ৰণক্ষেত্ৰত পৰিণত হ'ল ঢাকাৰ ৰাজপথ

dainik janambhumi March 08, 2025

ডিজিটেল ডেস্ক: শ্বেখ হাছিনাৰ পতনৰ পাছত বাংলাদেশত ক্রমে মৌলবাদী, সন্ত্রাসবাদী সংগঠনসমূহে গা কৰি উঠিছে। এনে সংগঠনৰ উত্থানে দেশখনৰ লগতে, ভাৰতকে ধৰি প্রতিবেশী দেশসমূহৰ প্ৰতিও কঢ়িয়াই আনিছে ভাবুকি। শুকুৰবাৰেও দেশখনৰ ৰাজধানীত দেখা গ'ল আইছিছৰ দৰেই বাংলাদেশত খিলাফত প্রতিষ্ঠাৰ বাবে আহ্বান জনাই নিষিদ্ধ সন্ত্রাসবাদী সংগঠন হিজবুত তাহৰিৰে আয়োজন কৰা হাজাৰ হাজাৰ লোকৰ 'খিলাফতৰ সমদল'। 

হাছিনাৰ পাছত বাংলাদেশ কিদৰে সন্ত্রাসবাদীৰ আশ্রয়স্থল হৈ উঠিছে এয়া তাৰেই প্ৰমাণ। অৱশ্যে পাছত হিংসাত্মক হৈ উঠা ৩০০০-৫০০০ লোকৰ সমদলক ছত্ৰভংগ দিয়াবলৈ আৰক্ষীয়ে লাঠীচালনা কৰে আৰু কন্দুৱা গেছ প্রয়োগ কৰে। ৰাজপথ হৈ পৰে ৰণক্ষেত্র। এই ঘটনাত বহু লোক আহত হয়। হাছিনাৰ শাসনকালত মৌলবাদী, সন্ত্রাসবাদীয়ে এনে সুবিধা পোৱা নাছিল। কিন্তু পৰৱৰ্তী চৰকাৰৰ দিনত হিজবুতৰ দৰেই একাধিক জেহাদী সংগঠনে মূৰ দাঙি উঠিছে। 

উল্লেখযোগ্য যে লণ্ডনত মুখ্য কার্যালয় থকা সন্ত্রাসবাদী সংগঠন হিজবুতৰ এয়া আছিল প্রথম মুকলি সমদল তথা আন্দোলন। উক্ত সমদলকাৰীয়ে খিলাফতৰ সমৰ্থনত 'স্বাধীনতাৰ এটাই পথ, খিলাফত, খিলাফত', 'নাৰায়ে তকবীৰ, আল্লাহু আকবৰ' আদি ধ্বনি দিয়ে। হিজবুত তাহৰিৰ মতে তেওঁলোকে বিশ্বৰ সকলো মুছলমান দেশকে এক কৰি এখন ইছলামিক দেশ বা মুছলমানৰ দ্বাৰা নিৰ্বাচিত খলিফাৰ এখন ৰাষ্ট্ৰ প্ৰতিষ্ঠা কৰিবলৈ বিচাৰে। এই সংগঠনে দেশত শ্বৰিয়তৰ আইনো বিচাৰে। ২০০৯ চনত সন্ত্রাসবিৰোধী আইনৰ অধীনত প্ৰাক্তন প্রধানমন্ত্রী শ্বেখ হাছিনাৰ চৰকাৰে 'ৰাজহুৱা নিৰাপত্তালৈ ভাবুকি' বুলি উক্ত সংগঠনটোক নিষিদ্ধ কৰিছিল।

Share This