২ এপ্ৰিলৰ পৰা ভাৰতৰ বিৰুদ্ধে আৰোপ কৰিব ১০০ শতাংশ শুল্ক

dainik janambhumi March 06, 2025

ডিজিটেল ডেস্ক: ২ এপ্ৰিলৰ পৰা আমেৰিকাত ভাৰতীয় সামগ্ৰীৰ ওপৰত সমহাৰত শুল্ক আৰোপ কৰা হ'ব। ৰাষ্ট্ৰপতি ড'নাল্ড ট্রাম্পে মার্কিন কংগ্রেছত দিয়া ভাষণত এই ঘোষণা কৰে। ট্রাম্পে সংসদত দিয়া ভাষণত ভাৰতৰ নাম দুবাৰ উল্লেখ কৰে। তেওঁ কয়, 'চীন, মেক্সিকো আৰু কানাডাৰ লগতে ভাৰতেও আমেৰিকাৰ সামগ্রীত বৃহৎ হাবত শুল্ক আৰোপ কৰে, ই উচিত নহয়।' ট্রাম্পে কয় যে ভাৰতে আমেৰিকাত উৎপাদন কৰা সামগ্রীত ১০০% শুল্ক আৰোপ কৰে। ইয়াক তেওঁ আমেৰিকাৰ বাবে অনুচিত বাণিজ্য নীতি বুলি কয়। 

ৰাষ্ট্ৰপতিজনে কংগ্ৰেছত দিয়া ভাষণত লগতে কয়, ভাৰত, ইউৰোপিয়ান ইউনিয়ন, চীন, ব্রাজিল, মেক্সিকো আৰু কানাডাৰ দৰে দেশে আমেৰিকাত উৎপাদন কৰা সামগ্ৰীত মাত্রাধিক শুল্ক আৰোপ কৰে। এতিয়া আমেৰিকাই ইয়াৰ প্ৰত্যুত্তৰ দিব বুলি উল্লেখ কৰে। তেওঁ কয় যে ভাৰতৰ সামগ্ৰীত ২ এপ্ৰিলৰ পৰা সমহাৰত শুল্ক আৰোপ কৰা হ'ব। আন কথাত আমেৰিকালৈ ৰপ্তানি কৰা ভাৰতীয় সামগ্ৰীত ট্রাম্প প্রশাসনে ২ এপ্ৰিলৰ পৰা ১০০% শুল্ক আৰোপ কৰিব। আমেৰিকাৰ সংসদত দিয়া ভাষণত ট্রাম্পে কয়, আমেৰিকাৰ সামগ্ৰীত অধিক শুল্ক আৰোপ কৰা দেশবোৰৰ সামগ্ৰীতো আমেৰিকাই সমহাৰত শুল্ক আৰোপ কৰিব। তেওঁ কয়, 'যদি তেওঁলোকে আমাক তেওঁলোকৰ বজাৰৰ পৰা বাহিৰত ৰখাৰ কাৰণে 'নন মনিটেৰী শুল্ক' আৰোপ কৰে, তেতিয়া আমিও তেওঁলোকৰ বজাৰত সেইটোকে কৰিম।' ট্রাম্পে দক্ষিণ কোৰিয়াকো লক্ষ্য কৰি লয়। তেওঁ কয়, 'আমি দক্ষিণ কোৰিয়াক সামৰিক সাহায্য দিওঁ, তথাপি তেওঁলোকে আমাৰ সামগ্ৰীত অধিক শুল্ক আৰোপ কৰে। এই ব্যবস্থা আমেৰিকাৰ কাৰণে উচিত নহয়।' ট্রাম্পে এইবুলি দাবী কৰে যে তেওঁৰ নতুন শুল্ক নীতিয়ে দেশখনত বিনিয়োগ বৃদ্ধি কৰিছে।

 ট্রাম্পে প্রায় ১ ঘণ্টা ৪৪ মিনিটৰ ভাষণৰ আৰম্ভ কৰে 'আমেৰিকা ইজ বেক', অর্থাৎ আমেৰিকাৰ যুগ উভতি আহিছে বুলি কৈ। ৰাষ্ট্ৰপতিজনে কয় যে বিগত ৪৪ দিনত তেওঁ যিমান কাম কৰিছে সিমানখিনি পূর্ব কেইবাখনো চৰকাৰে ৪ বা ৮ বছৰতো - কৰিব পৰা নাছিল। তেওঁ পাকিস্তানৰ প্ৰতি কৃতজ্ঞতা প্রকাশ কৰি কয় যে ২০২১ চনত আফগানিস্তানত ১৩জন আমেৰিকান সৈনিকক হত্যা কৰা সন্ত্রাসবাদীক ধৰাই দিয়াত দেশখনে সহায় কৰিছিল। ট্রাম্পে কয় যে ইউক্রেইন যুদ্ধৰ অন্ত পেলাবলৈ ৰাষ্ট্ৰপতি ভল'ডিমিৰ জেলেনস্কীয়ে আলোচনাৰ বাবে সাজু বুলি জনাইছে। তেওঁ কয়, 'আমি ৰাছিয়াৰ সৈতে গভীৰভাৱে আলোচনা কৰিছোঁ আৰু আমি মস্কোৰ পৰা পোৱা ইংগিত মতে দেশখন শান্তিৰ বাবে প্রস্তুত।' তেওঁ কয় যে যোৱা চাৰি বছৰত ২.১ কোটি লোকে আমেৰিকাত অবৈধভাৱে অনুপ্রৱেশ কৰিছে। ট্রাম্পে কয়, 'আমাৰ চৰকাৰে আমেৰিকাৰ ইতিহাসত সৰ্ববৃহৎ সীমান্ত আৰু অনুপ্ৰৱেশকাৰীৰ বিৰুদ্ধে অভিযান আৰম্ভ কৰিছে। জ' বাইডেনক আটাইতকৈ দুর্বল ৰাষ্ট্ৰপতি বুলি উল্লেখ কৰি ট্রাম্পে কয় যে তেওঁৰ দিনতে লাখ লাখ লোকে অবৈধভাবে আমেৰিকাত অনুপ্ৰৱেশ কৰিছিল আৰু তেওঁৰ নীতিৰ বাবেই দেশত মূল্যবৃদ্ধি হ'ল। তেওঁ কয়, 'আমি গ'ল্ড কার্ড ভিছা প্ৰণালীৰ ব্যৱস্থা কৰিছোঁ, ই গ্রীন কাৰ্ডৰ দৰে হ'লেও অত্যাধুনিক। ইয়াৰ ফলত বৃহৎসংখ্যক চাকৰিৰ সৃষ্টি হ'ব। ট্রাম্পে পানামা খাল এতিয়া আমেৰিকাৰ অধীনলৈ অহা বুলি ঘোষণা কৰে। উল্লেখযোগ্য যে হংকংস্থিত কোম্পানীয়ে পানামা খালত থকা দুটা আগশাৰীৰ বন্দৰৰ অধিকাংশ শ্বেয়াৰ আমেৰিকাৰ কোম্পানী ব্লেকৰকক বিক্ৰী কৰে। ইয়াৰ ফলত পানামা খালত আমেৰিকাৰ নিয়ন্ত্ৰণ স্থাপন হ'ল।

 ট্রাম্পে কয়, 'পানামা খাল আমেৰিকানসকলৰ বাবে খন্দা হৈছিল, আনৰ কাৰণে নহয়, কিন্তু আনেও ইয়াক ব্যৱহাৰ কৰিব পাৰিব। গ্রীনলেন্ডো আমেৰিকাই নিজৰ নিয়ন্ত্রণলৈ নিব বুলি ঘোষণা কৰে। ইলন মাস্কৰ চৰকাৰী দক্ষতা বিভাগে যুক্তৰাষ্ট্ৰীয় চৰকাৰৰ ভালেমান কেলেংকাৰি পোহৰলৈ অনা বুলি তেওঁ দাবী কৰে। চৰকাৰী চেন্সৰশ্বিপ সম্পূৰ্ণৰূপে প্ৰত্যাহাৰ কৰা বুলি উল্লেখ কৰি তেওঁ কয় যে আমেৰিকাত এতিয়া মুক্তভাবে ভাব প্রকাশ কৰিব পাৰে। ট্রাম্পে কয়, 'আমি বিজ্ঞানৰ নতুন সীমা পাৰ কৰিম, মানুহক মহাকাশলৈ নিম আৰু মঙল গ্রহত আমেৰিকাৰ পতাকা উৰুৱাম। আমি বিশ্বৰ ভিতৰত আটাইতকৈ শক্তিশালী সভ্যতা নির্মাণ কৰিম।' ট্রাম্পে কয় যে আমেৰিকাৰ সুৰক্ষাৰ কাৰণে গ'ল্ডেন ডোম মিছাইল ডিফেন্স শ্বিল্ড নির্মাণ কৰিব আৰু ইয়াৰ বাবে তেওঁ কংগ্ৰেছৰ পৰা পুঁজি বিচাৰে। ট্রাম্পে আমেৰিকাৰ সোণালী যুগ আৰম্ভ হোৱা বুলিও দাবী কৰে। উল্লেখযোগ্য যে আমেৰিকাৰ ইতিহাসত ট্রাম্পে কালি দিয়া ভাষণ আটাইতকৈ দীঘলীয়া বুলি পৰিগণিত হৈছে। উল্লেখযোগ্য যে কালি ট্রাম্পৰ ভাষণৰ সময়ত তেওঁৰ নীতিয়ে দেশখনৰ মহিলাসকলৰ ওপৰত নেতিবাচক প্ৰভাৱ পেলোৱাৰ অভিযোগ কৰি ডেম'ক্রেটিক দলৰ সদস্যসকলে গুলপীয়া ৰঙৰ পোছাক পিদ্ধি কংগ্রেছত উপস্থিত থাকে।

Share This