উৰণ সেতু

Dainik janambhumi January 31, 2025

ডিজিটেল ডেস্ক : ৰাজ্যখনৰ উন্নয়নৰ ক্ষেত্রত বিজেপি নেতৃত্বাধীন শাসনাধিষ্ঠ চৰকাৰখনে বিগত সময়ত ভালেমান কাম হাতত লৈছে আৰু ইয়াৰে বহুখিনি কাম ইতিমধ্যে সম্পন্ন হৈছে। সুচল যাতায়াত আৰু সময় ৰাহিৰ ক্ষেত্ৰত গুৰুত্ব প্রদান কৰি ৰাজ্যখনৰ ইমূৰৰ পৰা সিমূৰলৈ বিগত সময়ছোৱাত পথ নিৰ্মাণৰ কামৰ লগতে কেইবাখনো দলং নিৰ্মাণৰ কাম হাতত হৈছে। বহুকেইখন উৰণীয়া সেতু নিৰ্মাণ কৰিছে। 

২০২৪ চনত বহুকেইখন উৰণ সেতু মুকলি কৰা হৈছে। বৰ্ষটোৰ ২৯ ফেব্ৰুৱাৰীত বৰপেটাৰোডত 'অটল উৰণ সেতু' ৰাইজৰ বাবে মুকলি কৰা হয়। বৰপেটাৰোড ৰে'ল ষ্টেছন আৰু সৰুপেটা ৰে'ল ষ্টেছনৰ মাজত মুঠ ৪২.১১ কোটি টকা ব্যয়সাপেক্ষে নিৰ্মাণ কৰা হৈছিল দুইলেনযুক্ত ৰে'লৱে অভাৰ ব্ৰীজখন। পাঠশালা আৰু ছিমলাগুৰিৰ উৰণ সেতু দুখনো ৰাইজৰ বাবে মুকলি কৰা হয়। একেটা বৰ্ষতে হোজাইৰ মাজমজিয়াত ৰে'লৱে উৰণ সেতু মুকলি কৰা হয়। শেহতীয়াভাবে ডিব্ৰুগড় জিলাত চাৰিখনকৈ উৰণ সেতুৰ আধাৰশিলা স্থাপন কৰে মুখ্যমন্ত্রীয়ে। ৰাজ্যৰ ৰাজধানী গুৱাহাটী মহানগৰীৰ উন্নয়নৰ বাবেও চৰকাৰে নিৰন্তৰ প্ৰচেষ্টা চলাই আহিছে। কেইবাখনো উৰণ সেতু নিৰ্মাণৰ লগতে সমন্বিত ট্রেফিক নিয়ন্ত্রণ ব্যৱস্থা, শীত-তাপ নিয়ন্ত্রিত বাছ আস্থান, একাধিক নতুন উদ্যান নির্মাণকে ধৰি বহু উদ্যোগ চৰকাৰে গ্ৰহণ কৰিছে। 

এক কথাত ক'বলৈ গ'লে গুৱাহাটী মহানগৰ এতিয়া যেন 'ফ্লাইঅ'ভাৰ চিটি' হিচাপে চিহ্নিত হৈছে। উত্তৰ-পূবৰ দুৱাৰমুখ গুৱাহাটী মহানগৰীত ২০২৩ চনৰ ১৯ অক্টোবৰত আৰ জি বৰুৱা ৰ'ডৰ শ্ৰদ্ধাঞ্জলি উৰণ সেতুৰ শুভ উদ্বোধন কৰা হৈছিল। মাত্র ১৯ মাহতেই সম্পূর্ণ হৈছিল এই সেতুৰ নিৰ্মাণকাৰ্য। একেদৰে অসমৰ আটাইতকৈ দীর্ঘতম আৰু সৌন্দৰ্যময় উৰণ সেতু নীলাচল উৰণ সেতুখন ৰাইজৰ বাবে মুকলি কৰা হৈছিল ২০২৩ চনৰ ৩০ আগষ্টত। ৩৫ মাহৰ ভিতৰত নিৰ্মাণ সম্পূৰ্ণ হৈছিল সেতুখনৰ। ২০২৪ চনৰ ১ ফেব্ৰুৱাৰীত গুৱাহাটী-গড়ভঙা পথত চাইকেল ফেক্টৰী সংযোগস্থলত ২.৮৪ কিল 'মিটাৰ দৈর্ঘ্য আৰু ৩ লেন (১২ মিটাৰ) প্ৰস্থৰ উৰণ সেতুৰ আধাৰশিলা স্থাপন কৰা হয়। এই উৰণ সেতুখনৰ সংযোগস্থলসমূহ হ'ল চাইকেল ফেক্টৰী সংযোগস্থল আৰু বিষ্ণুপুৰ সংযোগস্থল, বর্ষাপাৰা ক্রিকেট ষ্টেডিয়াম আৰু লালগণেশ বজাৰ। আনহাতে, গুৱাহাটী মহানগৰীত সংযোজন হ'ব আন এখন উৰণ সেতু। ৰুক্মিণী গাঁৱত ইতিমধ্যেই কাম চলি আছে এই উৰণ সেতুখনৰ। ছয়মাইলৰ পৰা সংযোগ কৰি ছুপাৰ মার্কেটলৈ নিৰ্মাণ হ'ব এই উৰণ সেতুখন। ভৰলুমুখতো চলি আছে উৰণ সেতুৰ নিৰ্মাণকাৰ্য। 

আনহাতে, নুনমাটিৰ পৰা আমবাৰীলৈকে আন এখন উৰণীয়া সেতুৰ নিৰ্মাণকার্যও চলি আছে। এই উৰণ সেতুসমূহৰ নিৰ্মাণকাৰ্যৰ ফলত মহানগৰবাসীয়ে প্রতিদিনে ভয়ংকৰ যান-জঁটৰ সম্মুখীন হোৱাই নহয়, ভীষণভাৱে প্ৰদূষিত হৈছে উত্তৰ-পূবৰ হৃদপিণ্ডস্বৰূপ গুৱাহাটী মহানগৰী। এক কথাত ধূলিৰ চহৰলৈ পৰিণত হৈছে গুৱাহাটী মহানগৰী। প্ৰদূষিত হৈ পৰিছে গুৱাহাটীৰ বায়ুমণ্ডল। ধূলিৰ আচ্ছাদনে ঢাকি ৰাখিছে বায়ুমণ্ডল, যি প্ৰতিগৰাকী মহানাগৰিকৰ বাবে এক চিন্তাৰ কাৰক হৈ পৰিছে। ফাগুন মাহত ধূলিয়ে ছানি ধৰে চৌদিশ। কিন্তু গুৱাহাটীত এতিয়া প্রতিদিনেই যেন ফাগুনময় পৰিৱেশ। বিগত এসপ্তাহে গুৱাহাটীৰ আকাশ কুঁৱলীৰ শুকুলা আচ্ছাদনে ছানি ধৰিছে। মানুহৰ স্বাস্থ্যৰ প্ৰতি এই প্রদূষণে বিপদ কঢ়িয়াব বুলি আশংকা কৰা হৈছে। মানুহৰ মাজত শ্বাস-প্রশ্বাসজনিত ৰোগ, হৃদৰোগকে ধৰি নানা ৰোগ বৃদ্ধি পাবলৈ ধৰিছে। প্রাকৃতিকভাৱে সমৃদ্ধ চহৰ গুৱাহাটী সেউজীয়া গছ-গছনি, পাহাৰেৰে ভৰা। কিন্তু ব্যাপক হাৰত প্ৰকৃতি ধ্বংসৰ ফলত কেৱল গুৱাহাটীয়েই নহয়, সমগ্র অসমতেই নাই প্ৰকৃতিৰ সেই বিনন্দীয়া ৰূপ। যাৰ কুফল আজি আমি ভুগিবলৈ ধৰিছোঁ। প্রাকৃতিক ভাৰসাম্য বৰ্তাই ৰাখিব নোৱাৰিলে অনাগত দিনত ই অধিক ভয়ংকৰ হৈ উঠিব। 

শেহতীয়াভাৱে প্রকাশিত তথ্য অনুসৰি, দেশৰ সৰ্বাধিক প্ৰদূষিত ৰাজ্য হৈছে অসম। আটাইতকৈ প্ৰদূষিত অঞ্চল হৈছে দিছপুৰ। বিষময় হৈ পৰিছে ৰাজ্যৰ ৰাজধানী। দেশৰ ৰাজধানীকো এইক্ষেত্ৰত চেৰ পেলাইছে গুৱাহাটীয়ে। কেন্দ্রীয় প্রদূষণ নিয়ন্ত্ৰণ পৰিষদে ২২ জানুৱাৰীত প্ৰকাশ কৰা তথ্য অনুসৰি, গুৱাহাটীৰ বায়ুৰ মান সূচকাংক (এ কিউ আই) হৈছে ২৯০। দেশৰ ভিতৰতে পঞ্চম প্ৰদূষিত চহৰ হৈ পৰিছে গুৱাহাটী। মহানগৰীত চলি থকা অবাধ নির্মাণকাৰ্য, যান-বাহনৰ সংখ্যা ভয়ংকৰভাৱে বৃদ্ধি পোৱা আদি কাৰণত এনে এক পৰিস্থিতিৰ সৃষ্টি হৈছে। এইবোৰৰ মাজতে কোটি কোটি টকা ব্যয়েৰে নিৰ্মাণ কৰা মহানগৰীৰ জি এছ ৰ'ডৰ ছয়মাইল উৰণ সেতুখন এতিয়া ভাঙি পেলোৱাৰ পৰিকল্পনা কৰিছে লোকনির্মাণ বিভাগে। উদ্বোধনৰ মাত্র ১৫ বছৰৰ ব্যৱধানতে প্রায় ৭০-৮০ কোটি টকা পানীত পেলাই ছয়মাইল উৰণ সেতুখন সম্পূৰ্ণৰূপে ভাঙি পেলাই ৰাজকোষৰ ধনেৰে নতুনকৈ এখন উৰণ সেতু নিৰ্মাণৰ চিন্তা-চৰ্চা কৰিছে। যাতায়াতৰ বাবে বিপজ্জনক হৈ পৰা ফ্লাইঅ'ভাৰখনৰ বৰ্তমান মেৰামতিৰ কাম অব্যাহত আছে যদিও যিকোনো মুহূৰ্ততে বিপদ ঘটাৰ আশংকা ব্যক্ত কৰা হৈছে। 

উল্লেখযোগ্য যে ছয়মাইল উৰণ সেতুখনৰ বিগত ২০২১ চনৰ পৰা মেৰামতি অব্যাহত আছে। উৰণ সেতুখনৰ কেইবাটাও খুঁটা তললৈ বহি যোৱাত যান-বাহনৰ বোজা বহন কৰিব নোৱৰা হৈ পৰে। যদিহে এয়া হয়, তেতিয়াহ'লে পুনৰ যমৰ যাতনা ভুগিব লাগিব মহানগৰবাসীয়ে। প্ৰদূষণে বিষাক্ত কৰিব আকাশ-বতাহ। কিন্তু এইক্ষেত্ৰত চৰকাৰ-প্রশাসনে কোনোধৰণৰ গুৰুত্ব দিয়া পৰিলক্ষিত হোৱা নাই। বর্ধিত জনসংখ্যা, বর্ধিত যান-বাহনৰ চলাচলৰ পৰিপ্ৰেক্ষিতত গুৱাহাটীৰ দৰে মহানগৰীৰ উৰণ সেতুৰ গত্যন্তৰ নাই ঠিকেই, কিন্তু এইবোৰ নিৰ্মাণৰ সময়ত জনস্বাস্থ্যলৈ গুৰুত্ব দিয়াটোও চৰকাৰৰ দায়িত্ব। বিকাশৰ লগতে কংক্রিটৰ অৰণ্য সৃষ্টিয়েই শেষ কথা হ'ব নোৱাৰে।

Share This