বিহাৰৰ কাটিহাৰ জিলাত ভয়ংকৰ নাও দুৰ্ঘটনা।তিনিজনৰ মৃতদেহ উদ্ধাৰ।সন্ধানহীন ১০জনকৈ লোক।

Kakali Deka January 19, 2025

ডিজিটেল ডেস্ক: এক শোকাৱহ নাও দুৰ্ঘটনা সংঘটিত হৈছে বিহাৰৰ কাটিহাৰ জিলাত।জিলাখনৰ আহমেদাবাদ আৰক্ষী থানা অঞ্চলৰ অন্তৰ্গত গদাই দিয়াৰা অঞ্চলত সংঘটিত হৈছে এই ঘটনাটো।পানীৰ প্ৰবল সোঁতত এখন চলন্ত যাত্ৰীবাহী নাও নিয়ন্ত্ৰণহীন হৈ পৰে আৰু গঙ্গা নদীত ওলোটাই পৰি দুৰ্ঘটনাগ্ৰস্ত হয়।আজি পুৱাৰ ভাগত সংঘটিত হৈছে এই‌ দুৰ্ঘটনাটো। ইতিমধ্যে এই নাও দুৰ্ঘটনাত তিনিজন লোকৰ কৰুণ মৃত্যু হোৱাৰ লগতে বৰ্তমানেও সন্ধানহীন হৈ আছে ১০জনৰো অধিক লোক। উল্লেখযোগ্য যে দুৰ্ঘটনা সংঘটিত হোৱা যাত্ৰীবাহী নাওখনত আছিল প্ৰায় ১৭ জনকৈ লোক। আনহাতে দুৰ্ঘটনাৰ পৰা ৰক্ষা পৰে ৪জনকৈ লোক।প্ৰাপ্ত খবৰ অনুসৰি ৪গৰাকী লোকে সাঁতুৰি নিজৰ প্ৰাণ বচাবলৈ সক্ষম হয়।

উল্লেখযোগ্য যে দুৰ্ঘটনা সংঘটিত হোৱা নাওখনত থকা যাত্ৰীসকলে পুৱা শস্যৰ যত্ন ল'বলৈ আৰু পথাৰত কাম কৰিবলৈ খেতিপথাৰৰ দিশে যাত্ৰা আৰম্ভ কৰিছিল। তেনে সময়তে নাওখন নিয়ন্ত্ৰণহীন হৈ পৰে আৰু গঙ্গা নদীত ওলোটাই পৰে। আনহাতে

ইতিমধ্যে ঘটনাস্থলীত উপস্থিত হৈছে এছ ডি আৰ এফ বাহিনী আৰু আৰক্ষী প্ৰশাসনৰ লোক। গংগা নদীত হোৱা এই দুৰ্ঘটনাৰ পাছতে উদ্ধাৰকাৰী দলে অভিযান অব্যাহত ৰাখিছে যদিও গংগাৰ প্ৰবল সোঁতৰ বাবে উদ্ধাৰ অভিযানত কিছু বাধাৰ সৃষ্টি হৈছে। ইফালে এছ ডি আৰ এফ আৰু আৰক্ষীয়ে যুটীয়াভাৱে অব্যাহত ৰাখিছে এই উদ্ধাৰ অভিযান।

দুৰ্ঘটনাত মৃত্যু হোৱা ৩গৰাকীৰ ভিতৰত দুগৰাকী বয়োজ্যেষ্ঠ আৰু এটি এবছৰীয়া শিশুও আছে বুলি প্ৰশাসনে সদৰী কৰিছে। তদুপৰি দুৰ্ঘটনা সংঘটিত হোৱা স্থানত পানীৰ গভীৰতালৈ লক্ষ্য কৰি মৃতকৰ সংখ্যা আৰু অধিক বৃদ্ধি পোৱাৰ সম্ভাৱনা আছে বুলি ইতিমধ্যে সদৰী কৰিছে প্ৰশাসনে।

Share This