চম্পাৱতী জলপ্রপাতৰ মহাকুণ্ডমেলাত ভক্তৰ ভিৰ

Dainik janambhumi February 05, 2025

ডিজিটেল ডেস্ক: নগাঁও জিলাৰ চাপানালাৰ চম্পাৱতী জলপ্রপাতত আজিৰ পৰা দুদিনীয়াকৈ অনুষ্ঠিত হৈছে মহাকুণ্ডমেলা। নগাঁও চহৰৰ পৰা ২৫ কিল'মিটাৰ নিলগত অৱস্থিত চাপানালাৰ চম্পাৱতী জলপ্রপাতত অনুষ্ঠিত মহাকুণ্ডমেলা আজি প্রথম দিনা অগণন ভক্তৰ সমাগম হয় যদিও পূৰ্বৰ বৰ্ষৰ
তুলনাত এইবাৰ মেলাত ভক্তৰ উপস্থিতি কম হোৱা দেখা যায়। 

নগাঁও জিলাৰ পুৰণিগুদামৰ ৰাষ্ট্ৰীয় ঘাইপথ গড়মুৰ তিনিআলিৰ পৰা প্ৰায় পোন্ধৰ কিল'মিটাৰ পূব দিশত অৱস্থিত প্রাকৃতিক সৌন্দৰ্যৰে ভৰপূৰ অঞ্চল চাপানালা। নগাঁও-কাৰ্বি আংলং জিলাৰ সীমান্তৱৰ্তী চোৱাং বনাঞ্চলৰ লেমলেমী নামৰ পাহাৰখনৰ বুকুৰ পৰা শিলৰ ফাকেৰে নামি আহিছে উত্তৰ-পূব ভাৰতৰ অন্যতম সর্ববৃহৎ জলপ্রপাত চম্পাৱতী জলপ্রপাত। অপৰূপ প্রাকৃতিক সৌন্দর্যত চহকী উত্তৰ-পূব ভাৰতৰ ভিতৰতে সৰ্ববৃহৎ জলপ্রপাত চম্পাৱতীয়ে ইতিমধ্যে দেশ-বিদেশৰ প্রকৃতিপ্রেমীসকলক আকৰ্ষণ কৰিবলৈ সক্ষম হৈছে। কথিত আছে যে মাঘ মাহৰ শুক্লা সপ্তমী তিথিত চাপানালাৰ চম্পাৱতী জলপ্রপাতত স্নান কৰিলে পুণ্য অর্জন হয়। সেইবাবেই প্রতিবছৰে মাঘ মাহত সৰস্বতী পূজাৰ পাছত আজিৰ দিনটোতে চম্পাৱতী জলপ্রপাতত অসমৰ বিভিন্ন প্রান্তৰৰ পৰা অহা অগণন ভক্তৰ সমাৱেশ ঘটিছে। মাঘী সপ্তমী তিথিত সকলোৱে মনৰ কামনা পূৰণৰ বাবে চম্পাৱতী জলপ্রপাতস্থলীত চাকি-বন্তি জ্বলায়। কিংবদন্তি অনুসৰি, মহাভাৰতত বর্ণিত হংসধ্বজ ৰজাৰ কন্যা চম্পাৱতীয়ে প্ৰতিবছৰে মাঘ মাহৰ শুক্লা সপ্তমী তিথিত শিৱ আৰাধনা হেতু উক্ত জলপ্ৰপাতত স্নান কৰি শিৱৰ বৰ লাভ কৰি পুণ্য অর্জন কৰিছিল। সেইবাবেই এই জলপ্রপাতৰ নাম চম্পাৱতী হয় বুলি কিংবদন্তি প্রকাশ। 

মেঘালয়ৰ বিদন-বিছপ জলপ্রপাতকৈও বৃহৎ এই চম্পাৱতী জলপ্রপাতলৈ পৰ্যটকৰ আকৰ্ষণ বহুগুণে বৃদ্ধি পাইছে। এই জলপ্রপাতত আছে এক সুন্দৰ বনভোজ খাব পৰা পৰিৱেশ। জলপ্রপাতৰ নামনিত আছে চাহ বাগিচা। ইয়াৰ উপৰি বনভোজ খাব পৰাকৈ সুকীয়া স্থান থকাৰ বাবে নৱেম্বৰ মাহৰ পৰা মাৰ্চ মাহ পর্যন্ত এই জলপ্রপাতত বনভোজ দলে ভিৰ কৰে। জলপ্রপাতটো চম্পাৱতী কুণ্ড নামেৰে জনাজাত। তিনিটা ভাগত বিভক্ত জলপ্রপাতটো। তল কুণ্ড, মাজ কুণ্ড আৰু ওপৰ কুণ্ড বুলি পৰিচিত। এই জলপ্রপাতটোলৈ উঠা-নমা কৰা ছিৰি নথকাৰ বাবে প্রকৃত সৌন্দর্য উপভোগ কৰাৰ পৰা বঞ্চিত হয় জলপ্রপাতলৈ অহা অগণন লোকৰ লগতে বনভোজৰ দলসমূহ। বিভিন্ন বিদ্যালয়ৰ ছাত্ৰ-ছাত্ৰীসকলে এই জলপ্রপাতস্থলীত ক্ষেত্ৰ অধ্যয়নৰ বাবেও আহে। এনেক্ষেত্ৰত ৰাজ্য চৰকাৰৰ পৰ্যটন বিভাগে জলপ্রপাতটোলৈ উঠা-নমা কৰাৰ বাবে ছিৰিৰ ব্যৱস্থা কৰিলে ছাত্ৰ- ছাত্ৰীৰ লগতে পর্যটক আৰু বনভোজ দলসমূহে প্ৰকৃত সৌন্দৰ্য উপভোগ কৰিব পাৰিব।

Share This