ৰোগ সোঁচৰাৰ পূৰ্বেই প্রাদুৰ্ভাৱৰ আগজাননী দিব এ আই-এ, ভাৰতত মহামাৰীৰ বিৰুদ্ধে যুঁজাৰ দিশত এখোজ

dainik janambhumi November 30, 2025

ডিজিটেল ডেস্ক : ডেংগু, চিকুনগুনিয়া, ইনফ্লুৱেঞ্জা, ডায়েৰিয়াৰ দৰে নিয়মীয়া অসুখৰ প্ৰাদুৰ্ভাৱ তথা জনস্বাস্থ্যৰ প্ৰতি আহিব পৰা আন ভাবুকি ওচৰৰ কাষৰীয়া অঞ্চললৈ সোঁচৰাৰ আগতেই জনাবলৈ ভাৰতে কৃত্রিম বুদ্ধিমত্তা (এ আই) ব্যৱহাৰ কৰিব। চৰকাৰী বিষয়াসকলে কয় যে বৰ্তমানৰ ব্যৱস্থাৰ পৰা এয়া হৈছে গুৰুত্বপূৰ্ণ পৰিৱৰ্তন। বৰ্তমানৰ ব্যৱস্থাত চিকিৎসালয়ত ৰোগীৰ সংখ্যা বেছি হোৱাৰ পাছতহে ৰোগৰ প্ৰাদুৰ্ভাৱৰ বিষয়ে জনা যায়। ৰোগ নিয়ন্ত্ৰণৰ ৰাষ্ট্ৰীয় কেন্দ্রত (এন চি ডি চি) এ আই পৰিচালিত এক ব্যৱস্থাই ইতিমধ্যেই অস্বাভাৱিক স্বাস্থ্যজনিত অৱস্থা, জ্বৰৰ ঘটনা বেছি হোৱা, ডায়েৰিয়া বা মহ বৃদ্ধি পোৱা আদিৰ ১৩টা ভাৰতীয় ভাষাত অহা লাখ লাখ ৰিপ'ৰ্ট বা খবৰ পৰীক্ষা কৰি আছে। 

২০২২ চনৰ পৰা এই এ আই পৰিচালিত ব্যৱস্থাই ৩০ কোটিতকৈ অধিক ৰিপ'ৰ্ট বিশ্লেষণ কৰিছে আৰু ৯৫,০০০টা স্বাস্থ্যজনিত ঘটনা আগতীয়কৈ চিনাক্ত কৰিছে। আগৰ ব্যৱস্থাত এয়া অসম্ভৱ। ইয়াৰ পৰৱৰ্তী পৰ্যায়ত ভাৰতৰ নতুন স্বাস্থ্যজনিত আগজাননী দিয়া মডেলে বতৰ ধৰণ, চিকিৎসালয়ৰ ৰেকৰ্ড, পৰীক্ষাগাৰৰ ফল আদিৰ পৰা তথ্য লৈ ৰোগী চিকিৎসালয়লৈ যোৱাৰ আগতেই বিপদাশংকাৰ আগজাননী দিব। যদি সূচকবোৰে (ইণ্ডিকেটৰ) প্ৰবল বৰষুণৰ পাছত ডেংগু ৰোগ বৃদ্ধি পোৱা বা উষ্ণতা হ্রাস পোৱা বাবে ইনফ্লুৱেঞ্জা হোৱাৰ আশংকা দেখুৱায়, তেন্তে পূৰ্বব্যৱস্থাৰ বাবে ৰাজ্য আৰু জিলাৰ দললৈ সতর্ক সংকেত যাব। 

স্বাস্থ্য বিশেষজ্ঞসকলৰ মতে, যিহেতু ঋতুকালীন আৰু পাৰিপাৰ্শ্বিক বৈশিষ্ট্যৰ (পেটার্ন) বাবে বহু ৰোগ হয়, সেয়ে এ আইৰ আগজাননীয়ে কর্তৃপক্ষক আগতীয়াকৈ ঔষধ মজুত কৰা, চিকিৎসালয় সাজু কৰা, মহ বেছি থকা অঞ্চলত দৰব ছটিওৱা তথা পানীৰ প্ৰদূষণ পৰীক্ষা কৰাত সহায় কৰিব। ফলত প্ৰাদুৰ্ভাৱৰ আগতেই সংক্ৰমণৰ পথ ৰোধ হ'ব।

Share This