উচ্চতম ন্যায়ালয়ৰ নিৰ্দেশতহে আম্বানিৰ চিৰিয়াখানালৈ হাতী

dainik janambhumi January 22, 2025

ডিজিটেল ডেস্ক: ৰাজ্যৰ মাজেৰে গুজৰাটলৈ হাতীৰ সৰবৰাহক লৈ আজিও অব্যাহত আছে ক্ৰিয়া-প্ৰতিক্ৰিয়া৷ প্ৰকৃততে গুজৰাটৰ বনতাৰালৈ নিয়া ২০টা  হাতী ক’ৰ পৰা অনা হৈছিল ? কেনে পৰিস্থিতিত ২০টা হাতী অসমৰ মাজেৰে লৈ যোৱা হ’ল, তাক লৈ এতিয়াও অব্যাহত আছে বিতৰ্ক৷ 
 

তেনে এক সময়তেই আমাৰ হাতত আহি পৰিছে গুজৰাটলৈ হাতী সৰবৰাহ সন্দৰ্ভত কেতবোৰ গুৰুত্বপূৰ্ণ তথ্য৷ দেওবাৰে অসমৰ মাজেৰে পাৰ হৈছিল হাতী কঢ়িওৱা এনিমেল এম্বুলেঞ্চৰ এক বৃহৎ কনভয়৷ এম্বুলেঞ্চৰ আগে-পিছে বৃহৎ নিৰাপত্তা বেহুৰ সহায়ত গুজৰাটলৈ লৈ যোৱা হৈছিল হাতীকেইটা৷ 
কনভয়টোৰ লক্ষ্যস্থান আছিল গুজৰাটৰ জামনগৰত থকা বনতাৰা নামৰ আম্বানি পৰিয়ালৰ চিৰিয়াখানা৷ জামনগৰত থকা বন্যপ্ৰাণী উদ্ধাৰ কেন্দ্ৰটোলৈ কেইবাটাও অসুস্থ হাতীক দেওবাৰে লৈ যোৱা হৈছিল৷ হাতীকেইটাক অসমৰ মাজেৰে লৈ যোৱাক লৈ ৰাজ্যত ব্যাপক প্ৰতিক্ৰিয়াৰ সৃষ্টি হৈছে৷ 
আম্বানি পৰিয়ালৰ প্ৰতি দৰদ প্ৰদৰ্শন কৰা বুলি অসম চৰকাৰ সৰ্বত্ৰ সমালোচনাৰো সন্মুখীন হৈছে৷ কিন্তু হাতীকেইটা সৰবৰাহত সঁচাই অসম চৰকাৰৰ ভূমিকা আছিলনে? প্ৰয়োজনীয় নথি-পত্ৰ অবিহনে লৈ যোৱা হৈছিল নেকি হাতীকেইটা? 

প্ৰকৃততে অৰুণাচলৰ পৰা অসমৰ মাজেৰে লৈ যোৱা হাতীৰ সৰবৰাহত কোনো ভূমিকা নাছিল অসম চৰকাৰৰ৷ উচ্চতম ন্যায়ালয়ৰ উচ্চ ক্ষমতাসম্পন্ন কমিটীৰ অনুমতি সাপেক্ষেহে গুজৰাটলৈ নিয়া হৈছিল হাতী৷ উচ্চতম উচ্চ ক্ষমতাসম্পন্ন কমিটীৰ ২০২৩ চনৰ ৩ মাৰ্চত জাৰি কৰিছিল এক নিৰ্দেশনা৷ উচ্চ ক্ষমতাসম্পন্ন কমিটীয়ে ২০২৫ চনৰ ১০ জানুৱাৰীত দিয়া নিৰ্দেশনাৰ ভিত্তিতেই গুজৰাটলৈ নিয়া হৈছিল হাতীকেইটা৷ 
উচ্চতম ন্যায়ালয় আৰু ত্ৰিপুৰা উচ্চ ন্যায়ালয়ৰ সম্পূৰ্ণ নিৰীক্ষণৰ মাজত অৰুণাচলৰ পৰা লৈ যোৱা হৈছিল হাতী৷ এই সন্দৰ্ভত আমাৰ হাতত আহি পৰিছে উচ্চতম ন্যায়ালয়ৰ উচ্চ ক্ষমতাসম্পন্ন কমিটীৰ সেই বিশেষ নিৰ্দেশনাখন৷ অৱসৰপ্ৰাপ্ত ন্যায়াধীশ দীপক বাৰ্মাৰ অধ্যক্ষতাত উচ্চ ক্ষমতাসম্পন্ন কমিটীৰ এই বিশেষ নিৰ্দেশনা৷ য’ত স্পষ্টভাৱে হাতীকেইটাক বনতাৰা ৰাধে কৃষ্ণ টেমপল এলিফেণ্ট ৱেলফেয়াৰ ট্ৰাষ্টক হস্তান্তৰ কৰা হৈছে৷ নিৰ্দেশনাত অৰুণাচলৰ পৰা অসম হৈ গুজৰাটলৈ যোৱাৰ পথত অতিক্ৰম কৰিবলগীয়া সংশ্লিষ্ট ৰাজ্যৰ আৰক্ষী আয়ুক্ত প্ৰধানলৈ লিখা হৈছে Letter For Transfer Assistance৷ হাতীকেইটা নিয়াৰ সময়ত যাতে কোনো আইন শৃংখলাজনিত পৰিস্থিতিৰ সৃষ্টি নহয়, তাৰো ব্যৱস্থা ল’বলৈ এই নিৰ্দেশনাত কোৱা হৈছে৷ অৰুণাচল, অসম আৰক্ষী আয়ুক্ত প্ৰধানৰ লগতে পশ্চিম বংগ, উত্তৰ প্ৰদেশ, গুজৰাটৰ ডি জি পিক স্পষ্ট নিৰ্দেশনা দিয়া হৈছে৷ হাতীকেইটাৰ সুচল সৰবৰাহৰ বাবে প্ৰয়োজনীয় এছক’ৰ্ট, সুৰক্ষা দিবলৈ আৰক্ষীক স্পষ্ট নিৰ্দেশনা দিয়া হৈছে৷
সেই নিৰ্দেশনাৰ ভিত্তিতেই অসম আৰক্ষীয়ে সেই এনিমেল এম্বুলেঞ্চৰ কনভয়টোক সুৰক্ষা দিবলৈ বাধ্য৷ তেনে প্ৰেক্ষাপটত অসমৰ মাজেৰে হাতী নিয়াক লৈ ৰাজ্যত সৃষ্টি হোৱা প্ৰতিক্ৰিয়া দৰাচলতে আৱেগৰ বহিঃপ্ৰকাশহে৷ লক্ষণীয়ভাৱে এইখিনি সময়তে চৰ্চালৈ আহিছে হাতীৰ ওপৰত অব্যাহত থকা অকথ্য নিৰ্যাতনৰ প্ৰসংগ৷ 

অসম-অৰুণাচল সীমান্তত আজিও অব্যাহত আছে চোৰাং কাঠৰ বৃহৎ ব্যৱসায়৷ বিশেষকৈ অৰুণাচলৰ সীমান্তত অব্যাহত থকা এনে কাঠৰ চোৰাং কাৰবাৰত হাতীক বলপূৰ্বকভাৱে জড়িত কৰোৱা হয়৷ 
একাংশ দুষ্ট চক্ৰৰ লোকে অৰুণাচলৰ বনাঞ্চলত অব্যাহত থকা কাঠৰ চোৰাং সৰবৰাহতো হাতী ব্যৱহাৰ কৰি আহিছে৷ অটব্য অৰণ্যৰ মাজৰ পৰা সুচল স্থানলৈ হাতীৰ জৰিয়তেই কাঠৰ বৃহৎ কুণ্ডা সৰবৰাহ কৰা হয়৷ এনেদৰেই একাংশ দুষ্ট চক্ৰৰ লোকে হাতীৰ ওপৰত চলাই আহিছে অমানুষিক নিৰ্যাতন৷ এনে প্ৰেক্ষাপটত বনতাৰালৈ হাতী নিয়াৰ প্ৰসংগ অন্য দৃষ্টিৰেও চাব পৰা যায়৷ 

এই সন্দৰ্ভত বনতাৰাই প্ৰকাশ কৰা প্ৰেছ বিজ্ঞপ্তিত কেইবাটাও আঘাতপ্ৰাপ্ত হাতীৰ কথা উল্লেখ কৰা হৈছে৷ হাতীকেইটা বনতাৰাৰ বন্যপ্ৰাণী উদ্ধাৰ কেন্দ্ৰলৈ নি চিকিৎসক, প্ৰাণী বিশেষজ্ঞৰ তত্ত্বাৱধানত চিকিৎসা প্ৰদানৰ কথাও কৰ্তৃপক্ষই উল্লেখ কৰিছে৷ গুজৰাটলৈ সম্পূৰ্ণ আইনী প্ৰক্ৰিয়াৰ মাজেৰে হাতী নিয়াৰ প্ৰসংগত অসমৰ একাংশ লোকৰ প্ৰতিক্ৰিয়া অবাঞ্ছিতই নহয়, আৱেগৰ বহিঃপ্ৰকাশহে বুলি আখ্যা দিব পাৰি৷

Share This