চীনৰ কৃত্রিম বুদ্ধিমত্তা প্রতিষ্ঠান ডীপছিকে জোকাৰিলে বিশ্ব

dainik janambhumi January 29, 2025

ডিজিটেল ডেস্ক : চীনৰ এ আই (কৃত্রিম বুদ্ধিমত্তা) ডেভেলপাৰ ডীপছিকে সমগ্র বিশ্বৰে শ্বেয়াৰ বজাৰ তথা কৃত্ৰিম বুদ্ধিমত্তাৰ উদ্যোগত তীব্ৰ জোকাৰণি তুলিছে আৰু বিশ্বৰ ৫০০জন আটাইতকৈ ধনী ব্যক্তি কেইবা লাখ কোটি টকাৰ লোকচানৰ সন্মুখীন হৈছে। ডীপছিকে সৃষ্টি কৰা জোকাৰণিত আটাইতকৈ বেছি ক্ষতিৰ সন্মুখীন হয় আমেৰিকাৰ তথ্য প্রযুক্তি খণ্ডৰ কোম্পানী তথা ছিপ নির্মাতা এনভিডিয়াৰ। 

এনভিডিয়া প্রায় ২৪ ঘণ্টাৰ ভিতৰত ৬০,০০০ কোটি ডলাৰৰ (প্রায় ৫১.৯২ লাখ কোটি টকা) লোকচানৰ সন্মুখীন হয়। ই আছিল আমেৰিকাৰ ইতিহাসত কোনো এটা কোম্পানীৰ এদিনত হোৱা আটাইতকৈ বেছি লোকচান। কোম্পানীটোৰ শ্বেয়াৰৰ মূল্য ১৭% হ্রাস পোৱাৰ ফলত এনভিডিয়াৰ বজাৰ মূলধন ৩.০২ লাখ কোটি ডলাৰৰ পৰা ২.৯০ লাখ কোটি ডলাৰ (প্রায় ২৫১ লাখ কোটি টকা) হয়গৈ। এনভিডিয়াৰ শ্বেয়াৰৰ মূল্য তথা চাহিদা হ্রাস পোৱাৰ প্ৰভাৱ আমেৰিকাৰ শ্বেয়াৰ বজাৰতো পৰে।

দেশখনৰ শ্বেয়াৰ বজাৰৰ সূচকাংক নেছডেক কালি ৩.০৭% অর্থাৎ ৬১২.৪৭ চ পইন্ট অৱনমিত হৈ ১৯,৩৪১.৮৩ পইন্ট হয়গৈ। আনহাতে, এছ এণ্ড পি ৫০০ পইন্ট অৱনমিত হয়। ২০২০ চনৰ পাছত আমেৰিকাৰ শ্বেয়াৰ বজাৰৰ সূচকাংকৰ ই আছিল এদিনত সর্ববৃহৎ পতন। মন কৰিবলগীয়া যে এনভিডিয়াৰ মুখ্য কার্যবাহী বিষয়া জেনছেন হুৱাঙৰ প্ৰায় ২০৮০ কোটি ডলাৰ অৰ্থাৎ প্রায় ১.৭৯ লাখ কোটি টকাৰ লোকচান হয়। ইয়াৰ উপৰি বিশ্বৰ আন প্রায় ৫০০ আটাইতকৈ ধনী ব্যক্তিৰ কালিৰ দিনটোত সা-সম্পত্তিৰ পৰিমাণ ১০,৮০০ কোটি ডলাৰৰ অৰ্থাৎ প্রায় ৯.৩৪ লাখ কোটি টকাৰ লোকচান হয়। 

ব্লুমবার্গে প্ৰকাশ কৰা অনুসৰি আটাইতকৈ বেছি লোকচানৰ সন্মুখীন হয় এ আইৰ সৈতে ব্যৱসায়ত জড়িত হৈ থকা ব্যক্তিসকলৰ। ইয়াৰ ভিতৰত এনভিডিয়া আৰু হুৱাঙৰ উপৰি অৰেকলো আছে। বিশ্বৰ শ্বেয়াৰ বজাৰত সৃষ্টি কৰা ধুমুহাৰ ফলত অৰেকলৰ সহযোগী প্ৰতিষ্ঠাপক লেৰী এলিছনৰ ২২৬০ কোটি ডলাৰ, ডেল ইংকৰ মাইকেল ডেলৰ ১৩০০ কোটি ডলাৰ আৰু বিনেন্স হল্ডিংছৰ ১২১০ কোটি ডলাৰ লোকচান হয়। ইফালে ডীপছিকে সৃষ্টি কৰা অভূতপূর্ব পৰিস্থিতিৰ পাছত আমেৰিকাৰ ৰাষ্ট্ৰপতি ড'নাল্ড ট্রাম্পে দেশখনৰ তথ্য প্ৰযুক্তিৰ সৈতে জড়িত কোম্পানীবোৰক সতৰ্ক কৰি দিয়ে। ট্রাম্পে ফ্লৰিডাত এটা অনুষ্ঠানত কয়, 'ডীপছিক এ আই আমাৰ উদ্যোগৰ বাবে এক সতর্কবাণী। এই যুদ্ধত জয়ী হ'বলৈ হ'লে এই বিষয়টোত সম্পূর্ণরূপে মনোযোগ দিব লাগিব।' 

ট্রাম্পে লগতে কয় যে কালি হোৱা জোকাৰণি ছিলিকন ভেলীৰ বাবে ইতিবাচকো হ'ব পাৰে। উল্লেখযোগ্য যে ডীপছিক সম্পূর্ণৰূপে বিনামূলীয়া আৰু মুকলি উৎসৰ এ আই মডেল। চীনৰ এনেধৰণৰ মডেলবোৰৰ মূল্য যথেষ্ট কম। ইয়াৰ বিপৰীতে এনভিডিয়া, মাইক্ৰ'ছফ্টৰ দৰে কোম্পানীয়ে বৃহৎ পৰিমাণৰ ধন বিনিয়োগ কৰি এ আই মডেল প্রস্তুত কৰিছে। সংবাদ মাধ্যমত কৰা দাবী অনুসৰি ডীপছিক মডেল তৈয়াৰ কৰা হয় মাত্র ৪৮.৪৫ কোটি টকাত। 

উল্লেখযোগ্য যে ডীপছিকে ভাৰতীয় এ আই কোম্পানীৰো ক্ষতি কৰে। মন কৰিব লগীয়া যে চীনৰ এ আই ছাটব'ট ডীপছিক-আৰ১ মুকলি কৰাৰ পাছতে বজাৰত প্ৰভাৱ পেলায়। ই অ'পেন এ আই ছাটজিপিটিক চেৰ পেলাই আমেৰিকাৰ এপলৰ ষ্ট'ৰত আটাইতকৈ বেছি ৰেটিং থকা বিনামূলীয়া এপ ৰূপে পৰিগণিত হয়। ভাৰতীয় এ আই কোম্পানী অনন্তৰাজ লিমিটেডৰ শ্বেয়াৰৰ দাম ২০%, নেটৱে'ব টেকন'লজিৰ ১০% আৰু জৈন টেকন'লজিৰ শ্বেয়াৰৰ দাম ১৪% হ্ৰাস পায়।

Share This