অৰুণাচলত ৫০০ কোটি টকাৰ পপী খেতি ধ্বংস 

Dainik janambhumi February 22, 2025

ডিজিটেল ডেস্ক: কলম্বিয়াৰ ড্রাগ্‌ লর্ড, নাৰ্ক'টেৰৰিষ্ট পাব্ল' এক্স'বাৰৰ পন্থাই লৈছে নেকি উত্তৰ-পূৰ্বাঞ্চলৰ উগ্রপন্থী সংগঠনে? অলপতে অৰুণাচলত ধৰা পৰা বিশাল পৰিসৰৰ অবৈধ পপী খেতি উৎখাত আৰু ধ্বংস কৰা কাৰ্যই উগ্রপন্থী সংগঠনৰ আন এক অধ্যায় পোহৰলৈ আনিলে। উল্লেখযোগ্য যে বিগত দুমাহ ধৰি চেণ্ট্ৰেল নাৰ্কটিক্স ব্যুৰ'ই নিৰাপত্তা বাহিনীৰ সহযোগত অৰুণাচলৰ লোহিত, নামছাই, চাংলাং জিলাত প্রায় ৬০০০ হেক্টৰ অবৈধ পপী খেতি ধ্বংস কৰিছে। ধ্বংস কৰা এই পপী খেতিৰ মূল্য প্রায় ৫০০ কোটি টকা হ'ব বুলি নাৰ্কটিক্স ব্যুৰ'ৰ সূত্রই জানিবলৈ দিছে। 

প্রাপ্ত চাঞ্চল্যকৰ তথ্য মতে, এই অবৈধ নিচাযুক্ত দ্রব্য পপী খেতিসমূহ নগা উগ্রপন্থী সংগঠন এন এছ চি এন (কে-বাই এ) আৰু আলফা (স্বাধীন) গোটে কৰি আহিছে। এই পপী খেতি কৰি এই দুই সংগঠনে আন্তঃৰাষ্ট্ৰীয় বজাৰত বিক্ৰী কৰি কোটি কোটি টকা সংগ্রহ কৰি আহিছে। প্ৰথমবাৰৰ বাবে অৰুণাচলত এনে বৃহৎ পৰিসৰত নিষিদ্ধ পপী খেতি কৰাৰ তথ্য পোহৰলৈ আহিছে। এই পপী খেতি উৎখাত কৰি ধ্বংস কৰাৰ বাবে এন এছ চি এন আৰু আলফা স্বাধীনৰ পৰা স্থানীয় লোক আৰু নিৰাপত্তাৰক্ষীলৈ বহু ভাবুকিপূর্ণ ফ'ন আহিছে বুলি স্থানীয় সূত্রই জনাইছে। প্ৰতিকূল বতৰ আৰু দুর্গম অঞ্চলৰ বাবে নাৰ্ক'টিক্স ব্যুৰ' আৰু নিৰাপত্তাৰক্ষীয়ে পপী খেতিৰ মাত্র ৫০-৬০ শতাংশ খেতিহে ধ্বংস কৰিব পাৰিছে বুলি জনায়। সচৰাচৰ আলফা স্বাধীনৰ দৰে সংগঠনে নিৰাপত্তাৰক্ষী, আৰক্ষীৰ কটকটীয়া ব্যৱস্থাৰ বাবে অসমত পূৰ্বৰ দৰে ধন দাবীৰ অৰ্থ সংগ্রহ অভিযান কৰিব নোৱৰাৰ বাবেই অৰুণাচলত নগা উগ্রপন্থীৰ সহযোগত নিচাযুক্ত দ্ৰব্যৰ খেতি কৰিবলৈ বাধ্য হৈছে বুলি এক বিশেষ সূত্রই জনাইছে। আনহাতে, নগা উগ্রপন্থী সংঠনসমূহে পূৰ্বৰ পৰাই পুঁজি টনকিয়াল কৰিবৰ বাবে নিচাযুক্ত দ্ৰব্যৰ সৰবৰাহ কৰি আহিছে।

Share This