ব্যাধি 

dainik janambhumi January 30, 2025

ডিজিটেল ডেস্ক : সোমবাৰে অপ্রত্যাশিতভাৱেই খবৰটো বিয়পি পৰিছিল ৰাজধানী গুৱাহাটীত। লাহে লাহে বিভিন্ন মিডিয়াযোগে বিয়পিল শদিয়াৰ পৰা ধুবুৰীলৈ। অৱশ্যে আজিকালি এইধৰণৰ ঘটনাবোৰ তেনেই সাধাৰণ হৈ পৰিল। বিশেষকৈ মহানগৰী গুৱাহাটীত নিতৌ এনে ঘটনা সংঘটিত হোৱাটো যেন নিয়মত পৰিণত হৈছে। যাৰ বাবে এনে ঘটনাক লৈ ৰাইজৰো কোনো উৎকণ্ঠা-উদ্বিগ্নতা নাই, আৰক্ষীৰো নাই প্ৰতিৰোধৰ চিন্তা-ব্যৱস্থা। 

গণৰাজ্য দিৱসৰ পিছদিনা মহানগৰীৰ গান্ধীবস্তিত প্ৰেমিকৰ কোঠাতে উদ্ধাৰ হৈছিল ধেমাজিৰ চিমেন চাপৰিৰ এগৰাকী ২১ বছৰীয়া যুৱতীৰ মৃতদেহ। বসুমতাৰী উপাধিৰ জনজাতীয় যুৱতীগৰাকী আহিছিল প্রেমিকক লগ ধৰিবলৈ। গণৰাজ্য দিৱসৰ দিনা যুৱতীগৰাকীয়ে প্রেমিক ইন্দ্ৰজিৎ পাইকৰ কোঠাতে আছিল। কিন্তু সোমবাৰে ৰহস্যজনকভাৱে যুৱতীগৰাকীৰ মৃতদেহ উদ্ধাৰ হয়। আৰক্ষীয়ে ঘটনা সংক্রান্তত প্রেমিক ইন্দ্ৰজিতক গ্ৰেপ্তাৰ কৰে। ঠিক অনুৰূপ ঘটনা সংঘটিত হৈছিল ভোগালী বিহুৰ উৰুকাৰ নিশা। অৰ্থাৎ ১৩ জানুৱাৰীৰ নিশা মহানগৰীৰ পূব শৰণীয়াৰ ভাৰাঘৰত ২১ বছৰীয়া ভৰালী উপাধিৰ এগৰাকী যুৱতীৰ অস্বাভাৱিক মৃত্যু হৈছিল।বিশ্বনাথ চাৰিআলিৰ যুৱতীগৰাকী এগৰাকী বান্ধৱীৰ সৈতে একেলগে আছিল আৰু ব্যক্তিগত খণ্ডৰ প্ৰতিষ্ঠানত কাম কৰিছিল। বিহুৰ বাবে বান্ধৱীগৰাকী ঘৰলৈ যোৱাত সেইদিনা তাই অকলশৰে আছিল ঘৰটোত। তাৰেই সুযোগত তাই সংঘটিত কৰে অনাহূত ঘটনাটো। 

আন এটা ঘটনা সংঘটিত হৈছিল ৯ জানুৱাৰীত। ঘটনাটো সংঘটিত হৈছিল ভঙাগড় আৰক্ষী থানাৰ অন্তৰ্গত তৰুণ নগৰত। শৰ্মা উপাধিৰ যুৱতীগৰাকীৰ ৰহস্যজনক মৃত্যুৰ পাছত আৰক্ষীয়ে উদ্ধাৰ কৰিছিল মৃতদেহ।আনহাতে, এই ঘটনাৰ পিছদিনাই অন্য এটা ঘটনাৰ খবৰ বিয়পি পৰিছিল। খবৰটোৰ উৎস আছিল ৰুক্মিণীগাঁও। নাথ উপাধিৰ এগৰাকী যুৱতীৰ মৃতদেহ উদ্ধাৰ কৰি আৰক্ষীও বিমোৰত পৰিছিল। যোৱা ৩১ ডিচেম্বৰত চানমাৰিতো শইকীয়া উপাধিৰ এগৰাকী যুৱতীয়ে অনাকাংক্ষিত সিদ্ধান্ত লৈছিল। এটা বিলাসী ফ্লেটত ২৮ বছৰীয়া যুৱতীগৰাকীয়ে নিজকে নিঃশেষ কৰি দিছিল। সি যি নহওক, আৰক্ষীৰ তদন্তত প্রকাশ পোৱা লক্ষণীয় কথাটো আছিল- আটাইকেইগৰাকী যুৱতীৰ মৃত্যুৰ কাৰণ আৰু প্রকৃতি একে আছিল। 

কম বয়সীয়া যুৱতীকেইগৰাকীয়ে প্রেমজনিত কাৰণতে চূড়ান্ত সিদ্ধান্ত লৈছিল। এতিয়া প্রশ্ন হৈছে- এইদৰে কম বয়সীয়া যুৱতীয়ে সঘনাই কৰা আত্মহনন প্ৰতিৰোধ হ'ব কেনেকৈ? যোৱা ৩১ ডিচেম্বৰৰ পৰা ২৬ জানুৱাৰীলৈ মাত্র ২৭ দিনত ৫গৰাকী যুৱতীয়ে মহানগৰীত নিজকে নিঃশেষ কৰি দিছে। যদিও কোৱা হৈছে- আটাইকেইগৰাকী যুৱতীয়েই প্রেমজনিত কাৰণত আত্মহনন কৰিছে, পুনৰ প্ৰশ্ন হয়- এতিয়াৰ যুৱ সমাজৰ মাজত প্ৰেমৰ ধাৰণাটো ভাবিব নোৱৰাকৈ সলনি হৈ পৰিছে নেকি? নে আজিৰ প্ৰজন্মৰ বহুতৰ মাজত ই এক মানসিক ব্যাধি হিচাপে বিয়পি পৰিছে? বিশ্বৰ বিখ্যাত মনীষীসকলৰ মতে, ত্যাগেই হৈছে প্রেমৰ 'সর্বোৎকৃষ্ট নিদর্শন। অর্থাৎ কেৱল হস্তগত কৰাৰ উদ্দেশ্যেই প্রেম হ'ব নালাগে। ইয়াত ত্যাগৰ অৰ্থ ব্যাপক, আত্মহনন নহয়। 

আলফ্রেড টেনিছনেও কৈছে- অভিজ্ঞতালব্ধ প্রেম সকলোৰে ঊর্ধ্বত। এই অভিজ্ঞতাৰ ভিতৰত যিদৰে মানসিক-দৈহিক আৱেদনক ধৰা হৈছে, ঠিক সেইদৰে প্ৰতাৰণাকো সামৰা হৈছে। প্ৰতাৰণাৰ অভিজ্ঞতাই আকৌ মানুহক পৰিপক্ব কৰি তোলে। ভৱিষ্যতৰ পথত অধিক সতর্কতাৰে আগবঢ়াত সহায়ক হৈ পৰে। আনহাতে, প্ৰেমৰ তাগিদাত দিকবিদিক হেৰুৱাই পেলোৱাটো, নিজকে নিঃশেষ কৰি পেলোৱাটো মানসিক ৰোগৰ সমাৰ্থক বুলিও বহুতে ক'ব খোজে। মনোবিজ্ঞানীসকলৰ মতে, যুৱক-যুৱতীসকলৰ বাবে এই সন্ধিক্ষণৰ সময়ছোৱাই আটাইতকৈ প্রত্যাহ্বানজনক। দুর্ভাগ্যৰ কথা এয়ে যে আমাৰ ভাৰতবৰ্ষত সন্ধিক্ষণৰ সময়ৰ প্ৰত্যাহ্বান অতিক্রম কৰিব নোৱাৰি অনাহূত সিদ্ধান্ত লোৱা লোকৰ সংখ্যা ক্ৰমাৎ বৃদ্ধি পাবলৈ ধৰিছে। 

নেশ্যনেল ক্রাইম ৰেকৰ্ড ব্যুৰ'ৰ (এন চি আৰ বি) তথ্য মতে, ২০২১ বর্ষত প্রেমত বিফল হৈ কম বয়সতে জীৱন ধ্বংস কৰোঁতাৰ সংখ্যা ১৩.৩৮ শতাংশলৈ বৃদ্ধি পাইছে। দেশত ২০২০ চনত প্রেমজনিত আত্মহননৰ গোচৰ আছিল ১.৩৩৭টা। কিন্তু ২০২১ বর্ষত ই ১,৪৯৫টালৈ বৃদ্ধি পায়। আনহাতে, এইক্ষেত্ৰত আমাৰ অসম মুঠেই পিছপৰি থকা নাই। এন চি আৰ বিৰ তথ্য মতে, অসমত প্রেমজনিত কাৰণত মৃত্যুৰ সংখ্যা ২০২০ চনত ৯.৩ শতাংশলৈ বৃদ্ধি পাইছে, যিটো ২০১৯ চনত আছিল ৬.৯ শতাংশ।এনেয়েও বিগত সময়ছোৱাত গুৱাহাটী মহানগৰীত বিভিন্ন কাৰণত আত্মহননৰ ঘটনা অস্বাভাবিকভাৱে বৃদ্ধি পাইছে। অসম আৰক্ষীয়ে ব্যক্ত কৰা মতে, গুৱাহাটীত বছৰৰ ৩৬৫ দিনত ৩৭৩টা আত্মহত্যাৰ ঘটনা সংঘটিত হৈছে। সেইদৰে অসমত ২০১৯ চনত ৩,২৪৩টা আত্মহননৰ ঘটনা ঘটিছে, য'ত প্রতিদিনে গড়ে ৮.৮৮জন লোকে এনে অশুভ সিদ্ধান্ত লৈছে। এই তথ্য ২০১৮ বর্ষতকৈ ৩৬.৮ শতাংশ বেছি।এই সন্দর্ভত ২০২০ চনত অসম চৰকাৰৰ উদ্যোগত চলোৱা এটা অধ্যয়নত কোৱা হৈছে যে ৰাজ্যত ২০১৯ বৰ্ষত আত্মহনন কৰা লোকসকলৰ অর্ধেক অংশই দৰিদ্ৰ আৰু প্ৰেমত বিফল। 

এতিয়া লক্ষণীয় কথাটো হ'ল- আত্মহনন যদি এক মানসিক ব্যাধি, তেনেহ'লে ইয়াৰ মৰিষণৰ উপায় কি? এইক্ষেত্ৰত চৰকাৰৰ কৰণীয়ই বা হ'ব কি?মনোবিজ্ঞানীসকলৰ মতে, ছাত্ৰ অৱস্থাৰ পৰা বিবাহোপযোগী বয়সলৈকে ল'ৰা-ছোৱালীক অভিভাৱকৰ নিয়ন্ত্ৰণত ৰখা উচিত। অর্থাৎ নিজে আত্মনিৰ্ভৰশীল নোহোৱালৈকে ল'ৰা-ছোৱালীক অভিভাৱকে সকলো সময়তে চোৱা-চিতা কৰা,মানসিক অৱস্থা অধ্যয়ন কৰা আদি কৰিব পাৰিলে ভাল। কিন্তু বাস্তৱিক ক্ষেত্ৰত আজিৰ ল'ৰা-ছোৱালীক অভিভাৱকৰ নিয়ন্ত্ৰণত ৰখা কঠিন। অপৰিপক্ব বয়সত অপৰিপক্ব সিদ্ধান্ত লোৱাৰ বাবেই এনে অনাকাংক্ষিত ঘটনা বৃদ্ধি পাবলৈ ধৰিছে।এইক্ষেত্ৰত আমাৰ সমাজ ব্যৱস্থায়ো বহুখিনি অৰিহণা যোগাইছে। পশ্চিমীয়া মুক্ত যৌনাচাৰ, পার্টি, ড্ৰাগছৰ প্ৰচলন, লিভ-ইন সম্পৰ্ক আদিৰ বৃদ্ধিয়ে আমাৰ সমাজ ব্যৱস্থাৰ পৰিকাঠামোকে ভাঙি পেলাইছে। এই ভগ্ন সামাজিক পৰিকাঠামোক পুনৰ নিৰ্মাণৰ চিন্তা যেতিয়ালৈকে গঢ় লৈ নুঠিব, যেতিয়ালৈকে অশুভ পৰম্পৰাবোৰক প্ৰতিৰোধ কৰিব পৰা নাযাব তেতিয়ালৈকে অবাঞ্ছিত ঘটনাবোৰেও মূৰ দাঙি উঠিয়েই থাকিব।সেয়ে বিষয়টোৰ গুৰুত্ব বুজি সমাজ ব্যৱস্থাৰ গুৰি ধৰোঁতাসকল তথা সচেতন নাগৰিক সমাজ, চৰকাৰ-প্ৰশাসন সকলোৱে মিলি এক উমৈহতীয়া ব্যৱস্থা-কৌশল উদ্ভাৱনৰ প্ৰয়োজনীয়তা সময়ৰে দাবী হৈ পৰিছে।

Share This