৩০০ কিঃমিঃ পর্যন্ত দূৰলৈ গৈ পৰীক্ষা দিব লাগিব একাংশ প্রার্থীয়ে

dainik janambhumi March 30, 2025

ডিজিটেল ডেস্ক : ৰাজ্যত ভয়ংকৰ ৰূপত বৃদ্ধি পাইছে শিক্ষিত নিবনুৱাৰ সংখ্যা। এটা চৰকাৰী চাকৰিৰ বাবে হাহাকাৰ কৰিছে হাজাৰ হাজাৰ নিবনুৱা যুৱক-যুৱতীয়ে। শেহতীয়াকৈ চৰকাৰী বিজ্ঞাপনতে উন্মোচিত হৈছে ৰাজ্যৰ নিবনুৱা সমস্যাৰ ভয়ংকৰ ছবিখন। চিকিৎসা শিক্ষা সঞ্চালকালয়ে খালী হৈ থকা ৬৬৭টা পদৰ বাবে আবৱদন কৰিছে ২,৯৮,৫১৬গৰাকী প্রার্থীয়ে। অর্থাৎ একোটা পদৰ বিপৰীতে প্ৰাৰ্থীৰ সংখ্যা ৪৭৮। 

উল্লেখযোগ্য যে এ ডি আৰ ইৰ পাছত চিকিৎসা শিক্ষা সঞ্চালকালয়ে তৃতীয় বৰ্গৰ খালী থকা পদৰ বাবে এই আয়োজন কৰিছে পৰীক্ষাৰ। ৰাজ্যৰ বিভিন্ন চিকিৎসা মহাবিদ্যালয়, দন্ত মহাবিদ্যালয়ত খালী থকা পদৰ বাবে অনুষ্ঠিত হ'ব লগীয়া এই পৰীক্ষা ৰাজ্যৰ এঘাৰখন জিলাত অনুষ্ঠিত হ'ব। ইফালে, ৰাজ্যৰ সকলো জিলাতে পৰীক্ষা অনুষ্ঠিত নকৰি মাত্ৰ এঘাৰখন জিলাত পৰীক্ষা অনুষ্ঠিত কৰাক লৈ ৰাজ্যজুৰি প্ৰতিক্ৰিয়াৰ সৃষ্টি হৈছে। 

কিয়নো বহু পৰীক্ষার্থীয়ে দুই-তিনিশ কিল'মিটাৰ দূৰৈত পৰীক্ষা দিবলৈ যাব লাগিব। যদিও এই পদৰ বাবে আৱেদন বিনামূলীয়া আছিল, কিন্তু পৰীক্ষা কেন্দ্ৰসমূহ দূৰৈত হোৱাৰ বাবেই এতিয়া বহু পৰীক্ষাৰ্থীৰে জেপৰ ধন ব্যয় হ'ব। ইফালে, শিক্ষা সঞ্চালকালয়ে ৰাজ্যৰ সকলো জিলাতে পৰীক্ষা অনুষ্ঠিত নকৰি মাত্ৰ কেইখনমান জিলাত কিয় পৰীক্ষা অনুষ্ঠিত কৰিলে সেই সন্দৰ্ভত কিন্তু কোনো কথা প্রকাশ কৰা নাই। মন কৰিব লগীয়া কথা যে লিখিত পৰীক্ষাত উত্তীৰ্ণ হোৱাসকলে পৰৱৰ্তী সময়ত দক্ষতা সম্পৰ্কীয় এক পৰীক্ষাও দিব লাগিব, ইয়াৰ পাছতহে তেওঁলোকে নিযুক্তি লাভ কৰিব।

Share This