এক ভয়ংকৰ দুৰ্ঘটনাই জোঁকাৰি গ'ল ডিমা হাছাওৰ উমৰাংছ’

Kakali Deka January 18, 2025

ডিজিটেল ডেস্ক: মৃত্যুদূতৰূপী ৰাজ্যৰ ৰাজপথ।ৰাজ্যত দিনকদিনে বৃদ্ধি পাবলৈ ধৰিছে ভয়ংকৰ দুৰ্ঘটনা। এইবাৰ উমৰাংছ’ত সংঘটিত হৈছে এক ভয়ংকৰ পথ দুৰ্ঘটনা।

কয়লাখনিৰ দুৰ্ঘটনাৰ শোক মাৰ নৌযাওতেই ডিমা হাছাওত সংঘটিত হৈছে আন এক শোকাৱহ দুৰ্ঘটনা।জিলাখনৰ উদ্যোগ নগৰী হিচাপে পৰিচিত উমৰাংছ' ত আজি পুৱা এখন স্কুল বাছ দুৰ্ঘটনাত পতিত হয়।

জানিব পৰা মতে উমৰাংছ’ৰ ১৯কিলো’ অঞ্চলত এ এছ-০৮-চি ২২৯২ নম্বৰৰ এখন স্কুল বাছ দুৰ্ঘটনাত পতিত হয়, যাৰ ফলত ছেক্ৰেড হাৰ্ট স্কুলৰ তৃতীয় শ্ৰেণীৰ ডালিমিৰ ৰংহাংপি নামৰ এগৰাকী ছাত্ৰী থিতাতে  নিহত হোৱাৰ উপৰিও প্ৰায় ১৫গৰাকী ছাত্ৰ-ছাত্ৰী আহত হয় ।

ইয়াৰ ভিতৰত তিনিগৰাকীৰ অৱস্থা অতি‌ সংকটজনক বুলি জানিব পৰা গৈছে । লগতে নিহতৰ সংখ্যা আৰু অধিক বৃদ্ধি পোৱাৰো আশংকা কৰা হৈছে৷ বাছখনে নিয়ন্ত্ৰণ হেৰুওৱাৰ ফলতে এই দুৰ্ঘটনাটো সংঘটিত হয় বুলি স্থানীয় লোকে প্ৰকাশ কৰিছে। স্কুলৰ ছাত্ৰ-ছাত্ৰী কঢ়িয়াই নিয়া এই বাছখনে নিয়ন্ত্ৰণ হেৰুৱাই দ খাৱৈত বাগৰি পৰিছিল।

আনহাতে এই ঘটনা সন্দৰ্ভত আহত এগৰাকী কণমানি ছাত্ৰীয়ে জানিবলৈ দিয়া মতে, স্কুল বাছখনৰ চালকৰ ভুলৰ বাবেই এই দুৰ্ঘটনাটো সংঘটিত হয়। ইফালে‌ দুৰ্ঘটনাটোৰ পাছতে আহত ছাত্ৰ-ছাত্ৰীসকলক উমৰাংছ' চিকিৎসালয়ত ভৰ্তি কৰোৱা হয় ।

Share This