কাজিৰঙাত নতুন পক্ষীৰ সন্ধান,২ ফেব্ৰুৱাৰীত মুকলি হ'ব পাণবাৰী

dainik janambhumi January 30, 2025

ডিজিটেল ডেস্ক : কাজিৰঙা ৰাষ্ট্ৰীয় উদ্যানত পক্ষীবিজ্ঞানৰ এক উল্লেখযোগ্য আৱিষ্কাৰ। শেহতীয়াকৈ কাজিৰঙাৰ পাণবাৰী সংৰক্ষিত বনাঞ্চলৰ ওচৰত পল্লৱ প্রকাশ শইকীয়া আৰু হেমন্ত গগৈ নামৰ যুৱ পৰ্যটক গাইডে এবিধ বিৰল ব্লু-এণ্ড-হোৱাইট ফ্লাইকেচাৰ দেখা পাইছে। কাজিৰঙা ৰাষ্ট্ৰীয় উদ্যান তথা ব্যাঘ্ৰ সংৰক্ষিত বনাঞ্চলৰ ক্ষেত্ৰ সঞ্চালক সোণালী ঘোষে জানিবলৈ দিয়া মতে কাজিৰঙা-বাৰ্ডাৰছ হেভেন অর্থাৎ ইউনেস্ক'ৰ বিশ্ব ঐতিহ্য ক্ষেত্র কাজিৰঙা ৰাষ্ট্ৰীয় উদ্যান চৰাই চোৱা লোকৰ স্বৰ্গ। 

ৰাষ্ট্ৰীয় উদ্যানখন মনোমোহা প্রাকৃতিক দৃশ্য, জলাশয়, ঘাঁহনি আৰু পক্ষীৰে ভৰি আছে। উদ্যানখনত কেইবাটাও বিৰল আৰু বিপন্ন জাতকে ধৰি স্থানীয় আৰু পৰিভ্ৰমী উভয় প্ৰজাতিৰ অবিশ্বাস্য বৈচিত্র্যৰ পক্ষী আছে। চৰাই পর্যবেক্ষকসকলে এই মনোমোহা জীৱবোৰক তেওঁলোকৰ প্ৰাকৃতিক বাসস্থানত পৰ্যবেক্ষণ আৰু ফটো তোলাৰ সুযোগত নিজকে মুগ্ধ কৰিছে, যাৰ ফলত কাজিৰঙা ভাৰতৰ পক্ষী অনুৰাগীসকলৰ বাবে এক অতুলনীয় গন্তব্যস্থান হিচাপে পৰিগণিত হৈছে। এই অনন্য চৰাইবিধ অতি আকর্ষণীয়। মতা চৰাইটোৰ ওপৰৰ অংশ স্পন্দনশীল নীলা, বিপৰীতমুখী বগা পেট আৰু আকর্ষণীয় ক'লা মুখৰ। মাইকী চৰাইজনীৰ ওপৰৰ অংশ বাদামী আৰু পেটৰ তলৰ অংশ বগা। ই পুৰণি বিশ্বৰ মাখি ধৰা পৰিয়াল Muscicapidaeৰ অন্তৰ্গত, যাক জনপ্রিয়ভাৱে জাপানীজ ফ্লাইকেচাৰ বুলিও কোৱা হয়। নীলা-বগা ফ্লাইকেচাৰ এটা পৰিভ্ৰমী প্রজাতি।
ই পূব এছিয়া অর্থাৎ জাপান, কোৰিয়া, চীনৰ কিছু অংশ আৰু ৰাছিয়াত প্রজনন কৰে আৰু দক্ষিণ-পূব এছিয়াত শীতকাল কটায়। কাজিৰঙাত এই দৃশ্যই উদ্যানখনৰ চহকী জৈৱ-বৈচিত্র্য আৰু পৰিভ্ৰমী চৰাইৰ বাবে এক গুৰুত্বপূর্ণ বাসস্থান হিচাপে ইয়াৰ গুৰুত্বৰ ওপৰত আলোকপাত কৰিছে বুলিও সঞ্চালকে মত প্রকাশ কৰে। ইফালে ৰাজ্যখনৰ মুখ্যমন্ত্ৰীয়ে নিজৰ সামাজিক মাধ্যমত শেহতীয়াকৈ কাজিৰঙাত বিৰল ব্লু এণ্ড হোৱাইট ফ্লাইকেচাৰক দেখা পোৱাৰ বাবে উৎসাহ প্রকাশ কৰিছে। 

বাৰ্ড ৱাছাৰ্ছৰ বাবে ৰোমাঞ্চকৰ খবৰঃ ব্লু এণ্ড হোৱাইট ফ্লাইকেচাৰ কাজিৰঙাত দেখা গৈছে। কাৰণ এই পক্ষীৰ পৰম্পৰাগত প্ৰব্ৰজন পথৰ বাহিৰত দেখা পোৱাটো অতি আশ্চৰ্যৰ কথা আৰু সৌন্দৰ্যৰ আভাস বুলি মুখ্যমন্ত্রীয়ে মত প্রকাশ কৰিছে। গতিকে বিগত দহ বছৰৰ পাছত পাণবাৰী বার্ডিং ছাফাৰী পুনৰ মুকলি কৰা হৈছে আৰু সকলো পর্যটকক কাজিৰঙালৈ গৈ দৰ্শন কৰিবলৈ মুখ্যমন্ত্ৰীয়ে আহ্বান জনাইছে। ইফালে কাজিৰঙা ৰাষ্ট্ৰীয় উদ্যান কর্তৃপক্ষই প্রায় ১০ বছৰৰ পাছত বিশ্ব জলাশয় দিৱস উপলক্ষে পাণবাৰী বাৰ্ড ছাফাৰী পুনৰ মুকলি কৰিব অহা ২ ফেব্ৰুৱাৰীত। উল্লেখযোগ্য যে কাজিৰঙা ৰাষ্ট্ৰীয় উদ্যানৰ অধীনত থকা পাণবাৰী সংৰক্ষিত বনাঞ্চলত বার্ডিং ছাফাৰী কেইবাটাও কাৰণত গুৰুত্বপূৰ্ণ। উদ্যান কর্তৃপক্ষই এক বার্তাযোগে জানিবলৈ দিয়া মতে, এই পথটোৱে বনাঞ্চল, জলাশয় আৰু ঘাঁহনিকে ধৰি বিভিন্ন পৰিৱেশতন্ত্ৰৰ মাজেৰে পাৰ হৈ যায়। ফলত এই বনাঞ্চলত আৰু পৰিভ্ৰমী চৰাইকে ধৰি বিভিন্ন ধৰণৰ দেশীয় চৰাই প্ৰজাতিৰ বাসস্থান। ইয়াৰ উপৰি এই বনাঞ্চলত দেশৰ ভিতৰতে সৰ্বাধিক পখিলাৰ প্ৰজাতি পোৱাৰ অন্যতম বনাঞ্চল হিচাপে পৰিগণিত হৈছে। আনহাতে, উদ্যান কর্তৃপক্ষই মত প্ৰকাশ কৰা মতে যদি এই পক্ষী দর্শন সফল হয়, তেন্তে ছাফাৰীয়ে চৰাই চোৱা পৰ্যটনক প্ৰসাৰিত কৰিব আনকি বাৰিষাৰ সময়তো আৰু উদ্যানখনৰ সংৰক্ষণ প্ৰচেষ্টাত অৰিহণা যোগাব পাৰে আৰু বন্যপ্ৰাণী সংৰক্ষণৰ গুৰুত্বৰ বিষয়ে সজাগতা বৃদ্ধিত সহায় কৰিব পাৰে বুলি সঞ্চালকে জানিবলৈ দিয়ে।

Share This