১৫ আগষ্টৰ পৰা ৩০০০ টকাৰ ফাষ্টেগ-ভিত্তিক টোলগে'টৰ বাৰ্ষিক পাছ

dainik janambhumi June 19, 2025

ডিজিটেল ডেস্ক : কেন্দ্ৰীয় চৰকাৰে ফাষ্টেগ-ভিত্তিক ৩০০০ টকাৰ এখন বার্ষিক পাছ প্ৰৱৰ্তন কৰাৰ সিদ্ধান্ত লৈছে। কেন্দ্রীয় পথ পৰিবহণ আৰু ঘাইপথ মন্ত্রী নীতিন গডকাৰিয়ে বুধবাৰে এক্সযোগে এই তথ্য সদৰী কৰে। ১৫ আগষ্টত জাৰি কৰিব লগা এই বার্ষিক পাছখন কেৱল অবাণিজ্যিক ব্যক্তিগত বাহনসমূহৰ বাবেহে প্রযোজ্য হ'ব।

পাছখন সক্ৰিয় কৰাৰ পৰা এবছৰৰ বাবে বৈধ থাকিব অথবা ২০০বাৰ ভ্ৰমণ পর্যন্ত পাছখনক ব্যৱহাৰ কৰিব পৰা যাব। এই ক্ষেত্রত যিটোৱে প্রথমে সংঘটিত হয় তাৰ ওপৰতে ভিত্তি কৰি পাছখন বৈধ থাকিব বুলি কেন্দ্রীয় মন্ত্রীজনে কয়। কেন্দ্রীয় মন্ত্রীজনে কয় যে সমগ্র দেশৰ ৰাষ্ট্ৰীয় ঘাইপথসমূহত এই বার্ষিক পাছখনে নিৰৱচ্ছিন্ন আৰু কম ব্যয়ৰ ভ্ৰমণ কৰাত জনসাধাৰণক সমৰ্থৱান কৰিব।

গডকাৰিয়ে কয় যে এন এইচ এ আই আৰু কেন্দ্ৰীয় পথ পৰিবহণ আৰু ঘাইপথ মন্ত্ৰ্যালয়ৰ চৰকাৰী ৱেবছাইট বা ৰাজমার্গ যাত্রা এপত এই পাছখনৰ সক্রিয়কৰণ আৰু নৱীকৰণৰ বাবে এটা উৎসর্গিত লিংক উপলব্ধ হ'ব। মন্ত্রীজনে কয় যে ৬০ কিল'মিটাৰ ব্যাসার্ধৰ ভিতৰত থকা টোল প্লাজাসমূহৰ ক্ষেত্রত দীর্ঘদিনীয়া আপত্তিক এই পদক্ষেপে সমাধান কৰিব আৰু এটা একক, ব্যয়সাধ্য লেনদেনৰ জৰিয়তে টোল মাচুল সহজসাধ্য কৰি তুলিব। টোল গে'টত মাচুল দিয়াৰ বাবে অপেক্ষা কৰি থাকিবলগীয়া, যান-জঁটৰ হ্রাস, টোল কৰৰ বাবে বিবাদ আদি সমস্যা সমাধান কৰি এই ফাষ্টেগৰ বার্ষিক পাছখনে লাখ লাখ ব্যক্তিগত বাহনৰ মালিকক এক দ্রুত আৰু আৰামদায়ক ভ্রমণ অভিজ্ঞতা প্রদান কৰিব বুলি কেন্দ্রীয় মন্ত্রীজনে কয়।

Share This