নিজম পৰিল মহানগৰৰ চৌদিশ

Kakali Deka October 25, 2023

ডিজিটেল ডেস্ক: দুৰ্গা পূজাৰ বিজয়া দশমীৰ দিনটোৰ পৰাই নিজম পৰিল মহানগৰৰ পৰিৱেশ। পূজাৰ আৰম্ভণিৰ পৰা মহানগৰৰ চৌদিশে অব্যাহত থকা উছাহ আৰু উখল-মাখল পৰিৱেশ পুনৰ সেমেকা হৈ পৰিল। পূজাক লৈ ব্যস্ততাপূৰ্ণ হৈ থকা দোকান-বজাৰসমূহত আজি নীৰৱ পৰিৱেশে বিৰাজ কৰে।

মঙলবাৰে মহানগৰৰ অধিকাংশ দোকান- বজাৰেই বন্ধ থাকে। এইবাৰ পূজাৰ বতৰো ফৰকাল হোৱাৰ বাবে মহানগৰবাসীয়ে প্ৰতিটো পূজা মণ্ডপতে প্রতিদিনে ভিৰ কৰা পৰিলক্ষিত হৈছিল। বিশেষকৈ গীতানগৰ দুৰ্গা পূজা, বিষ্ণুপুৰ পূজা সমিতি, ৰেষ্ট কেম্প পূজা সমিতি, ৰিহাবাৰী বিলপাৰ দুৰ্গা পূজা, শান্তিপুৰ শ্লুইচগেট দুর্গা পূজা, বেলতলাৰ লক্ষ্মী মন্দিৰ দুৰ্গা পূজা, লতাশিলৰ গুৱাহাটী সার্বজনীন দুর্গা পূজা, বামুণীমৈদামৰ ৰে'লৱে কলনি সার্বজনীন দুর্গা পূজা, পাণ্ডুৰ একাউণ্টছ কলনি দুর্গা পূজা, বৃহত্তৰ নাৰেংগী দুর্গা পূজা, কাহিলিপাৰা সাৰ্বজনীন দুর্গা পূজা, গণেশগুৰিৰ দিছপুৰ বাৰোৱাৰী দুৰ্গা পূজা,

জাপৰিগোগ দুর্গা পূজা, বেলতলা দুর্গা পূজা, উজানবজাৰৰ বাৰোৱাৰী দুর্গা পূজা, পাণবজাৰৰ হৰিসভাৰ দুৰ্গা পূজাত ভক্তৰ অধিক সমাগম ঘটে। অধিকাংশ ভক্তই পূজা মণ্ডপসমূহৰ জাক-জমকতা আৰু দৃষ্টিনন্দন সৌন্দর্য উপভোগ কৰি আনন্দিত হৈ পৰা দেখিবলৈ পোৱা গ'ল।
 

Share This