বাজেটে কি দিলে

dainik janambhumi February 03, 2025

ডিজিটেল ডেস্ক: বিত্ত মন্ত্ৰী নিৰ্মলা সীতাৰমণে শনিবাৰে সংসদত দাখিল কৰা ২০২৫-২৬ বৰ্ষৰ কেন্দ্রীয় বাজেটখনত দৃষ্টিপাত কৰিলে তাৰ পৰা আচলতে কি পাব বা কি নাপাব, তাৰ স্পষ্ট ধাৰণা এটা থাওকতে সাধাৰণ মানুহে ল'বলৈ সক্ষম নহ'ব পাৰে, কিন্তু ১২ লাখ টকাৰ আয়লৈকে আয়কৰ ৰেহাই দিয়াৰ প্ৰস্তাৱটোৱে নিম্ন মধ্যবিত্ত মানুহখিনিক যে এটা অভাৱনীয় সকাহ দিলে সেইটো একে আষাৰে কৈ দিব পাৰি। 

বছৰি ৭-৮ লাখ টকা আয় কৰা ব্যক্তি এজনেহে বুজি পায় এইখিনি ধনেৰে সংসাৰ এখনৰ প্ৰয়োজনবোৰ পূৰণ কৰি মধ্যবিত্তীয় জীৱন এটা যাপন কৰাটো কিমান কষ্টকৰ; তেনেস্থলত যদি এইখিনি আয়ৰ বাবে বছৰৰ মূৰত ৪০-৫০ হাজাৰ টকা আয়কৰ দিবলগা হয় তেতিয়া ব্যক্তিজনৰ মনৰ অৱস্থাটো কি হ'ব পাৰে, সেয়া ধাৰণা কৰা কঠিন নহয়। সেইবাবে ১২ লাখ টকালৈকে আয়কৰ ৰেহাইৰ প্ৰস্তাৱটোৱে নিম্ন মধ্যবিত্ত পৰিয়ালৰ উপাৰ্জনকাৰীক, বিশেষকৈ চাকৰিজীৱীসকলক যি আনন্দ দিছে সেয়া উপলব্ধি কৰিব পৰা গৈছে। তিনিটা কাৰ্যকালৰ বাবে ক্ষমতাত অধিষ্ঠিত হোৱাৰ বিৰল সৌভাগ্যৰ গৰাকী হোৱা নৰেন্দ্ৰ মোদীৰ চৰকাৰখনে পূৰ্বৰ বাজেটবিলাকত আয়কৰ ৰেহাইত কার্পণ্য প্ৰদৰ্শন কৰি অহাৰ পাছত এইবাৰ এনে উদাৰতাৰ কাৰণ কি বা অর্থনীতিত কি প্ৰভাৱ পৰিব সেয়া পৰৱৰ্তী সময়ত প্রত্যক্ষ হ'ব, কিন্তু ইয়াৰ ফলত যে উক্ত ৰেহাইৰ সীমাই চোৱা ব্যক্তিসকলৰ ক্ৰয় ক্ষমতা বৃদ্ধি পাব, সেয়া নিশ্চিত। এই বাজেটৰ পৰা অসমবাসীয়ে পোৱা পোনপটীয়া শুভ সংবাদটো হ'ল নামৰূপত ১২.৭ লাখ টকা উৎপাদনক্ষম এটা ইউৰিয়া প্রকল্প স্থাপনৰ প্ৰস্তাৱ। নামৰূপৰ বৰ্তমানৰ সাৰ কাৰখানাটোক লৈ সুদীর্ঘ দিন অনিশ্চয়তা বিৰাজ কৰি থকা, বৰ্তমান উৎপাদনক্ষম হৈ থকা তৃতীয়টো গোটৰো আয়ুস টুটি আহিবলৈ ধৰা তথা চতুৰ্থটো গোট স্থাপনৰ ক্ষেত্ৰত লুকা-ভাকু খেলি থকা অৱস্থাত ৰাজ্যৰ আন বহুকেইটা উদ্যোগৰ দৰে এই সাৰ কাৰখানাটোৰো অপমৃত্যু ঘটিব বুলি প্রবল আশংকাৰ সৃষ্টি হৈছিল। 

এনে অৱস্থাতে কেন্দ্ৰীয় বাজেটৰ নতুন এটা ইউৰিয়া প্ৰকল্প স্থাপনৰ প্ৰস্তাৱটো অসমবাসীৰ বাবে 'মাষ্টাৰ ষ্ট্ৰ'ক'ৰ দৰে সংবাদ। কিন্তু কথা হ'ল এইটো বৰ্তমানৰ উদ্যোগটোৰ বহুচৰ্চিত চতুর্থটো গোট নে ই সম্পূর্ণ এটা নতুন সুকীয়া প্রকল্প সেইটো বাজেটত স্পষ্ট কৰা নাই আৰু এই প্ৰকল্পৰ বাবে বাজেটত ধন ধার্য কৰাও পৰিলক্ষিত হোৱা নাই। মুখ্যমন্ত্রী ড° হিমন্ত বিশ্ব শর্মাইহে কৈছে যে এই প্রকল্পটো ১০ হাজাৰ কোটি টকা ব্যয়সাপেক্ষ হ'ব। গতিকে বাজেট ঘোষিত এই ইউৰিয়া উদ্যোগৰ নিৰ্মাণ পৰ্ব আৰম্ভ হ'লেহে বিষয়টো সম্পূৰ্ণৰূপে স্পষ্ট হ'ব। বাকী মেডিকেল কলেজত পাঁচ বছৰত ৭৫ হাজাৰ আসন বৃদ্ধি, কেঞ্চাৰকে ধৰি ৩৬বিধ জীৱনদায়িনী ঔষধৰ আমদানি শুল্ক সম্পূর্ণৰূপে ৰেহাই দিয়া, কিষাণ ক্রেডিট কার্ডৰ সীমা ৫ লাখ টকালৈ বৃদ্ধি কৰা, কৃষি উৎপাদনত বিশেষ গুৰুত্ব প্ৰদান কৰা, ক্ষুদ্র, মধ্যমীয়া আৰু বৃহৎ উদ্যোগসমূহক সবল কৰি তুলিবলৈ লোৱা প্ৰস্তাৱ, অনুসূচিত জাতি-জনজাতিৰ মহিলাক উদ্যোগীৰূপে গঢ়ি তোলাৰ লক্ষ্যকে ধৰি বিভিন্ন আশাব্যঞ্জক প্রস্তাৱ বাজেটখনত সন্নিৱিষ্ট কৰা হৈছে। কিন্তু ৫০.৬৫ লাখ কোটি টকাৰ বিশাল আকাৰৰ বাজেটখনৰ আয়-ব্যয়ৰ যিটো হিচাপ, তালৈ চালে দেখা যায় যে বাজেটৰ বিভিন্ন প্ৰস্তাৱ ৰূপায়ণ কৰিবলৈ চৰকাৰখন মূলতঃ বজাৰ ঋণৰ ওপৰত নিৰ্ভৰশীল হ'ব। বাজেটখনত ধাৰ্য বজাৰ ঋণৰ পৰিমাণ হৈছে ১৪.৮২ লাখ কোটি টকা। 

ঋণ আৰু বিকাশৰ কেন্দ্ৰীয় চৰকাৰৰ যি নীতি, ৰাজ্যসমূহেও তাকেই অনুসৰণ কৰিছে। আমাৰ ৰাজ্যতো ঋণৰ পৰিমাণ ডেৰ লক্ষাধিক কোটি টকা হোৱাৰ পাছতো মাহে মাহে ঋণ লৈ ৰাজ্য চৰকাৰে বিকাশৰ যাত্রা অব্যাহত ৰাখিছে। সাধাৰণ মানুহে অৰ্থনীতিৰ এনেকুৱা সূত্ৰ বুজি নাপায়। এনেকুৱা অর্থনৈতিক নীতিৰ সুফল আৰু সম্ভাৱনা চৰকাৰে পাইছে বা দেখিছে কাৰণেই হয়তো ২০৪৭ চনৰ ভিতৰত ভাৰতক বিশ্বৰ উন্নত দেশ তিনিখনৰ এখনত পৰিণত কৰিব পাৰিব বুলি বিশ্বাস ৰাখিছে। বাজেট দাখিলৰ আগদিনা সংসদত দাখিল কৰা অৰ্থনৈতিক সমীক্ষাত কোৱা হৈছে যে দেশে বিশ্বৰ উন্নত ৰাষ্ট্ৰৰ লক্ষ্যত উপনীত হ'বলৈ হ'লে চৰকাৰী আৰু বেচৰকাৰী খণ্ডত বছৰি ৭৮.৫ লাখ নতুন চাকৰি সৃষ্টি কৰাৰ প্ৰয়োজন হ'ব। কিন্তু এইবাৰৰ বাজেটত নতুন চাকৰি সৃষ্টিৰ কোনো কথা উল্লেখ কৰা পৰিলক্ষিত নহ'ল। বিৰোধী পক্ষৰ নেতাসকলে বাজেটখনক অর্থহীন বুলি কৈছে। আনহাতে, প্ৰধানমন্ত্ৰীয়ে ইয়াক দেশৰ বিকাশৰ মাইলৰ খুঁটি বুলি প্রশংসা কৰিছে। কোনটো সঁচা সেয়া আহিবলগীয়া দিনবোৰত দেশৰ অৰ্থনৈতিক বিকাশৰ গতি, শ্বেয়াৰ বজাৰৰ অৱস্থা, মূল্য বৃদ্ধি, কৰ-কাটলৰ বোজা, নিযুক্তিৰ পৰিমাণ, মুদ্রাস্ফীতিৰ পৰিমাণ আদি সূচকবিলাকেহে প্ৰতীয়মান কৰিব।

Share This