মুছলমান প্রসংগ

dainik janambhumi March 06, 2025

ডিজিটেল ডেস্ক: বিনিয়োগ বিচাৰি দেশ-বিদেশৰ পৰা মাতি অনা উদ্যোগী তথা বিনিয়োগকাৰীসকলক লৈ অসমত চৰকাৰী উদ্যোগত অনুষ্ঠিত হৈ গ'ল এডভান্টেজ আছাম ২.০। ৰচনা হ'ল এক অভূতপূর্ব উছৱমুখৰ পৰিৱেশৰ। বিনিয়োগকাৰীয়ে কোনো এখন দেশ বা প্রদেশত নিজৰ মূলধন খটুৱাই শিল্প-উদ্যোগ প্রতিষ্ঠা কৰিব খোজে। চৰকাৰে তাৰ বাবে চৰ্ত অনুসৰি কিছু সা-সুবিধা বিনিয়োগকাৰীসকলৰ বাবে আগবঢ়াব লাগে। কাৰণ উদ্যোগ বা আন ব্যাৱসায়িক কেন্দ্ৰ প্রতিষ্ঠাত বহু কাৰকে কাম কৰে। বিনিয়োগকৃত পুঁজিৰ সুৰক্ষা লাগিব। ব্যৱসায়-বাণিজ্য, শিল্প আৰু উৎপাদন-বিতৰণৰ বাবে এটা অনুকূল বাতাৱৰণ লাগিব। দেশৰ আইন-শৃংখলা পৰিস্থিতিলৈ স্বাভাৱিকতা আহিব লাগিব। উত্তেজনা-ঘৃণা-বিদ্বেষ আৰু সংঘাত-সংঘৰ্ষৰ বাতাৱৰণ শিল্প-উদ্যোগৰ বিকাশ আৰু ব্যৱসায় বৃদ্ধিৰ বাবে ক্ষতিকৰ। অস্থিৰ আৰু অশান্ত বাতাৱৰণ উন্নয়ন ত্বৰান্বিত কৰাৰ সহায়ক নহয়। যিকোনো বিনিয়োগৰ আগতে বিনিয়োগকাৰীয়ে দেশখনৰ পৰিস্থিতিৰ ওপৰতো চকু ৰাখিব। 

অসমত একালত চলিছিল ছবছৰীয়া অসম আন্দোলন। তাৰ পাছত আন্দোলনৰ গৰ্ভতে জন্ম হোৱা উগ্রপন্থী সংগঠনৰ কাৰ্যকলাপ। ইয়াৰ লগতে যোগ হ'ল বিভিন্ন জনজাতীয় গোষ্ঠীৰ পৰা জন্ম হোৱা আন বহু উগ্রপন্থী সংগঠনৰ হত্যা-হিংসা, অপহৰণ-ধন দাবী আদি কার্য। কেইবা দশকজোৰা এনে এটা অগ্নিময় পৰিস্থিতিৰ মাজেৰে আগবাঢ়ি আহি অসম আজিৰ পৰ্যায়ত উপনীত হৈছেহি। এতিয়া উগ্রপন্থী সংগঠনৰ ধন দাবী, হত্যা, অপহৰণ আদি কাৰ্য পূৰ্বৰ দৰে চলি থকা নাই। অৱশ্যে, একেবাৰে শেষ হৈ গ'ল নোৱাৰি। কিন্তু সেয়ে হ'লেও পূৰ্বৰ তুলনাত নিয়ন্ত্রণাধীন বুলিব পাৰি। এয়া নিশ্চয় এক আশাব্যঞ্জক কথা। অসমত যদিও হত্যা-হিংসাৰ উগ্রপন্থী সংগঠনে সৃষ্টি কৰা বিভীষিকাৰ তীব্রতা কমিল, তাৰ বিপৰীতে আন ধৰণৰ এক উত্তেজনাই যোৱা সময়ছোৱাত বিশেষভাৱে গা কৰি উঠিল। সেয়া হ'ল সাম্প্রদায়িক চিন্তা আৰু উত্তেজনা। বিশেষকৈ মুছলমানসকলক উদ্দেশ্য কৰি কোনো কোনো সংগঠনে চলোৱা বিদ্বেষপূর্ণ প্ৰচাৰ আৰু ৰটনা। এই ক্ষেত্ৰত সাধাৰণ মানুহৰ বিশেষ ভূমিকা নাই। ইয়াত গতি দিছিল এচাম ৰাজনৈক নেতা-মন্ত্রী আদিয়ে। মুছলমানসকলৰ বিৰুদ্ধে নানা বিদ্বেষ আৰু ঘৃণাসূচক মন্তব্য দিয়াত আগস্থান দখল কৰি আছে ৰাজ্য আৰু কেন্দ্ৰৰ একাংশ মন্ত্রীয়ে। বিভিন্ন প্ৰচাৰ মাধ্যমত তেওঁলোকৰ মন্তব্যসমূহ সিঁচৰতি হৈ আছে। সকলোৰে চকুত পৰাকৈ। গো মাংস খোৱা-নোখোৱা, গো হত্যা আদি বিষয়ক লৈও নানা সংঘাত-সংঘর্ষ, আনকি হত্যাকাণ্ডৰ ঘটনা ঘটি আছে। গো মাংস বিতৰ্কত অৱধাৰিতভাৱে জড়িত হৈ আছে মুছলিম বিদ্বেষ। অলপতে দেশৰ উচ্চতম ন্যায়ালয়েও গো মাংস-গো হত্যাৰ নামত অসমত চলি থকা ঘটনাৱলী সন্দৰ্ভত সতর্কবাণী শুনাব লগা হৈছে। তেনে সময়তে অলপতে অসমৰ মুখ্যমন্ত্ৰীয়ে এখন সভাত মুছলমান সমাজৰ বিষয়ে কৰা মন্তব্য তাৎপর্যপূর্ণ। 

মুখ্যমন্ত্ৰীৰ বক্তব্য- 'মুছলমানৰ পৰা কেতিয়াও বিপদৰ সন্মুখীন নহয় হিন্দুসকল। হিন্দুক দুৰ্বল কৰাৰ আঁৰত আছে হিন্দু সমাজৰেই লোক। মুছলমানক অপমান নকৰিব।' অসমৰ ইতিহাসত অসম আন্দোলনকালীন দিনবোৰ, বিশেষকৈ নেলীৰ ক'লা অধ্যায় বাদ দিলে, হিন্দু-মুছলমানৰ মাজৰ সম্পর্ক মুঠেই তিক্ততাপূর্ণ নাছিল। স্বৰাজোত্তৰ কালৰ প্ৰব্ৰজনৰ প্রসংগ সম্পূর্ণ পৃথক। একালত মানৰ আক্ৰমণ আৰু মোৱামৰীয়া বিদ্ৰোহৰ সংঘৰ্ষৰ পৰিণতিত অসমৰ জনসংখ্যা একেবাৰে হ্রাস পাইছিল। তেনে সময়ত তৎকালীন ভাৰতবৰ্ষৰ বিভিন্ন অংশৰ পৰা অসমলৈ প্রব্রজনক উৎসাহিত কৰা হৈছিল। এ জে মিলছৰ প্ৰতিবেদনত আমি দেখোঁ চুবুৰীয়া বংগৰ জনবহুল এলেকাৰ পৰা অসমলৈ মানুহ আনিবলৈ স্বয়ং আনন্দৰাম ঢেকিয়াল ফুকনে পৰামৰ্শ দিছিল। সাম্প্রদায়িকতা প্রাক্ স্বাধীনতা কালৰ মুছলমান-হিন্দু উভয় সম্প্ৰদায়ৰ একাংশ লোকৰ ক্ষমতা লাভৰ প্ৰতিযোগিতাৰহে ফচল, যাৰ বাবে সাধাৰণ মানুহে চূড়ান্ত মূল্য ভৰিব লগা হৈছিল। ইতিহাসৰ পৰা শিক্ষা গ্রহণ কৰি তেনে নেতিবাচক প্ৰৱণতাসমূহৰ পৰা আমি আঁতৰি আহিব লাগিব। এইখন দেশ-মিশ্রিত জন-গাঁথনি, নানা জাতি-ধৰ্মৰ সহাৱস্থান, বিভিন্ন ভাষা-ভাষীৰ মিলনভূমি। সংঘাতে সংকট আনে কিন্তু সমন্বয়-সদ্ভাৱে দিয়ে উন্নয়নক গতি। স্বামী বিবেকানন্দই লিখি গৈছে যে মুছলমানৰ ভাৰত বিজয়ে নির্যাতিত-নিপীড়িত দৰিদ্ৰ মানুহক মুক্তিৰ সোৱাদ দিছিল। সেই বাবেহে ব্যাপকসংখ্যক লোক ইছলামলৈ ধৰ্মান্তৰিত হৈছিল। কেৱল অস্ত্ৰৰে এনে কাৰ্য সম্ভৱ নহয়। অস্ত্র-শক্তি আৰু ধ্বংসযজ্ঞৰে এনে কৰা বুলি ভবাটোক বিবেকানন্দই মূর্খামি বুলি ক'বলৈও কুণ্ঠাবোধ কৰা নাই। তেওঁ নতুন ভাৰতবৰ্ষ বেদান্তৰ আত্মা আৰু ইছলামৰ শৰীৰৰ সন্মিলনত গঢ়ি উঠিব বুলি আশা কৰিছিল। পৰৱৰ্তী সময়ত বিভিন্ন ৰাজনৈতিক, আর্থ- সামাজিক কর্মকাণ্ডই বিবেকানন্দৰ এই ঐতিহ্যৰ পৰা ভাৰতীয় মানুহক আঁতৰাই আনিলে। এখন ৰাষ্ট্ৰ নিৰ্মাণ আৰু ৰাষ্ট্ৰৰ উন্নয়ন ত্বৰান্বিত কৰাৰ ক্ষেত্ৰত ধৰ্ম-বর্ণ নির্বিশেষে সকলো মানুহৰ অৰিহণাৰ আৱশ্যক। পাৰস্পৰিক সদ্ভাৱ অবিহনে সেই কাম সম্ভৱ নহয়। যোৱা সময়ছোৱাত উচ্ছেদৰ নামত ভুৱা এনকাউণ্টাৰৰ নামত নাইবা আন ধৰণৰ চৰকাৰী দমনমূলক কাৰ্যৰ বাবে একাংশ মুছলমান লোকে নানা ধৰণৰ অবাঞ্ছিত পৰিস্থিতিৰ মুখামুখি হ'ব লগা হ'ল। কাৰণে-অকাৰণে বহুতেই পৰিস্থিতিৰ সুযোগ লৈ মুছলমান বিদ্বেষ বিয়পালে। সময় সকলোৰে শিক্ষক। হয়তো যোৱা সময়ছোৱাৰ ঘটনাৱলী অনুধাৱন কৰি মুখ্যমন্ত্ৰীয়ে এনে ধৰণৰ মন্তব্য কৰিছে। মুখ্যমন্ত্ৰীৰ এই মন্তব্য অত্যন্ত আদৰণীয়।

Share This