চাইবাৰ অপৰাধ

Dainik janambhumi February 11, 2025

ডিজিটেল ডেস্ক: সমগ্র দেশজুৰি ভয়ংকৰভাৱে বৃদ্ধি পাইছে চাইবাৰ অপৰাধৰ ঘটনা। প্রতিদিনে চাইবাৰ অপৰাধীৰ দ্বাৰা সংঘটিত কাৰ্যকলাপক লৈ উদ্বিগ্ন হৈ পৰিছে কেন্দ্রীয় চৰকাৰ। স্বয়ং দেশৰ ৰাষ্ট্ৰপতিয়ে শেহতীয়াভাৱে সংসদৰ যুটীয়া অধিৱেশনত বিষয়টো সন্দর্ভত গভীৰ চিন্তা ব্যক্ত কৰিছে। ৰাষ্ট্ৰপতি দ্রৌপদী মুর্মুৱে কয় যে ডিজিটেল প্রৱঞ্চনা, চাইবাৰ অপৰাধ, ডীপ ফেকৰ দৰে প্রযুক্তিয়ে ভাৰতৰ সামাজিক, অর্থনৈতিক আৰু ৰাষ্ট্ৰীয় নিৰাপত্তাৰ প্ৰতি ভাবুকিৰ সৃষ্টি কৰিছে। 

চাইবাৰ অপৰাধীৰ জালত নপৰিবলৈ চৰকাৰ-আৰক্ষী-প্রশাসনে সাধাৰণ ৰাইজক প্রতিদিনেই সজাগ হোৱাৰ লগতে অধিক সতৰ্কতা অৱলম্বন কৰি আহিছে যদিও নিতৌ ন ন কৌশলেৰে চাইবাৰ অপৰাধীয়ে জালত পেলাইছে যিকোনো লোকক। 'হেক' কৰা হৈছে চৰকাৰী ৱেবছাইট। ছ'চিয়েল মিডিয়াযোগে সহজতে বিভিন্ন লোকক 'টার্গেট' কৰি কষ্টোপার্জিত ধন সৰকাই নিয়া হৈছে। চাইবাৰ অপৰাধীয়ে ফেচবুক, ৱাটছএপৰ জৰিয়তে অতি সহজে লুণ্ঠনৰ জাল পাতি সৰ্বস্বান্ত কৰিছে সাধাৰণ জনতাক। এই মাধ্যমসমূহৰ জৰিয়তে ব্লেকমেইলিং কৰি দুষ্ট চক্ৰই প্রতিদিনে চলাই গৈছে লুণ্ঠন অভিযান।বিমুদ্ৰাকৰণৰ পাছত প্রধানমন্ত্রী নৰেন্দ্ৰ মোদীয়ে দেশবাসীক নগদ ধনৰ জৰিয়তে ডিজিটেল লেনদেন কৰিবলৈ আহ্বান জনাইছিল। সেই সময়ৰ পৰাই দেশত ডিজিটেল লেনদেন অভূতপূর্বভাৱে বৃদ্ধি পায়। কিন্তু সম্প্ৰতিক সময়ত চাইবাৰ অপৰাধীৰ তৎপৰতা বৃদ্ধি পোৱাত ডিজিটেল লেনদেনৰ বাবে দেশৰ অধিকাংশ লোক আতংকিত হৈ পৰিছে। চাইবাৰ অপৰাধ ৰোধ কৰাৰ বাবে চৰকাৰ, আৰক্ষী তথা বিভিন্ন সংস্থাই বিভিন্ন ধৰণৰ ব্যৱস্থা হাতত লৈছে যদিও ইয়াৰ সমান্তৰালভাৱে চাইবাৰ অপৰাধীৰ সংখ্যাও বৃদ্ধি পাইছে। দেশৰ অন্য ৰাজ্যৰ কথা বাদেই, কেৱল কেৰালাতে ২০২৪ বৰ্ষত সংঘটিত চাইবাৰ অপৰাধৰ ঘটনাই এক ভয়ংকৰ ভৱিষ্যতৰ অশনি সংকেত কঢ়িয়াইছে। ৰাজ্যখনত ২০২৪ বর্ষত ৪১,৪২৬টা চাইবাৰ অপৰাধৰ ঘটনা সংঘটিত হৈছে। সাধাৰণ জনতাই হেৰুৱাবলগা হৈছে ৭৩৫ কোটি টকা। গৃহ মন্ত্ৰ্যালয়ৰ এক তথ্য মতে, চাইবাৰ অপৰাধীৰ সহজ মঞ্চ হৈছে হোৱাটছএপ। গৃহ মন্ত্ৰ্যালয়ৰ অধীনত নেশ্যনেল চাইবাৰ ৰিপ'র্টিং প্লেটফৰ্ম (এন চি আৰ পি)ৰ তথ্য অনুসৰি, যোৱা চাৰিটা বৰ্ষত দেশত প্ৰৱঞ্চনাৰ জালত পৰি সৰ্বসাধাৰণ জনতাই হেৰুৱাইছে ৩৩,১৬৫ কোটি টকা। 

২০২১ চনত ৫৫১ কোটি টকা, ২০২২ চনত ২,৩০৬ কোটি টকা, ২০২৩ চনত ৭,৪৯৬ কোটি টকা আৰু ২০২৪ চনত সর্বাধিক ২২,৮১২ কোটি টকা চাইবাৰ অপৰাধীয়ে সৰকাবলৈ সক্ষম হয়। চাইবাৰ অপৰাধৰ বিৰুদ্ধে ২০২৪ বর্ষত ১৭,১০,৫০৫টা অভিযোগ লাভ কৰা হৈছিল বুলিও তথ্যত প্রকাশ। বিগত চাৰিটা বৰ্ষত চাইবাৰ অপৰাধৰ ঘটনা ৯০০ শতাংশ বৃদ্ধি পাইছে। ঝাৰখণ্ড, ৰাজস্থান, হাৰিয়ানা, উত্তৰ প্ৰদেশ, পশ্চিম বংগ, গুজৰাট, বিহাৰ, কৰ্ণাটক, কেৰালাৰ দৰে ৰাজ্য চাইবাৰ অপৰাধীৰ ঘাটিত পৰিণত হৈছে। যোৱা ডেৰটা দশকত চাইবাৰ অপৰাধৰ সংখ্যা বৃহৎ পৰিমাণে বৃদ্ধি পাইছে। ২০০৬ চনত সমগ্র দেশত ৪৫৩ টা চাইবাৰ অপৰাধৰ ঘটনা সংঘটিত হৈছিল যদিও এই সংখ্যা ২০১৮ চনত ২.০৮ লাখলৈ আৰু ২০২০ চনত ১১.৫৮ লাখ, ২০২১ চনত ১৪ লাখলৈ বৃদ্ধি পায়। বর্তমান সময়ত প্রযুক্তি বিদ্যাৰ উত্থানৰ লগে লগে চাইবাৰ অপৰাধীয়ে ইয়াৰ অপপ্রয়োগ কৰি চৌদিশে লুণ্ঠনৰ জাল মেলি দিছে। শেহতীয়াভাৱে কৃত্রিম বুদ্ধিমত্তাৰ ব্যৱহাৰ কৰি 'ভয়চ ক্লনিঙ'ৰ জৰিয়তেও ভয়ংকৰ লুণ্ঠনৰ বেহু তৰিছে এই চক্ৰই। এ আইৰ জৰিয়তে কোনো এজন ব্যক্তিৰ কণ্ঠস্বৰ হুবহু নকল কৰি দুষ্কৃতিকাৰীয়ে প্রবঞ্চনা কৰা এতিয়া সহজসাধ্য হৈ পৰিছে। আমাৰ ৰাজ্য অসমো এতিয়া চাইবাৰ অপৰাধীৰ হটস্পটত পৰিণত হৈছে। যেন অন্য এক 'জামতাৰা'লৈ পৰ্যবসিত হৈছে ৰাজ্যৰ হৃদপিণ্ডস্বৰূপ গুৱাহাটী মহানগৰী। 

ৰাজ্যখনত ২০১৩ চনত ১৫৪টা, ২০১৪ চনত ৩৭৯টা, ২০১৫ চনত ৪৮৩টা, ২০১৬ চনত ৫৯০টা, ২০১৭ চনত ১১২০টা, ২০১৮ চনত ২০২২টা, ২০১৯ চনত ২২৩১টা অপৰাধমূলক ঘটনা সংঘটিত হয়। অতি শেহতীয়াভাৱে ৰাজ্যৰ ভিন্ন প্ৰান্তৰ পৰা ইজনৰ পাছত সিজন চাইবাৰ অপৰাধী আৰক্ষীৰ জালত পৰিছে। ডিজিটেল এৰেষ্টৰ নামত গুৱাহাটীত বাহৰ পাতি দেশৰ বিভিন্ন ধনাঢ্য ব্যক্তি-ব্যৱসায়ীক টার্গেট কৰি লোৱা এনে দুষ্কৃতিকাৰীৰ বিৰুদ্ধে শেহতীয়াভাৱে কৰ্ণাটক আৰক্ষীয়ে অভিযান চলাই এজনক আটক কৰিবলৈ সক্ষম হয়। সাধাৰণ জনতাৰ বেংক একাউণ্টৰ পৰা দিল্লীৰ হেকাৰ চক্ৰক প্ৰদান কৰি অহা আন এটা অপৰাধ চক্ৰকো আৰক্ষীয়ে আটক কৰিছে। এনে প্রেক্ষাপটত ডিজিটেল লেনদেনৰ সমান্তৰালভাৱে চাইবাৰ অপৰাধৰ ক্ষেত্ৰত চৰকাৰে গ্ৰহণ কৰিবলগীয়া কাৰ্যপন্থাক লৈ বিভিন্ন পক্ষই প্রশ্ন উত্থাপন কৰিছে। এইক্ষেত্রত এটা কথা ঠিক যে চাইবাৰ অপৰাধৰ ক্ষেত্ৰত ৰাইজ সজাগ নহ'লে অপৰাধৰ সংখ্যা বৃদ্ধি পোৱাৰ লগতে অপৰাধীৰ তৎপৰতাও বৃদ্ধি পাব।

Share This