গামোচা

dainik janambhumi March 08, 2025

ডিজিটেল ডেস্ক: অসমীয়াৰ অতি আদৰৰ ৰঙালী বিহুলৈ মাজত মাত্র এটা মাহ। এনে সময়তে অসমীয়াৰ স্বাভিমানৰ প্ৰতীক গামোচাৰ চাহিদা বজাৰত অভাৱনীয়ভাৱে বৃদ্ধি পায়। শিপিনীয়ে দিন-ৰাতি একাকাৰ কৰি তাঁতৰ পাটত বহি গামোচাত ফুল বাছে। প্রিয়জন তথা পৰিয়ালৰ লোক, ইষ্ট-কুটুম্বক দিয়াৰ লগতে দুপইচা উপার্জনৰ স্বাৰ্থতো ফাগুন-চ'ত মাহত শিপিনীৰ ব্যস্ততা অন্তহীন। অৱশ্যে কেৱল বহাগ বিহুতেই নহয়, অসমত প্রতিটো মাহতেই গামোচাৰ চাহিদা আছে। যিকোনোধৰণৰ মাংগলিক অনুষ্ঠান, সভাই-সমিতিয়ে গামোচাৰ ব্যৱহাৰ এতিয়াও অপৰিহাৰ্য। অসমৰ মুখ্যমন্ত্রী ড° হিমন্ত বিশ্ব শৰ্মাই এইবেলি ৰঙালী বিহুত ৰাজ্যৰ মন্ত্ৰী, ৰাজনীতিবিদ, বিধায়ক, নেতা, বিষয়া, বিশিষ্ট ব্যক্তিক উপহাৰ হিচাপে দিয়াৰ বাবে ১০ লাখ থলুৱা ফুলাম গামোচা ক্ৰয় কৰিব বুলি বাতৰি প্ৰকাশ হৈছে। 

অসমীয়া শিপিনীয়ে চেনেহৰ দীঘ আৰু মৰমৰ বাণিৰে বৈ উলিওৱা এই গামোচাখনক লৈ ৰাজ্যৰ মুখ্যমন্ত্ৰীগৰাকীয়ে গ্ৰহণ কৰা এই পদক্ষেপ নিঃসন্দেহে প্রশংসনীয়। পূর্বতেও মুখ্যমন্ত্ৰীগৰাকীয়ে এইধৰণৰ পদক্ষেপ গ্রহণ কৰাৰ উদাহৰণ আছে। দেশজুৰি বিতৰণ কৰিবলগীয়া এই গামোচাসমূহৰ পৰীক্ষা আৰু পেকিং কৰাৰ দায়িত্ব দিয়া হৈছে হস্ততাঁত আৰু বস্ত্ৰ সঞ্চালকালয়ক। মুখ্যমন্ত্ৰীৰ স্ব-নিৰ্ভৰ নাৰী আঁচনিৰ অধীনত গ্ৰহণ কৰা হৈছে এই পদক্ষেপ। আঁচনিখনৰ জৰিয়তে ৰাজ্যখনৰ থলুৱা শিপিনীয়ে বোৱা গামোচাসমূহ ক্ৰয় কৰি এই শিপিনীসকলক স্ব-নিৰ্ভৰশীল কৰাৰ উদ্দেশ্যেই লোৱা হৈছে এই আঁচনি। আঁচনিখনৰ জৰিয়তে গামোচা ক্ৰয় কৰিবলৈ চৰকাৰে এইবাৰ বাজেটত ১০ কোটি টকা ধার্য কৰিছে। ই নিঃসন্দেহে এক ইতিবাচক খবৰ। কিন্তু ইয়াৰ বিপৰীত ছবি এখনো সম্প্রতি ৰাজ্যখনত অতি সুলভ। ৰাজ্যখনলৈ প্রতিদিনে বহিঃৰাজ্যৰ পাৱাৰলুমত উৎপাদন কৰা গামোচাৰ আমদানি হৈ আছে। থলুৱা গামোচাৰ তুলনাত অতি নিম্নমানৰ এই গামোচাসমূহে নগৰ-চহৰ সকলোৰে বজাৰ দখল কৰিছে। শেহতীয়াভাৱে গুৱাহাটীৰ কামাখ্যা ষ্টেছনত গুজৰাটৰ পৰা আমদানি কৰা হাজাৰ হাজাৰ গামোচাৰ বৃহৎ বৃহৎ টোপোলা নমোৱাক লৈ ৰাজ্যজুৰি চৰ্চা হৈছে। থলুৱা শিপিনীক উৎসাহিত কৰিবলৈ ৰাজ্যৰ মুখ্যমন্ত্ৰীগৰাকীয়ে এক প্রশংসনীয় পদক্ষেপ লোৱাৰ পাছতো ৰাজ্যখনত অপাৰ চাহিদা থকা এই গামোচাক লৈ এচাম বহিৰাগত বণিয়াই এইদৰে চলাই গৈছে ৰমৰমীয়া ব্যৱসায়। 

ৰাজ্যৰ শিপিনীসকলৰ মূৰত ৰামটাঙোন শোধাই একাংশ ব্যৱসায়ীয়ে এই আমদানিকৃত গামোচাৰ বেহা চলাই গৈছে আৰু ইয়াৰ নীৰৱ সাক্ষী হৈ ৰৈছে প্রশাসন। মাজে-সময়ে বিহুৰ বতৰত হস্ততাঁত আৰু বস্ত্রশিল্প বিভাগৰ লগতে প্রশাসনে অভিযান চলাই দ'মে দ'মে চালানী গামোচা জব্দ কৰে যদিও তাৰ পাছতেই পুনৰ চলে বিক্রী কাৰ্য। ইয়াৰ বাবে অৱশ্যে দায়ী বহিৰাগত নহয়, আমিহে। যি বাপতিসাহোন বিহুটিক লৈ আমি গর্ব কৰোঁ, সেই বিহু আমি বহিঃৰাজ্যত উৎপাদিত সস্তীয়া গামোচাৰেই বেছ ধুমধামেৰে উদযাপন কৰিবলৈ অকণো লজ্জাবোধ নকৰোঁ। কেৱল মাত্র দাম
কম হোৱাৰ বাবেই এই গামোচাসমূহৰ প্ৰতি আমাৰ আকৰ্ষণ অধিক। ৪০-৫০ টকাৰ পৰাই বজাৰত উপলব্ধ হয় এইসমূহ গামোচা। কিন্তু ইয়াৰ বিপৰীতে আমাৰ ৰাজ্যত থলুৱাভাৱে উৎপাদিত গামোচা এখনৰ দাম বহু বেছি। অৱশ্যে ইয়াৰ কাৰণো নথকা নহয়। বহিঃৰাজ্যত পাৱাৰলুমত উৎপাদিত গামোচাৰ তুলনাত থলুৱাভাৱে উৎপাদিত গামোচাৰ উৎপাদন ব্যয় অধিক। যাৰ বাবে এই গামোচাসমূহৰ সৈতে ফেৰ মাৰি বজাৰ দখল কৰিবলৈ সক্ষম নহয় আমাৰ শিপিনী। ফলস্বৰূপে আমাৰ ৰাজ্যত আগৰ দৰে গাঁওসমূহত শিপিনীৰ মাজত ব্যস্ততা এতিয়া নাই। 

গামোচাৰ বাবে প্রয়োজনীয় সূতাৰ মূল্যও বৃদ্ধি পোৱাত সমস্যাত পৰিছে থলুৱা শিপিনী। ইয়াৰ পূৰ্ণ সুযোগ গ্রহণ কৰিছে অনা-অসমীয়া ব্যৱসায়ীয়ে। গুৱাহাটী মহানগৰীৰ বাণিজ্যিক কেন্দ্ৰ ফাঁচিবজাৰত বিহুৰ সময়ত এই গামোচাসমূহৰ লগতে বহিঃৰাজ্যত উৎপাদিত মেখেলা-চাদৰ ক্ৰয় কৰিবলৈ অসমীয়াৰ হেতা-ওপৰা। হস্ততাঁত আইনৰ নিষেধাজ্ঞা অমান্য কৰি পাৱাৰলুমত উৎপাদিত গামোচা, মেখেলা-চাদৰ অবাধে বিক্ৰী হৈ আছে। ইয়াৰ পাছতো সকলো নিমাত। গভীৰ নিদ্ৰাত দল-সংগঠনসমূহ। যিখন ৰাজ্যত প্ৰধানমন্ত্ৰীয়ে ডিঙিত গামোচা লোৱাক লৈ সৰ্বত্রে চর্চা হয়, সকলোৰে হৃদয় উথলি উঠে, গামোচাক কোনোবাই অপমান কৰিলে সকলো জাঙুৰ খাই উঠে, সেইখন ৰাজ্যত আজি একাংশ বহিৰাগত বনিয়াই এটা সম্ভাৱনাপূর্ণ শিল্প উদ্যোগৰ চাবি পকাই থকাৰ সময়তো সকলো নিঃপালি দি শুই থকা কথাটো অতি দুর্ভাগ্যজনক। জি আই টেগ লাভ কৰাক লৈ আমি বুকুফিন্দাই থাকো সঁচা, কিন্তু যেতিয়া আমাৰ গৌৰৱৰ প্ৰতীক গামোচাখনৰ ভৱিষ্যৎ সুৰক্ষিত নহয়, যিটো উদ্যোগ লক্ষ লক্ষ মহিলাৰ আত্মনিৰ্ভৰশীলতাৰ আধাৰ হ'ব পাৰে সেই কথাক লৈ কিন্তু আমি মুঠেও চিন্তিত নহয়। ইয়াৰ বাবে প্ৰতিগৰাকী অসমীয়া সচেতন হ'ব লাগিব। আমি প্রত্যেকেই যদিহে নিজৰ স্বাভিমান গামোচাখন থলুৱা শিপিনীৰ পৰা ক্ৰয় কৰাৰ সংকল্প নলওঁ, তেতিয়াহ'লে বহিৰাগত বণিয়াই এই সুবিধা লৈয়েই থাকিব।

Share This