কাকপথাৰত জোঁৰ লৈ ওলাই আহিল সহস্রাধিক মৰাণ লোক

dainik janambhumi September 05, 2025

ডিজিটেল ডেস্ক : খিলঞ্জীয়া ভূমিপুত্র মৰাণসকলৰ জনজাতিকৰণ আৰু ষষ্ঠ অনুসূচীভুক্ত স্বায়ত্ত শাসন প্ৰদানৰ দাবীত কালি হাতে হাতে জোঁৰ লৈ কাকপথাৰৰ ৰাজপথলৈ ওলাই আহিল সহস্রাধিক মৰাণ লোক। মৰাণসকলৰ দীৰ্ঘদিনীয়া দাবীৰে সদৌ মৰাণ ছাত্ৰ সন্থাৰ উদ্যোগত আৰু মৰাণ জনজাতিৰ কেউটা সংগঠনৰ সহযোগত এই বৃহৎ প্রতিবাদী কার্যসূচী ৰূপায়ণ কৰা হয়। কাকপথাৰ ৰাধাকৃষ্ণণ একাডেমিৰ সন্মুখৰ ১৫নং ৰাষ্ট্ৰীয় ঘাইপথৰ পৰা বাহিৰ কৰা এই জোঁৰ সমদল অসম আৰক্ষীৰ বেহু ফালি ৰাজপথেৰে আগবাঢ়ি কাকপথাৰ থানা চাৰিআলিত সমাপ্ত কৰে। মূলতঃ প্রতিখন চৰকাৰে নিৰ্বাচনৰ সময়ত মৰাণসকলক জনজাতিকৰণ কৰা হ'ব বুলি প্রতিশ্রুতি দি আহিছে যদিও চৰকাৰ গঠন কৰাৰ পাছত তেওঁলোকে জনজাতিকৰণ প্রক্রিয়াটো আগবঢ়াই নিয়াৰ প্ৰাথমিক কাম-কাজখিনিতো হাত নিদিয়ে বুলি মৰাণ জনগোষ্ঠীটোৰ প্রতিনিধিসকলে অভিযোগ কৰি চৰকাৰ বিৰোধী বিভিন্ন শ্ল'গান দিয়ে। 

মৰাণসকলক জনজাতিকৰণ প্ৰদান কৰাৰ দাবীত কালি বৃহত্তৰ কাকপথাৰ, ডিৰাক, পূর্বাঞ্চল, লেকাং, ফিল'বাৰী, ন-দিহিং আদি অঞ্চলৰ সহস্রাধিক মৰাণ ৰাইজ ওলাই আহি হাতে হাতে জোঁৰ লৈ সমদল কৰি চৰকাৰখনক সকীয়াই দিয়ে। মৰাণসকলক জনজাতিকৰণ নকৰা পৰ্যন্ত সংগ্রামখন চলাই যোৱা হ'ব বুলি মৰাণ ছাত্ৰ সন্থাই স্পষ্ট কৰি দি কয় যে ২০২৬ চনৰ নিৰ্বাচনৰ পূৰ্বে আমি আমাৰ আমাৰ প্ৰাপ্য অধিকাৰৰ আঁজুৰি আনিবই লাগিব। সেয়ে এই দিঘলীয়া সংগ্ৰামখনত প্ৰতিগৰাকী মৰাণ লোকে সাক্ষী হৈ সহযোগিতা আগবঢ়াই যাবলৈ অনুৰোধ জনায়। আনহাতে ৰাজনৈতিক দৃষ্টিকোণলৈ নাচাই নিজৰ জাতীয় চেতনাৰ উন্মেষ ঘটাবলৈ গণতান্ত্রিক আন্দোলন গঢ়ি তুলিবলৈ মৰাণসকল বাধ্য বুলি আজি কাকপথাৰ থানা চাৰিআলিৰ ৰাজপথত হোৱা প্ৰতিবাদী সভাই মতপোষণ কৰে। 

প্ৰতিবাদী ৰাইজে বৰ্তমানৰ বিজেপি চৰকাৰখনক সমালোচনা কৰি, বৰ্তমানৰ চৰকাৰখনে শাসনলৈ অহাৰ আগমুহূর্তত প্রতিশ্রুতি দিছিল যে তেওঁলোকে চৰকাৰ গঠন কৰিলে মৰাণসকলক জনজাতিকৰণ প্ৰদান কৰা হ'ব। কিন্তু তেনেস্থলত কিয় আজি পর্যন্ত চৰকাৰখনে কেন্দ্ৰীয় চৰকাৰৰ হাতত মৰাণ জাতিৰ জনজাতিকৰণৰ বাবে কোনো প্রস্তাব প্রদান কৰা নাই বুলি প্রশ্ন উত্থাপন কৰে। সহস্রাধিক লোকৰ উপস্থিতিত ৰাজপথত এখন প্রতিবাদী সভা অনুষ্ঠিত কৰি কেউটা সংগঠনৰ নেতৃবৃন্দই জনজাতিকৰণ আৰু ষষ্ঠ অনুসূচীভুক্ত স্বায়ত্তশাসনৰ দাবী জনায়।

Share This