অনবৰতে ভোক লাগি থাকে নেকি 

Ratul rajbanshi February 09, 2025

ডিজিটেল ডেস্কঃ ওজন নিয়ন্ত্ৰণ কৰাৰ ক্ষেত্ৰত এটা ডাঙৰ প্ৰত্যাহ্বান হৈছে ভোক। যদি আপুনি ডায়েট মেইন্টেইন কৰিব বিচাৰিছে আৰু ঠিক সেই সময়তে আপোনাৰ পেটে কলমলাবলৈ ধৰিছে তেন্তে আৰু ৰক্ষা নাই। আপুনি খাবই লাগিব। গতিকে ভোক হৈছে আমাৰ এক শাৰীৰিক কাৰ্য। শৰীৰক যেতিয়া কাম কৰিবলৈ শক্তিৰ প্রয়োজন হয়, তেতিয়া আমাৰ ভোক লাগে। ইয়াৰ উপৰি আপুনি যদি বহু সময় ধৰি একো খোৱা নাই, তেতিয়াও আপোনাৰ ভোক লাগে। শৰীৰত থকা দুবিধ হাংগাৰ হৰমনে আমাৰ ভোক নিয়ন্ত্ৰণ কৰি থাকে। যেতিয়া আমাৰ শৰীৰক আহাৰৰ প্ৰয়োজন হয়, তেতিয়া ঘ্রিলিন নামৰ হৰম'নবিধে মস্তিষ্কক সংকেত দিয়ে যে খাবৰ সময় হৈছে। আৰু যেতিয়া আমাৰ শৰীৰে প্ৰয়োজনীয় আহাৰ লাভ কৰে, তেতিয়া লেপটিন নামৰ হৰম'নবিধে মস্তিষ্কলৈ বাৰ্তা প্ৰেৰণ কৰে যে পেট ভর্তি হৈছে। এই দুয়োটা হৰম'নে একেলগে মিলি কাম সমাধা কৰে। কিন্তু কেতিয়াবা ই আপোনাক হাৰাশাস্তিও কৰিব পাৰে। যাৰ দেহত বহুত চর্বি থাকে, তেওঁলোকৰ শৰীৰত লেপটিনৰ মাত্ৰা অধিক হয়। কিন্তু শৰীৰে ইয়াৰ অৱৰোধ কৰি ৰাখে। যাৰ বাবে কেতিয়া খোৱা বন্ধ কৰিব লাগে তেওঁলোকে গম নাপায়। গতিকে আজি আমি আপোনালোকলৈ এনে কিছুমান কৌশল লৈ আহিছোঁ, যাৰা দ্বাৰা ভোক নিয়ন্ত্ৰণ কৰি ৰাখিব পাৰিব-

■ খোৱাৰ সময় একে থাকিব লাগে। সদায় একে সময়তে খোৱাৰ অভ্যাস কৰিলে ই হাংগাৰ হৰম'নসমূহক প্রশিক্ষণ দিয়াত সহায় কৰে। দিনটোত খোৱাৰ সময়ৰ মাজত ব্যৱধান থকাটো অতি বাঞ্ছনীয়।

■ অত্যধিক ভোকত একো খাব নালাগে। যেতিয়া আপোনাৰ ভোক লাগে, তাৰ দহ-বিশ মিনিটমান পিছতহে আহাৰ গ্ৰহণ কৰিব লাগে।

■ খাদ্য খাওঁতে লাহে লাহে খাব লাগে। লাহে লাহে খালে চোবোৱাৰ পৰা খাদ্য দ্রব্য গিলালৈকে আমাৰ দহ মিনিট সময়ৰ প্রয়োজন হয়। যিহেতু প্রিলিন আৰু লেপটিনৰ নিজৰ কাৰ্য সম্পন্ন কৰিবলৈ সময় লাগে। গতিকে লাহে লাহে খোৱাৰ ফলত সিহঁতৰ কাৰ্য সমাধা হোৱাত সহায়ক হয়।

■ যদি খাই উঠাৰ পিছত আকৌ আপোনাৰ ভোক লাগে, তেন্তে এগিলাচ পানী খাওক। হয়তো শৰীৰত পানীৰ প্ৰয়োজন বাবে ভোগ লাগি থাকিব পাৰে। আচলতে খাদ্যৰ প্ৰয়োজন হʼলে আপোনাৰ শৰীৰটোৱে ভাগৰ অনুভৱ হোৱাৰ লগতে পেট খালী যেনো অনুভৱ হ'ব।

■ ৰাতিপুৱাৰ ব্রেকফাষ্ট ঠিকমতে কৰিলে দিনটোলৈ ভোক নালাগে। ব্রেকফাষ্টত কার্বহাইড্রেট, প্র'টিনজাতীয় খাদ্য অন্তর্ভুক্ত কৰিলে আপোনাৰ দিনটোলৈ শৰীৰত এনার্জী থকাৰ লগতে ভোক নিবাৰণতো সহায়ক হয়।

■ সদায় শৰীৰচৰ্চা কৰিলে আমাৰ শৰীৰৰ আন আন হৰম'নৰ লগতে হাংগাৰ হৰম'নতো ইতিবাচক প্রভাৱ পৰে।

■ ফাইবাৰযুক্ত খাদ্য গ্রহণ কৰিলে বহুত দেৰিলৈ পেট ভর্তি হৈ থকা যেন অনুভৱ হয়। যাৰ দ্বাৰা আপুনি ভোক নিয়ন্ত্রণ কৰিব পাৰে।

■ সেউজীয়া আপেলৰ গোন্ধেও ভোক নিয়ন্ত্রণত সহায় কৰে।

■ কাম কৰি থকাৰ সময়ত আহাৰ গ্ৰহণ নকৰিব।

Share This