ৰাভা হাছং আৰু কংগ্ৰেছ

dainik janambhumi April 03, 2025

ডিজিটেল ডেস্কঃ ৩৩টা সমষ্টিৰ বাবে বুধবাৰে পুনৰবাৰ অনুষ্ঠিত হ'ল ৰাভা হাছং স্বায়ত্ত পৰিষদৰ নির্বাচন। পুৱাৰে পৰা ডেকা-বুঢ়া সকলোৱে দীঘলীয়া শাৰী পাতি ভোটকেন্দ্রসমূহত নিজৰ নিজৰ ভোটাধিকাৰ সাব্যস্ত কৰে। গোৱালপাৰা আৰু কামৰূপ জিলাৰ ৰাভা বসতিপ্রধান অঞ্চলসমূহক সামৰি গঠন হোৱা ৰাভা পৰিষদখনৰ মুঠ সমষ্টি ৩৬টা। তাৰে ৬টা সমষ্টি শাসকীয় বিজেপিক এৰি দি এইবাৰ বাকী ৩০টা সমষ্টিতে টংকেশ্বৰ ৰাভা নেতৃত্বাধীন ৰাভা হাছং যৌথ মঞ্চই প্রতিদ্বন্দ্বিতাত অৱতীর্ণ হৈছে।

 

পূর্বে এই মঞ্চ ৰাভা হাছং যৌথ সংগ্ৰাম সমিতি নামেৰে খ্যাত আছিল। সংগ্রাম সমিতিয়ে দীর্ঘদিন ধৰি অঞ্চলটোৰ সমস্যাৰ সমাধানৰ দাবী, আন্দোলন আদি কৰি আহিছিল। ৰাভা স্বায়ত্তশাসনো তেওঁলোকৰ সংগ্ৰামৰে এক ফল। পিছলৈ নির্বাচনী কাম-কাজত তেওঁলোকৰ 'ৰাভা হাছং যৌথ সংগ্রাম সমিতি' হয়গৈ 'ৰাভা হাছং যৌথ মঞ্চ'। এইবাৰ অবশ্যে তিনিটা সমষ্টিত প্রার্থী বিনা প্রতিদ্বন্দ্বিতাৰে নিৰ্বাচিত হোৱাত বাকী থকা ৩৩টা সমষ্টিতহে নির্বাচনী যুঁজ অনুষ্ঠিত হয়। ১৯৯৫ চনত গঠন হোৱা ৰাভা হাছং স্বায়ত্ত পৰিষদৰ মুঠ সদস্যৰ সংখ্যা ৪০জন। ইয়াৰে ৩৬জনক নিৰ্বাচনৰ জৰিয়তে আৰু আন চাৰিজনক মনোনীত কৰা হয়। তদুপৰি ৩৬টা সমষ্টিৰ ভিতৰত ২৫টা অনুসূচিত জনজাতিৰ বাবে সংৰক্ষিত, ৬টা মহিলাৰ বাবে আৰু ১১টা অসংৰক্ষিত। অসমৰ এটা পুৰণি জনগোষ্ঠী ৰাভাসকলৰ সংখ্যাগৰিষ্ঠতা থকা অঞ্চলসমূহৰ ভৌগোলিক আওতাৰ ভিতৰত বড়ো, গাৰো, হাজং আদি লোকো আছে। এই জনগোষ্ঠীয় লোকেও পৰিষদৰ নির্বাচনত অৱতীৰ্ণ হোৱাৰ সুযোগ লাভ কৰি আহিছে। সি যি নহওক, এইবাৰৰ নির্বাচনটোক লৈ সর্বাধিক চর্চিত বিষয়টো হৈছে- বিৰোধীৰ নিষ্প্রভ ভূমিকা।

 

এই কথা অপ্রিয় সত্য যে ৰাভা হাছঙৰ পূৰ্বৰ নিৰ্বাচনসমূহত বিৰোধী শক্তিৰ যুঁজ সক্রিয় আছিল আৰু শাসক-বিৰোধীৰ মাজত তীব্র প্রতিদ্বন্দ্বিতা দেখা গৈছিল। নির্বাচনী প্রচাৰেই হওক, সমস্যাক লৈ যুক্তি-তর্ক কিম্বা আন আন নির্বাচনী ব্যবস্থাসমূহেই হওক, দুয়োপক্ষ সমানে মূৰ দাঙি উঠিছিল, যেন 'সমানে সমানে কৰিবা কাজ, হাৰিলে জিকিলে নাই লাজ'। আনকি ভোটগ্রহণ, ভোট গণনা তথা ফলাফল ঘোষণালৈকে তীব্র উৎকণ্ঠাৰ লগতে ঠায়ে ঠায়ে উত্তপ্ত পৰিস্থিতি, সংঘাত তথা হিংসাপূর্ণ পৰিৱেশো সৃষ্টি হৈছিল। এইবাৰ তেনে পৰিৱেশ মুঠেই পৰিলক্ষিত নহ'ল। নাই কোনো ৰাজনৈতিক সংঘাত, নাই কোনো উত্তপ্ত পৰিস্থিতি, নাছিল জোৰদাৰ প্ৰচাৰো। এইখিনিতে ৰাইজৰ প্ৰশ্ন- বিৰোধীৰ ভূমিকা ইমান নিষ্প্রভ হ'ল কিয়? প্রধান বিৰোধী দল হিচাপে কংগ্রেছে ৩৪টা সমষ্টিত প্রার্থী দিও কিয় সক্রিয়ভাৱে কাম-কাজ কৰা দেখা নগ'ল? শাসকীয় পক্ষৰ পৰা মুখ্যমন্ত্রী ড° হিমন্ত বিশ্ব শর্মা, কেন্দ্রীয় মন্ত্রী সর্বানন্দ সোণোৱাল, কেবিনেট মন্ত্রী পীয়ূষ হাজৰিকা, ৰাজ্যিক বিজেপিৰ সভাপতি দিলীপ শইকীয়াকে ধৰি বিভিন্নজন নেতাই ৰাভা হাছঙত প্ৰচাৰ অভিযানত নামি পৰিল। কিন্তু কংগ্ৰেছৰ তেনে কেইজন ৰাজ্যিক নেতাক দেখা গ'ল? সাংসদ গৌৰৱ গগৈ, ৰকিবুল হুছেইনৰ পৰা প্রদ্যুৎ বৰদলৈলৈ, বিৰোধী দলপতি দেৱব্রত শইকীয়াৰ পৰা প্রদেশ কংগ্রেছৰ সভাপতি ভূপেন বৰালৈ সকলোৰে মাজত দেখা গ'ল আশ্চর্যজনক উদাসীনতা। আনকি ২০২৩ চনৰ ফেব্ৰুৱাৰী মাহতে এ আই চি চিৰ সভাপতি মল্লিকার্জুন খৰ্গেই অসম কংগ্ৰেছৰ ৰাজনৈতিক দিশ চোৱা-চিতাৰ বাবে গঠন কৰি দিয়া ১৯জনীয়া 'পলিটিকেল এফেয়াৰ্ছ কমিটী'ও ৰাভা হাছঙৰ নিৰ্বাচন সন্দৰ্ভত নীৰৱ হৈ থাকিল। কমিটীৰ এজনো সদস্যক ৰাভা হাছঙত নির্বাচনী প্রচাৰ চলোৱা দেখা নগ'ল।

 

বৰং, মুখ্যমন্ত্রীয়ে ৰাভা হাছঙত প্রচাৰ চলাই থকাৰ দিনা গুৱাহাটী আৰু তেজপুৰত জিতেন্দ্র সিঙৰ উদ্যোগত নেতাসকলে দলীয় বৈঠকতহে ব্যস্ত থাকিল। ইয়াৰ বিপৰীতে আকৌ কেইবাজনো কংগ্রেছ প্রার্থীয়ে ৰাভা হাছঙৰ ভোটগ্রহণৰ কেইদিনমান পূর্বে নিজৰ নিজৰ মনোনয়ন উঠাইহে ল'লে, যি কার্যই বিজেপি মিত্রজোঁটৰ তিনিজন প্রার্থীক বিনা প্রতিদ্বন্দ্বিতাৰে নিৰ্বাচিত হোৱাত সুবিধা কৰি দিলে। কিন্তু কিয় তেওঁলোকে মনোনয়ন উঠাই ল'লে? এই সন্দর্ভতো ভূপেন বৰা নিষ্প্রভ হৈ থাকিল। তেওঁ মাত্র গোৱালপাৰা জিলা আৰু কামৰূপ ইউনিটৰ সভাপতিলৈ এখনকৈ পত্ৰ প্ৰেৰণৰ লগতে এজন ৰাজ্যিক সম্পাদকক বিষয়টো চাবলৈ নির্দেশ দিয়েই দায়িত্ব সামৰি থ'লে। কথাবোৰে ৰাইজৰ মাজত সন্দেহৰ সৃষ্টি নকৰাকৈ থকা নাই। কিয়নো, দেখাত সৰু যেন লাগিলেও এনেধৰণৰ নির্বাচনেই একোটা ৰাজনৈতিক দলক উৎসাহিত কৰিব পাৰে, সাহস-মনোবল দিব পাৰে। অথচ ২০২৬ চনত বিজেপিক প্রতিহত কৰিবলৈ প্রস্তুত হোৱা তথা প্রতিদিনে তেনে হুংকাৰ দি অহা এটা ৰাষ্ট্ৰীয় পৰ্যায়ৰ ৰাজনৈতিক দলৰ এনে নিষ্ক্রিয়তাত ৰাইজ আচৰিত হোৱা তথা সমালোচনামুখৰ হোৱাত আচৰিত হ'বলগীয়া একো নাই। ৰাইজে ভাবিছিল ২০১৯ চনৰ ৰাভা হাছঙৰ নিৰ্বাচনত কংগ্ৰেছৰ বৃহৎ পৰাজয়ৰ পাছত দলটোৱে গোপনে তৎপৰতা অব্যাহত ৰাখিব আৰু এইবাৰ তাৰ পোটক ল'ব পৰাকৈ ৰণকৌশল প্রস্তুত কৰিব। সেইবাৰৰ নিৰ্বাচনত ৩৬খন আসনৰ ভিতৰত ৩৩খন আসনেই ৰাভা হাছং যৌথ মঞ্চই লাভ কৰাৰ বিপৰীতে মাত্র এখন আসনতে সন্তুষ্ট থাকিবলগীয়া হৈছিল কংগ্রেছ, য'ত বিজেপি আৰু অগপয়ো এখনকৈ আসন লাভ কৰিছিল। ইয়াৰ পাছতো কিন্তু দলটোৱে ভুলৰ পৰা শিক্ষা নল'লে। কেৱল শিক্ষাই নহয়, প্রচেষ্টাও শূন্য কৰি ৰাখিলে। অৱশ্যে দলটোৰ উদাসীনতাক লৈ সৃষ্টি হোৱা বিতৰ্কৰ পৰা হাত হাৰিবলৈ বুধবাৰে বকোৰ বিধায়ক নন্দিতা দাসে সংবাদ মাধ্যমৰ আগত কয় যে বিজেপিয়ে প্রশাসন আৰু আৰক্ষীক সম্পূৰ্ণৰূপে নিজৰ স্বাৰ্থত ব্যৱহাৰ কৰিছে। মিত্ৰজোঁটৰ প্ৰাৰ্থী আৰু একাংশ দুষ্কৃতিকাৰীয়ে কংগ্ৰেছৰ প্ৰাৰ্থী আৰু নেতাসকলক ভাবুকি দি আহিছে।

 

সেয়ে কংগ্ৰেছৰ নেতা-কর্মীসকলে মুকলিকৈ নির্বাচনত অংশ লোৱা নাই। কিন্তু তেওঁলোকে ঘৰে ঘৰে গৈ কাৰ্যসূচী লৈছে। তাৰ ফল এইবাৰ তেওঁলোকে ভালদৰেই পাব। অন্ততঃ ৰাভা হাছঙত হোৱা দুর্নীতি-অনিয়ম তথা অপশাসনৰ ৰায় ৰাইজে দিব। বিধায়ক দাসৰ এই কথা কিমানদূৰ সত্য হ'ব সেয়া ৪ এপ্রিলতহে পৰিষ্কাৰ হ'ব। অৱশ্যে ৰাভা হাছঙৰ প্রাক্তন মুখ্য কাৰ্যবাহী তথা ৰাভা হাছাং যৌথ মঞ্চৰ মুৰব্বী টংকেশ্বৰ ৰাভাই কয় যে এইবাৰৰ নির্বাচনে অঞ্চলটোত যে শান্তিৰ বাতাৱৰণ গঢ় লৈ উঠিছে তাৰেই প্রমাণ দাঙি ধৰিছে। তেওঁৰ মতে, নিকা শাসনৰ বাবে ৰাইজে তেওঁলোকক ভাল পাইছে, বিশ্বাস কৰিছে আৰু পুনৰবাৰ কাম কৰিবলৈ আগবঢ়াই দিব। সি যি নহওক, টংকেশ্বৰ ৰাভাই কোৱাৰ দৰে হিংসা-বর্জিত পৰিৱেশত শান্তিপূর্ণভাৱে জনগণৰ মত গ্ৰহণ আৰু চৰকাৰ গঠন সুস্থ গণতান্ত্রিক প্রক্রিয়াৰে নিদর্শন। কিন্তু এই কথাও মনত ৰখা দৰকাৰ হ'ব- 'বিৰোধীশূন্য-অৱস্থা' সেই একেটা গণতান্ত্রিক ব্যৱস্থাৰ বাবেই আকৌ মুঠেই শুভ পৰিচায়ক নহ'ব।

Share This