মাজুলীলৈ দলং

dainik janambhumi March 17, 2025

ডিজিটেল ডেস্ক : ন্যায্যপ্রাপ্তিৰ বাবে অসমবাসীয়ে সদায় সংগ্রাম কৰিব লাগে বুলি কোৱা কথাষাৰ বৰ মিছা নহয়। ব্ৰহ্মপুত্ৰৰ ওপৰত এখন দলঙৰ বাবে বা তেল-গেছৰ দৰে প্ৰাকৃতিক সম্পদৰ চহকী ৰাজ্যখনে এটা শোধনাগাৰৰ বাবেও আন্দোলন কৰিব লাগে। এনে প্রেক্ষাপটতে যোৰহাট-মাজুলী সংযোগীকে ব্ৰহ্মপুত্ৰৰ ওপৰত এখন দলঙৰ দাবী আছিল মাজুলীবাসীৰ দীৰ্ঘদিনীয়া। অৱশ্যে, সত্ৰীয়া সংস্কৃতি বিজতৰীয়া হোৱা আৰু মাজুলীৰ স্বকীয়তা বিনষ্ট হোৱাৰ আশংকাৰে এচামে এই দলঙৰ প্ৰসংগত কৰা বিৰোধিতা এতিয়া গুৰুত্বহীন। কাৰণ ইতিমধ্যেই এই প্রস্তাৱিত দলঙৰ নিৰ্মাণ আৰম্ভ হ'ল। যোৱা ২০২১ চনৰ ১৮ ফেব্ৰুৱাৰীত মাজুলীৰ ফুলনি পথাৰত যোৰহাট-মাজুলী সংযোগী দলঙৰ শুভাৰম্ভ অনুষ্ঠানত উপস্থিত থাকি কেন্দ্রীয় পথ পৰিবহণ মন্ত্ৰী নীতিন গডকাৰিয়ে কৈছিল, ২০১৬ৰ বিধানসভাৰ নিৰ্বাচনৰ আগেয়ে মই মাজুলীলৈ আহি যোৰহাট-মাজুলী সংযোগী দলঙৰ আধাৰশিলা স্থাপন কৰিছিলোঁ। 

কেৱল আধাৰশিলা স্থাপনেই নহয়, মই এই দলং নির্মাণ কৰাৰো প্ৰতিশ্রুতি দিলোঁ। ভাষণত তেওঁ কৈছিল, এই দলংখন আমি দুবছৰৰ ভিতৰত নিৰ্মাণ কৰি উলিয়াবলৈ চেষ্টা কৰিম। কিন্তু বাস্তৱিকতে সেয়া হৈ নুঠিল। গডকাৰিয়ে কোৱা দুবছৰ, বা মুখ্যমন্ত্ৰী ড° হিমন্ত বিশ্ব শর্মাই ২০২৬ চনৰ আগতেই যোৰহাট-মাজুলী দলং নির্মাণ সম্পূৰ্ণ হ'ব বুলি কৰা ঘোষণা অসাৰ প্ৰমাণিত হৈ যোৱা ছেপ্টেম্বৰ মাহৰ পৰা হঠাৎ স্তব্ধ হৈ গ'ল দলংখনৰ নিৰ্মাণকাৰ্য। নিৰ্মাণকাৰী সংস্থা ইউ পি ষ্টেট ব্রীজ কৰ্প'ৰেশ্যনক কামৰ পৰা আঁতৰাই পঠোৱাৰ সিদ্ধান্ত আৰু পুনৰ নিবিদা আহ্বানৰ প্ৰক্ৰিয়াই স্বাভাৱিকতেই দীঘলীয়া কৰিব দলঙৰ নিৰ্মাণকাৰ্য। এক অনিশ্চয়তা। দলং প্ৰসংগত বৰমূৰীয়াসকলৰ পৰস্পৰ-বিৰোধী মন্তব্যয়ো আশংকাত পেলাইছে মাজুলীবাসীক। তেওঁলোকৰ মনত স্বাভাৱিক সন্দেহ-'দলংখন হ'বগৈনে? প্রতিটো নির্বাচনতে মাজুলীবাসীক এখন দলঙৰ সপোন দেখুওৱা ৰাজনীতিকসকলে মনত ৰাখিবনে নিজৰ প্ৰতিশ্ৰুতি?' মাজুলীবাসীৰ মনত এতিয়া এনে অনেক প্ৰশ্নৰ হেন্দোলনি। একে সময়তে কিন্তু মন কৰিবলগীয়া আন কেতবোৰ কথা আছে। 'ভূপেন হাজৰিকা সেতু' নামেৰে জনাজাত 'ধলা-শদিয়া দলং', 'শৰাইঘাট' আৰু 'কলীয়া ভোমোৰা'ৰ দ্বিতীয়খন দলং কিন্তু কোনোধৰণৰ দাবী-আন্দোলন নোহোৱাকৈ নির্মাণ সম্পূর্ণ হ'ল। 

এক অর্থত প্রায় নিঃশব্দে নির্মাণ হ'ল এইসমূহ দলং। মাজুলীৰ দলং নিৰ্মাণৰ বাবে ৰাইজৰ যি দাবী, আগ্রহ, উৎকণ্ঠা তাৰ কিঞ্চিতো নাছিল এইসমূহ দলঙৰ ক্ষেত্ৰত। অৱশ্যে, ইয়াৰ যোগেদি এই কথা ক'ব খোজা নাই যে এই দলংকেইখন ৰাইজ আৰু দেশৰ বাবে অপ্রয়োজনীয় আছিল। ক'ব খোজা কথাটো হ'ল চৰকাৰে প্ৰয়োজন বুলি বিবেচনা কৰিলে ৰাইজৰ দাবী অবিহনেও এনে বৃহৎ নিৰ্মাণ কৰে- কৰাটো উচিত। উল্লিখিত দলংকেইখনৰ এই প্রয়োজন প্রধানতঃ যোগাযোগ আৰু প্ৰতিৰক্ষা বুলি সহজেই অনুমান কৰিব পাৰি। প্ৰসংগতে উল্লেখযোগ্য যে প্ৰতিৰক্ষাৰ দিশৰ পৰা অত্যন্ত গুৰুত্বপূৰ্ণ বুলি বিবেচিত 'ভূপেন হাজৰিকা সেতু'ৰ বহন ক্ষমতা ইমানেই বেছি যে ইয়াৰ ওপৰেদি ভাৰতীয় সেনাৰ অর্জুন আৰু টি-২২ যুদ্ধ টেংক অনায়াসে চলাচল কৰিব পাৰিব। এতিয়া আমাৰ মনত প্ৰশ্নৰ উদয় হয় এনেধৰণৰ গুৰুত্ব নথকাৰ বাবেই যোৰহাট-মাজুলী সংযোগী দলঙৰ নিৰ্মাণৰ গতি লেহেম হৈছে নেকি? প্ৰতিৰক্ষা, যোগাযোগৰ দৰে গুৰুত্বপূৰ্ণ প্ৰসংগবোৰ নহয়- নিৰ্বাচনৰ জয়, ৰাজনীতি আদিৰ দৰে আপাতদৃষ্টিত স্থূলকাৰক কিছুমানহে এই সমগ্র দলং নিৰ্মাণৰ প্রকল্পটোৰ মূল চালিকা শক্তি নেকি?

এনে স্থবিৰ সময়তে আকৌ আহিছে আশাৰ বতৰা। যোৱা ৬ মাৰ্চত কেন্দ্ৰীয় চৰকাৰে দলংখনৰ বাবে প্রায় ৭০০ কোটি টকাৰ সংশোধিত প্রকল্প ব্যয়ত অনুমোদন জনাইছে। দুইলেনযুক্ত এই দলংখনৰ বাবে পৰৱৰ্তী সময়ত নিবিদা আহ্বান কৰা হ'ব। মুখ্যমন্ত্রী ড° হিমন্ত বিশ্ব শৰ্মাই জনোৱা মতে অতি সোনকালেই এই নিবিদা প্ৰক্ৰিয়া আৰম্ভ হ'ব। স্বাভাৱিকতেই এই সংবাদেও মাজুলীবাসীক আনন্দিত কৰিছে, কিন্তু আশ্বস্ত কৰিব পৰা নাই। বিভিন্ন কাৰণত দলং নিৰ্মাণৰ গতি যে লেহেম হৈছে সেয়া তেওঁলোকে বুজিছে। এনে সময়ত চৰকাৰৰ দায়িত্ব মাজুলীবাসীৰ শংকা আঁতৰাই দলং নিৰ্মাণৰ কাম প্ৰকৃতাৰ্থত খৰতকীয়া কৰি তেওঁলোকক আশ্বস্ত আৰু আনন্দিত কৰা। মাজুলীৰ দলঙৰ প্রতিশ্রুতি যে কেৱল এটা নির্বাচনী টোপ নহয় সেয়া প্রমাণ কৰাৰ সময় এয়া- অন্যথা ৰাজনীতিৰ টোপে সাধাৰণ জনসাধাৰণৰ দুৰ্দশা আৰু সপোনক লৈ কেনেকৈ খেলা কৰে তাৰ এক জ্বলন্ত স্বাক্ষৰ হৈ সর্বতোকালৰ বাবে থাকি যাব মাজুলীলৈ দলঙৰ প্ৰসংগ। আমি আশা কৰোঁ চৰকাৰে এনে অসৎ দৃষ্টান্ত কেতিয়াও নাৰাখিব আৰু মাজুলীবাসীয়েও তেওঁলোকৰ সপোনৰ দলং সোনকালেই লাভ কৰিব।

Share This