নথি-পত্ৰ‌ নথকা বাহনৰ বিৰুদ্ধে কঠোৰ পৰিবহণ বিভাগ

Dainik janambhumi January 31, 2025

ডিজিটেল ডেস্ক : সুৰক্ষিত যাতায়াতৰ স্বাৰ্থত পথত চলাচল কৰা ব্যক্তিগত, ব্যাৱসায়িক সকলো বাহনৰে সক্ষমতা আৰু সুৰক্ষা নিশ্চিত কৰাক লৈ তৎপৰ হৈছে কামৰূপ মহানগৰ জিলা পৰিবহণ বিভাগ। ১ ফেব্ৰুৱাৰীৰ পৰা আনকি যান-বাহনৰ সঠিক নথি-পত্ৰ নথকা গৰাকীৰ ঘৰে ঘৰে গৈ অভিযান চলাবলৈকো প্রস্তুত হৈছে বিভাগৰ বিষয়া-কৰ্মচাৰীৰ দল। 

উল্লেখযোগ্য যে চালকৰ অমনোযোগিতা, অজ্ঞতাৰ বাবেই সাধাৰণতে পথ দুর্ঘটনা সংঘটিত হয় যদিও বিভিন্ন সময়ত বাহনৰ যান্ত্রিক বিজুতি তথা প্রাকৃতিক কাৰণতো পথ দুর্ঘটনা সংঘটিত হয়। এনে দুর্ঘটনাত বহু লোক অস্বাভাৱিকভাবে মৃত্যুৰ মুখত পৰাৰ লগতে বহুতেই পংগুত্ব জীৱন কটাবলগীয়া হয়। ইফালে বহুসংখ্যক বাহনৰ যাৱতীয় নথি-পত্ৰ সঠিক হৈ নথকা বাবে বহু দুর্ঘটনাগ্রস্ত লোকে চৰকাৰ অথবা বীমা কোম্পানীৰ পৰা প্ৰয়োজনীয় ক্ষতিপূৰণ নাপাই দিকবিদিক হেৰুৱাবলগীয়া হয়। সেয়ে যান-বাহনৰ বিভিন্ন যন্ত্রপাতি তথা ফিটনেছ পৰীক্ষাৰ লগতে যাৱতীয় নথি-পত্ৰৰ পৰীক্ষা আৰু নৱীকৰণ কৰাটো অত্যন্ত প্রয়োজন। 

এই সন্দর্ভত অসম চৰকাৰৰ পৰিবহণ বিভাগৰ বিশেষ কৰ্তব্যৰত বিষয়া আৰু কামৰূপ মহানগৰ জিলাৰ অতিৰিক্ত দায়িত্ববাহী জিলা পৰিবহণ বিষয়া গৌতম দাসে কয় যে যান্ত্রিক বিজুতিত বাহন এখন চলোৱাটো যিদৰে অসম্ভৱ, সেইদৰে সঠিক নথি-পত্র নাথাকিলে বাহনখন নির্ভয়, সুৰক্ষা আৰু শংকামুক্তভাৱে চলোৱা সম্ভৱ নহয়। সেয়েহে অনতিপলমে আপোনাৰ বাহনৰ নথি-পত্ৰসমূহ পৰীক্ষা আৰু নৱীকৰণ কৰক। যদিহে আপুনি সময়মতে যান-বাহনৰ কৰ আদায় দিয়া নাই তেন্তে বকেয়াসহ যাৱতীয় সকলো কৰ অনতিপলমে আদায় দিয়ক। আনহাতে প্রয়োজন হ'লে কামৰূপ মহানগৰ জিলা পৰিবহণ বিষয়াৰ কাৰ্যালয়লৈ আহি হ'লেও নিজৰ বাহনখন পথত চলাচলৰ উপযোগী হোৱাকৈ বকেয়াসহ বৰ্তমানৰ যাৱতীয় সকলো কৰ পৰিশোধ কৰি চালকৰ অনুজ্ঞাপত্র, ফিটনেছ, পার্মিট, প্ৰদূষণমুক্তকে ধৰি নথি-পত্ৰসমূহ সঠিক কৰি ল'বলৈ পৰিবহণৰ বিশেষ কৰ্তব্যৰত বিষয়াগৰাকীয়ে যান-বাহনৰ গৰাকীৰ প্ৰতি আহ্বান জনাইছে।

Share This