বিশিষ্ট শিক্ষাবিদ ড৹ লক্ষ্যহীৰা দাসৰ‌ দেহাৱসান 

Rashmi March 15, 2025

ডিজিটেল ডেস্ক : হোলীৰ আনন্দ উল্লাসৰ মাজতে আহিল এক দুখবৰ।যশস্বী শিক্ষাবিদ, কবি, গীতিকাৰ ড৹ লক্ষ্যহীৰা দাস আৰু নাই ৷ শনিবাৰে পুৱতি নিশা প্ৰায় ২:৪৫ বজাত ৰাজগড়ৰ নিজা বাসভৱনত শেষ নিশ্বাস ত্যাগ কৰে বিশিষ্ট কণ্ঠশিল্পীগৰাকীয়ে। মৃত্যুৰ সময়ত তেওঁৰ বয়স আছিল ৯৪ বছৰ। ড৹ লক্ষ্যহীৰা দাসৰ পুত্ৰ অনিৰ্বাণ দাসে সামাজিক মাধ্যমত পোষ্ট কৰি তেওঁৰ মৃত্যুৰ কথা স্পষ্ট কৰে ৷ হৃদৰোগত আক্ৰান্ত হৈ মৃত্যু হয় ড° লক্ষহীৰা দাসৰ। একাধাৰে কবি, গীতিকাৰ, কণ্ঠশিল্পী আৰু শিক্ষাবিদ আছিল ড° লক্ষহীৰা দাস।

ড° লক্ষহীৰা দাসৰ জন্ম হৈছিল ১৯৩১ চনৰ ১৩ ফেব্ৰুৱাৰীত শুৱালকুছিত। তেওঁৰ পিতৃৰ নাম আছিল চন্দ্ৰ বৈশ্য সাউদ আৰু মাতৃৰ নাম আছিল ধৈৰ্যবালা। গুৱাহাটী অনাতাঁৰ কেন্দ্ৰৰ স্বীকৃতিপ্ৰাপ্ত গীতিকাৰ আছিল তেওঁ। যোৰহাট চৰকাৰী ছোৱালী হাইস্কুলৰ পৰা প্ৰৱেশিকা পৰীক্ষাত উত্তীৰ্ণ হৈ কটন কলেজৰ পৰা স্নাতক ডিগ্ৰী লাভ কৰিছিল লক্ষহীৰা দাসে। ৫০খনৰো অধিক গ্ৰন্থ ৰচনা কৰিছিল ড° লক্ষহীৰা দাসে। তেওঁ সৰাপাত আৰু লাচিত বৰফুকন চলচ্চিত্ৰত কণ্ঠদান কৰিছিল। ১৯৬৮ চনত লাচিত বৰফুকন ছবিৰ বাবে শ্ৰেষ্ঠা নেপথ্য কণ্ঠশিল্পীৰ বঁটা লাভ কৰে। ভূপেন হাজৰিকা বঁটা প্ৰাপ্ত সুদক্ষ গায়িকা আছিল ড লক্ষহীৰা দাস। ১৯৪৩ চনত ড° লক্ষহীৰা দাসৰ প্ৰথমটো কবিতা প্ৰকাশ পাইছিল।অসম সাহিত্য সভাৰ শুৱালকুছি অধিবেশনৰ কবি সন্মিলনৰ সভানেত্ৰী আছিল তেওঁ। তেওঁক বিশিষ্ট শিক্ষাবিদগৰাকীৰ অনবদ্য অৱদানৰ বাবে দিয়া হৈছিল ‘সংগীতাচাৰ্য’ উপাধি।

উল্লেখযোগ্য যে ড° লক্ষহীৰা দাসে অসম সাহিত্য সভাৰ বাসন্তী বৰদলৈ বঁটা (১৯৯৫), সংগীতাচাৰ্য উপাধি (১৯৯৫), অসম চৰকাৰৰ শিল্পী বঁটা (২০০৩), প্ৰবীণা শ‌ইকীয়া বঁটা (২০০৯), শৈলধৰ ৰাজখোৱা বঁটা (২০১১), হাউলী বঁটা (২০১৫), ভূপেন হাজৰিকা বঁটা (২০১৯), সংগীত নাটক একাডেমী বঁটা (২০২২) আদি বটাঁ লাভ কৰিছিল ।আনহাতে তেওঁ সাহিত্য ক্ষেত্ৰখনলৈয়ো বিশেষ অৱদান আগবঢ়াই গৈছে ।তেওঁৰ প্ৰকাশিত পুথিসমূহ হৈছে- প্ৰথমা, গীতাৰ্ঘ্য, লক্ষহীৰাৰ গীত, প্ৰাণৰ মুক্তিধাৰা, অস্কাৰ ৱাইল্ডৰ গল্প (অনূদিত), তপসী, প্ৰাণগংঘা, সূৰ্য আৰু সাগৰৰ সাধু আদি।ইয়াৰ সমান্তৰালভাৱে তেওঁ বহু সংখ্যক পাঠ্যপুথি প্ৰণয়ন কৰি প্ৰকাশ কৰিছিল ।তেওঁৰ মৃত্যুত শৈক্ষিক তথা সাংস্কৃতিক জগতত শোকৰ ছাঁ পৰিছে।বিয়লি নৱগ্ৰহ শ্মশানত শেষকৃত্য সম্পন্ন হ’ব বিশিষ্ট শিক্ষাবিদ, গীতিকাৰ ড° লক্ষহীৰা দাসৰ।

Share This