ ব্যৱহাৰ কৰাক লৈও দেশে-বিদেশে ব্যাপক প্রতিক্ৰিয়াৰ সৃষ্টি হৈছিল। যাৰ বাবে যোৱা বৰ্ষত সমস্যাত পৰিছিল ক্ষুদ্ৰ চাহ খেতিয়কসকল। পিছে এনে সমস্যাৰ মাজতো চলিত বৰ্ষৰ প্ৰথম ভাগতে ৰাজ্যত চাহৰ উৎপাদন বৃদ্ধি পোৱাটো আশাৰ বতৰা হিচাপে বিবেচিত হৈছে।

Share This