পশ্চিম বংগত হিংসা! ভগৱানৰ মূৰ্তি ভাঙি লণ্ডভণ্ড দুষ্কৃতিকাৰীৰ

Rashmi March 15, 2025

ডিজিটেল ডেস্কঃ হোলীৰ দিনাই পশ্চিম বংগত হিংসাত্মক কাৰ্য সংঘটিত হৈছে। নন্দিগ্ৰামৰ বিজেপিৰ বিধায়ক সুবেন্দু অধিকাৰীয়ে অভিযোগ কৰা অনুসৰি তেওঁৰ সমষ্টিত ভগৱানৰ প্ৰতিমূৰ্তি ভাঙি পেলোৱাৰ ঘটনা পোহৰলৈ আহিছে। বিজেপিৰ ৰাষ্ট্ৰীয় মুখপাত্ৰ অমিত মালৱিয়াইও এই ঘটনাক গৰিহণা দি ছ’চিয়েল মিডিয়াত এটা পোষ্ট কৰিছে।

অমিত মালবিয়াই নিজৰ পোষ্টত লিখিছে, ‘মুখ্যমন্ত্ৰী মমতা বেনাৰ্জীৰ নেতৃত্বত পশ্চিম বংগত হিন্দুৰ ওপৰত অহৰহ আক্ৰমণ চলি আছে। যোৱা মঙলবাৰৰ পৰা নন্দিগ্ৰাম ব্লক ২ৰ আহমেদাবাদ অঞ্চলৰ কমলপুৰত স্থানীয় বাসিন্দাসকলে পূজা কৰি আছিল আৰু ৰাম নাৰায়ণ কীৰ্তন নিৰৱচ্ছিন্নভাৱে চলি আছিল, তেতিয়া একাংশ লোকে শ্ৰীৰাম নাম উচ্চাৰণ সহ্য কৰিব নোৱাৰি মূৰ্তিবোৰ ভাঙি ঠাইখন অপবিত্ৰ কৰি পেলায়।'

তেওঁ লগতে কয়, ‘‘বৰুইপুৰ, যাদৱপুৰ, মুৰ্ছিদাবাদকে ধৰি সমগ্ৰ ৰাজ্যতে একেধৰণৰ ঘটনা পোহৰলৈ আহিছে। ইয়াৰ উপৰি মমতা বেনাৰ্জীৰ আৰক্ষীয়ে বংগৰ কিছুমান অঞ্চলত হোলী উদ্‌যাপন নিষিদ্ধ কৰাৰ চেষ্টা চলাইছিল যদিও পিছত পিছ হুঁহকি যায়। মুখপাত্ৰগৰাকীয়ে আৰু কয়, সনাতনীসকলৰ মাজত এই কাণ্ডক লৈ ব্যাপক ক্ষোভৰ সৃষ্টি হৈছে যদিও এই কঠিন সময়ত বিজেপি তেওঁলোকৰ সৈতে দৃঢ়তাৰে থিয় দিছে। মমতা বেনাৰ্জীক আমি কেতিয়াও পশ্চিম বংগক আন এখন বাংলাদেশলৈ ৰূপান্তৰিত কৰিবলৈ নিদিওঁ।''

উল্লেখযোগ্য যে এই হিংসাত্মক কাৰ্যৰ বাবে ৩ দিনৰ কাৰণে ইণ্টাৰনেট সেৱা বন্ধ কৰি দিয়া হৈছে।

উৎস: প্ৰাগ নিউজ ডিজিটেল
 

Share This