বড়ো ৰাইজৰ উলাহ

dainik janambhumi March 18, 2025

ডিজিটেল ডেস্ক : প্রধানমন্ত্রী নৰেন্দ্র মোদী, গৃহ মন্ত্রী অমিত শ্বাহৰ দৰে দেশৰ ক্ষমতাৰ শীৰ্ষত আৰোহণ কৰি থকা নেতাসকল বি টি আৰলৈ আহিলে বড়ো জনসাধাৰণৰ মাজত উলাহ-উৎসাহৰ পাৰ ভঙা সোঁত বোৱা পৰিলক্ষিত হয়। দেওবাৰে কোকৰাঝাৰৰ দোতমাত নিখিল বড়ো ছাত্ৰ সন্থাৰ ৫৭ সংখ্যক বার্ষিক অধিৱেশনৰ মুকলি সভাত কেন্দ্রীয় গৃহ মন্ত্রী অমিত শ্বাহে অংশগ্রহণ কৰিবলৈ আহোঁতেও সেই উৎসাহ-উলাহৰ পুনৰাবৃত্তি ঘটিল। বিজেপিৰ শীর্ষ নেতাসকলৰে বড়ো জনসাধাৰণৰ আত্মীয়তা গঢ়ি উঠাৰ অৱশ্যে দীঘলীয়া ইতিহাস আছে। লালকৃষ্ণ আদৱানি কেন্দ্রীয় গৃহ মন্ত্ৰী হৈ থকাৰ সময়ত ঐতিহাসিক বি টি চি চুক্তি স্বাক্ষৰিত হৈছিল। সেই চুক্তিৰ বাবেই বড়োলেও লিবাৰেশ্যন টাইগাৰ্ছ (বি এল টি)ৰ দুৰ্ধৰ্ষ উগ্রপন্থীসকল মূলসুঁতিলৈ ঘূৰি আহিছিল। পৃথক ৰাজ্য নাপালেও বড়ো বসতিপ্রধান কোকৰাঝাৰ-ওদালগুৰিসহ বৃহৎ এলেকা এটাত বড়োসকলৰ ৰাজনৈতিক অধিকাৰ প্ৰতিষ্ঠা হৈছিল। 

অটল বিহাৰী বাজপেয়ীয়ে বড়ো ভাষাক সংবিধানৰ অষ্টম অনুসূচীত স্থান দি দেশৰ স্বীকৃত ভাষাসমূহৰ শাৰীলৈ উন্নীত কৰিছিল। নৰেন্দ্ৰ মোদীৰ চৰকাৰ ক্ষমতালৈ অহাৰ পাছত বি টি চি চুক্তিক আঁতৰাই বি টি আৰ চুক্তি হ'ল। এইবাৰ উক্ত প্রশাসনীয় এলেকাৰ ক্ষমতাৰ পৰা প্ৰাক্তন বি এল টিৰ নেতাসকলে গঠন কৰা বি পি এফক আঁতৰাই এবছু-এন ডি এফ বিৰ নিয়ন্ত্ৰণত প্রতিষ্ঠা হ'ল ইউ পি পি এলৰ শাসন। অন্য এচাম দুর্ধর্ষ বিদ্রোহী বন্দুকৰ পৃথিৱীখনৰ পৰা ওলাই আহি গণতান্ত্রিক ৰাজনৈতিক ক্ষেত্ৰখনৰ দায়িত্ব গ্রহণ কৰিলেহি। এনেকৈ বিশেষকৈ বিজেপি নেতৃত্বাধীন কেন্দ্ৰীয় চৰকাৰৰ আমোলত বড়ো জনগোষ্ঠীৰ সামাজিক-ৰাজনৈতিক ক্ষেত্ৰলৈ কেইবাটাও গুৰুত্বপূৰ্ণ পৰিৱৰ্তন অহা আৰু উক্ত অঞ্চলৰ অৰ্থনীতিতো ব্যাপক পৰিৱৰ্তন সাধন হোৱাৰ পৰিপ্ৰেক্ষিতত বিজেপিৰ শীর্ষ নেতৃত্ব আৰু বড়ো জনসাধাৰণৰ এক শক্তিশালী সম্বন্ধ গঢ় লৈ উঠিছে। সেইবাবেই বিজেপি নেতৃত্বাধীন চৰকাৰৰ শীৰ্ষ নেতাসকল আহিলে বি টি আৰ এলেকাত উলাহৰ বন্যা বয়। দোতমাত বড়ো জনতাৰ উছাহৰ ধল দেখি সেয়েহে কেন্দ্রীয় গৃহ মন্ত্রী শ্বাহে ব্যক্ত কৰিছিল তেওঁৰ নিজৰো উছাহ- 'এসময়ত এই অঞ্চলত গুলী ফুটিছিল, এতিয়া সেই বড়ো যুৱকে হাতত ত্ৰিৰংগা লৈ আমাক আদৰণি জনাইছে।' ১৯৯৩ চনত তেতিয়াৰ কংগ্ৰেছ চৰকাৰে বড়োলেণ্ড অট'নমাছ কাউঞ্চিল আইন আনি বড়োসকলক স্বায়ত্ত শাসনৰ সুবিধা প্রথম প্রদান কৰিছিল যদিও কংগ্রেছে সেই হাৰত বড়ো জনসাধাৰণৰ আস্থা অর্জন কৰিবলৈ সক্ষম নহ'ল। বৰঞ্চ কংগ্ৰেছৰ দিনত নতুন নতুন বড়ো উগ্রপন্থী সংগঠনৰ জন্ম হৈ সমগ্ৰ অসমৰে পৰিস্থিতি ভয়াৱহহে কৰি তুলিলে। কংগ্ৰেছৰ সময়তে ডিভাইড আছাম ফিফটি ফিফটিৰ দাবীৰ আন্দোলনো অধিক ভয়াৱহ হৈ উঠিছিল। সেই সময়ছোৱাই অসমৰ সামাজিক পৰিৱেশ ইমানেই তিক্ত কৰি পেলালে যে তাৰ ফলত সৃষ্টি হোৱা সামাজিক বিভেদৰ ৰেশ এতিয়াও ক'ৰবাত ক'ৰবাত বৰ্তি আছে। সেই ভয়াৱহ দিনবোৰৰ কথা সুঁৱৰিলে বড়ো-অবড়ো উভয় পক্ষৰ লোকৰ এতিয়াও গাৰ নোম শিয়ৰি উঠে। 

অসমখনক বিভাজন কৰি বড়োসকলক ৰাজনৈতিক অধিকাৰ প্ৰদানৰ নামত কিমান নিৰীহ মানুহ নৃশংসতাৰ বলি হ'ব লগা হ'ল সেই অধ্যায়ে এতিয়াও বহুতৰ বুকুত শোক-ক্ষোভৰ জুই জ্বলাই ৰাখিছে। সেই অধ্যায়বোৰৰ সোঁৱৰণ এতিয়া অৱশ্যে অর্থহীন। তেজৰ নৈ বোওৱা সেই সংগ্রামবোৰ এতিয়া অতীত হ'ল। সেই ৰক্তক্ষয়ী সংগ্ৰামৰ নেতৃত্ব লোৱাসকলেই যোৱা প্রায় দুটা দশক বড়োলেণ্ড এলেকাৰ ৰাজনৈতিক শাসন আৰু উন্নয়নৰ নেতত্ব বহন কৰিছে। তেওঁলোক এতিয়া সন্তুষ্ট। সেই সন্তুষ্ট বড়ো নেতৃত্বই বিজেপিক বিশ্বাসত লৈ অস্ত্ৰৰ ঝনঝনৰি পৰা আঁতৰি বিকাশৰ এটা নতুন যাত্ৰা আৰম্ভ কৰিব পৰাটো কেৱল বড়োসকলৰ বাবেই নহয়, তাত বসবাস কৰা অন্য জাতি-জনগোষ্ঠীবোৰৰ বাবেও স্বস্তিদায়ক বিষয়। প্রধানমন্ত্রী নৰেন্দ্ৰ মোদী, গৃহ মন্ত্ৰী অমিত শ্বাহৰ দৰে দেশৰ মুৰব্বীসকলক বড়োলেণ্ডৰ জনতাই ত্ৰিৰংগা জোকাৰি আদৰণি জনোৱাৰ জৰিয়তে বিজেপি আৰু বিজেপি নেতৃত্বাধীন শাসনৰ প্রতি আস্থা প্রকট কৰাৰ জৰিয়তে দিয়া বার্তাটোক হৃদয়ংগম কৰিব পৰাটোৱেই মূল কথা। দেশ তথা উত্তৰ-পূবৰ প্ৰতি ভাবুকি নমোৱা শক্তিবোৰক এনেদৰে নিয়ন্ত্ৰণ কৰি মূলসুঁতিলৈ আনি বিকাশৰ ধাৰাটোত চামিল কৰাব পৰাটো ভাল কথা। লগে লগে এটা কথাও সেই নেতাসকলে উপলব্ধি কৰা উচিত যে এই অঞ্চলটোৰ ভিন্ন জাতি-জনগোষ্ঠীৰে সমৃদ্ধ সাংস্কৃতিক বৈচিত্র্যৰ বৈশিষ্ট্যকো সন্মান জনাই যাব লাগিব। উন্নয়নৰ সমান্তৰালকৈ এই জাতি-জনগোষ্ঠীসমূহৰ স্বাভিমান বিজড়িত হৈ থকা অন্যান্য বিষয়বিলাকৰ প্ৰতিও সম্মান প্রদৰ্শন কৰিব লাগিব। বি টি আৰৰ পৰিসীমাৰ ভিতৰত বড়োসকলক বাদ দিও আৰু ২৫টা জাতি-জনগোষ্ঠীৰ লোকে বসবাস কৰে। অঞ্চলটোত স্থায়ী শান্তি আৰু বিকাশৰ যাত্ৰাটোত এই জনগোষ্ঠীসমূহৰ অংশগ্রহণো জৰুৰী বুলি বিবেচনা কৰিয়েই বি টি আৰ কৰ্তৃপক্ষই অলপতে এই প্রতিটো জনগোষ্ঠীৰ বাবে একোখনকৈ 'ভিজন ডকুমেন্ট' প্ৰকাশ কৰিছিল। দোতমাৰ অধিৱেশনত দিয়া ভাষণত অমিত শ্বাহে আশা প্রকাশ কৰিছে যে ২০৩৬ চনত আহমেদাবাদত হ'ব লগা অলিম্পিকত বড়ো যুৱক-যুৱতীয়েও অংশগ্ৰহণ কৰিবলৈ সক্ষম হ'ব। সুন্দৰ কথা। কিন্তু কেৱল বড়োৱেই নহয় অন্য ২৫টা জাতি-জনগোষ্ঠীৰ যুৱক-যুৱতীকো দেখুৱাব লাগিব সেই সপোন। সমান্তৰালকৈ সমগ্ৰ অসমৰ জাতি-জনগোষ্ঠীসমূহৰ মাজত পৰস্পৰক বিশ্বাসৰ, পৰস্পৰক আস্থাত লোৱাৰ এটা পৰিৱেশ ৰচনা কৰিব লাগিব। মোদী-অমিত শ্বাহক আদৰণি জনাই ভাৰতীয় সত্তাটোৰ অংশীদাৰ হৈ আগবঢ়াৰ যি পটভূমি বড়োলেণ্ডত ৰচনা হৈছে সেই একেই সদ্ভাৱ আৰু বিশ্বাসৰ পৰিৱেশ সমগ্ৰ অসম তথা উত্তৰ-পূবতো বৰ্তাই ৰাখিলে বিকাশৰ যাত্ৰা অধিক শক্তিশালী হ'ব।

Share This