ৰাজধানী

Dainik janambhumi January 29, 2025

ডিজিটেল ডেস্ক : এইবাৰ অসমত ৭৬সংখ্যক গণৰাজ্য দিৱস অনন্য আছিল এইবাবেই যে খানাপাৰাৰ পশু চিকিৎসা মহাবিদ্যালয় খেলপথাৰত ৰাজ্যপালে নেতৃত্ব দিয়া কেন্দ্রীয় অনুষ্ঠানত মুখ্যমন্ত্রী নাছিল। মুখ্যমন্ত্রীয়ে ৰাজ্যৰ 'দ্বিতীয় ৰাজধানী' ঘোষিত ডিব্রুগড়ত গণৰাজ্য দিৱসৰ পতাকা মুকলি কৰি দিয়া ভাষণত কেতবোৰ গুৰুত্বপূৰ্ণ ঘোষণা কৰি দিৱসটোৰ ৰূপেই সলনি কৰি পেলায়।

খানাপাৰাতকৈ ডিব্ৰুগড়ৰ কাৰ্যসূচীহে কেন্দ্রীয় কার্যসূচীৰ দৰে হৈ পৰা দেখা যায়। মুখ্যমন্ত্রী ড° হিমন্ত বিশ্ব শর্মাই তেওঁৰ চাৰে তিনি বছৰৰো অধিক সময়ৰ শাসনৰ কালছোৱাত বহু অভিনৱ সিদ্ধান্ত লৈছে আৰু ৰূপায়ণ কৰিছে। ফলত আনসকল মুখ্যমন্ত্রীতকৈ যে তেওঁ পৃথক সেইটো ৰাইজৰ দৃষ্টিত ধৰা পৰিছে। কামবোৰৰ ইতিবাচক আৰু নেতিবাচকতাৰ বিশ্লেষণ দৃষ্টি অনুসৰি হৈ আছে, হৈ থাকিব, কিন্তু ড° শৰ্মা চৰকাৰৰ কামবোৰে যে জনজীৱনত যথেষ্ট প্রভাৱ পেলাইছে সেইটো সকলোৱে স্বীকাৰ কৰে। এনেকুৱা অভিনৱত্বৰ বাবেই ডিব্ৰুগড়ৰ ৭৬সংখ্যক গণৰাজ্য দিৱসৰ চৰকাৰী কার্যসূচী অনন্য হৈ পৰিল। অন্য উন্নয়নমূলক ঘোষণাবিলাকৰ উপৰি মুখ্যমন্ত্রীয়ে এনে দুটা সিদ্ধান্তৰ কথা ঘোষণা কৰিলে, যিটো সাধাৰণ মানুহৰ কথা বাদেই ৰাজনীতিকৰ বাবেও অভাৱনীয় আছিল। প্রথমটো ডিব্রুগড়ত অসম বিধানসভাৰ দ্বিতীয়টো স্থায়ী ভৱন নির্মাণ কৰা আৰু তেজপুৰত দ্বিতীয়টো ৰাজভৱন নির্মাণ কৰা।

ডিব্ৰুগড়ে ৰাজ্যৰ দ্বিতীয়খন ৰাজধানীৰ মর্যাদা পাব আৰু ইয়াত মুখ্যমন্ত্রীৰ সচিবালয় এটা নির্মাণ হ'ব বুলি আগতেই মুখ্যমন্ত্রীয়ে ঘোষণা কৰিছিল। কিন্তু বিধানসভা ভৱন নির্মাণৰ সিদ্ধান্তৰ পাছত ডিব্ৰুগড় মহানগৰে ৰাজধানীৰ ক্ষুদ্র ৰূপ এটা পোৱাটো নিশ্চিত হ'ল। মুখ্যমন্ত্রীয়ে কৈছে যে অসম বিধানসভাৰ বছৰৰ এখন অধিৱেশন ডিব্ৰুগড়ৰ এই নতুন ভৱনত বহিব। অহা বছৰৰ জানুৱাৰী মাহৰ পৰা এই ভৱনৰ নির্মাণ আৰম্ভ হ'ব। দ্বিতীয়তে, তেজপুৰত ৰাজভৱন নির্মাণৰ যি সিদ্ধান্ত মুখ্যমন্ত্রীয়ে ঘোষণা কৰিলে তাৰ পৰা ঐতিহাসিক চহৰখনৰ অন্য বিশেষ লাভ নহ'লেও চহৰখনৰ মর্যাদা বৃদ্ধি পাব। ইফালে, বৰাক উপত্যকাৰ শিলচৰত 'মিনি সচিবালয়' নির্মাণৰ কাম চলি আছে। ৰাজ্যৰ মুখ্য সচিবৰ নিয়ন্ত্রণত পৰিচালিত হ'ব সেই 'মিনি সচিবালয়'। ড° শৰ্মা চৰকাৰৰ উল্লিখিত পৰিকল্পনাসমূহ কাৰ্যকৰী হৈ উঠিলে ৰাজ্যত তিনিখন ৰাজধানী হ'ব- দিছপুৰ, ডিব্ৰুগড় আৰু শিলচৰ। মুখ্যমন্ত্রীৰ শাসনৰ এই অভিনৱ ধাৰাটোৰ বিষয়ে আলোচনা কৰোঁতে প্রসংগক্রমে উল্লেখ কৰা উচিত যে কোকৰাঝাৰৰ বি টি এ ডি সচিবালয়ত এইবাৰ প্ৰথমবাৰৰ বাবে অসম বিধানসভাৰ বাজেট অধিৱেশনৰ প্ৰথম দিনাৰ কার্যক্রমণিকা অনুষ্ঠিত হ'ব। ৰাজ্যপালৰ ভাষণৰ পর্বটো তাত সম্পন্ন হ'ব। মুখ্যমন্ত্রীৰ শাসন বিকেন্দ্রীকৰণৰ আঁচনিবিলাকৰ ইও অন্যতম অংশ। এনে অৱস্থাত কেতিয়াবা কোকৰাঝাৰতো অসম বিধানসভাৰ ভৱন কিম্বা 'মিনি সচিবালয়' নিৰ্মাণৰ কথা যে নাহিব কোনেও ক'ব নোৱাৰে।

জিলা সদৰে জিলা সদৰে কেবিনেট বৈঠক অনুষ্ঠিত কৰাৰ যিটো ধাৰাৰ মুখ্যমন্ত্ৰীয়ে সৃষ্টি কৰিছে সিও শাসনৰ পৰিধি প্ৰসাৰৰ প্ৰক্ৰিয়াটোত নতুন মাত্রা প্রদান কৰিছে। প্রতিখন জিলাৰ বাবে অভিভাৱক মন্ত্রীৰ ব্যৱস্থাটোও এই দিশত উল্লেখযোগ্য। কিন্তু স্বাভাৱিকতেই প্রশ্ন হ'ব- ডিব্ৰুগড়ৰ বিধানসভা ভৱনটো ডিব্ৰুগড় চহৰৰ বাবে এক অলংকাৰ হোৱাৰ বাদে ইয়াৰ বাস্তৱ মূল্য কি হ'ব? তেজপুৰৰ ৰাজভৱনটোৱেইবা জনসাধাৰণৰ কি উপকাৰত আহিব। অৱশ্যে, বৰাক উপত্যকাৰ 'মিনি সচিবালয়'ৰ কথাটো বেলেগ হ'ব। ইয়াত এটা নির্দিষ্ট চৰকাৰী ব্যৱস্থা থাকিব, য'ত দিছপুৰলৈ নহাকৈয়ে কিছুমান চৰকাৰী কাম সম্পন্ন কৰাৰ সুবিধা বৰাক উপত্যকাবাসীয়ে লাভ কৰিব।

নতুন এই 'দ্বিতীয় ৰাজধানী' নির্মাণৰ সিদ্ধান্তবোৰে অন্য এটা সমস্যাৰ সৃষ্টি কৰাৰো সম্ভাৱনা আছে। কাইলৈ লখিমপুৰ বা ধুবুৰীবাসীয়েও এটা 'মিনি সচিবালয়' বা 'বিধানসভা ভৱন' বিচাৰিব পাৰে, তৃতীয় বা চতুর্থ ৰাজধানীৰ মর্যাদা বিচাৰিব পাৰে, দাবী জনাব পাৰে, আন্দোলনো কৰিব পাৰে। তেতিয়া চৰকাৰে সেই অঞ্চলবিলাকক কেনেদৰে সঁহাৰি দিব? ক্ষমতাৰ, শাসনৰ বিকেন্দ্রীকৰণৰ মুখ্যমন্ত্রীৰ এই মানসিকতাৰ শলাগ লৈও ক'ব পাৰি যে বিধানসভা ক'ত কেনেকৈ বহিছে সেইটোতকৈও গুৰুত্বপূর্ণ কথা হ'ল- বিধানসভাই জনসাধাৰণৰ সমস্যাসমূহ সঠিকভাৱে আলোচনা কৰি সু-শাসনৰ নীতি গ্রহণ কৰিবলৈ বা আইন প্রণয়ন কৰিবলৈ সক্ষম হৈছে নে নাই। মিনি সচিবালয়ৰ ক্ষেত্ৰতো একেই কথা। কর্মদক্ষতা থাকিলে এটা সচিবালয়ৰ পৰাই গণকল্যাণৰ কাম-কাজ সম্ভৱ কৰিব পাৰি।

Share This